“Sözügedən qərar islahatların daha ağrısız həyata keçirilməsini təmin edir”
Xəbər verildiyi kimi, Birinci vitse-prezident Mehriban Əliyeva “Hərbiləşdirilmiş Mühafizə Dəstəsi” MMC-də çalışan və işdən ixtisar olunan əməkdaşların müvafiq işlə təmin edilməsi barədə “Azərenerji” ASC-yə göstəriş verib. Belə ki, 2018-ci il dekabrın 13-də bir qrup şəxs “Hərbiləşdirilmiş Mühafizə Dəstəsi” MMC-də tutduğu vəzifədən azad olunması ilə bağlı Birinci vitse-prezident Mehriban Əliyevaya məktubla müraciət edib. Müraciətin araşdırılması nəticəsində məlum olub ki, 2018-ci il iyulun 3-də Mingəçevir şəhərindəki Azərbaycan İstilik Elektrik Stansiyasında baş vermiş qəza ilə əlaqədar enerji sisteminin dövlət əhəmiyyətli strateji obyektlərində təxribat və terror xarakterli əməllərin qarşısının alınması üçün qabaqlayıcı tədbirlər kimi bu obyektlərin mühafizəsinin Daxili İşlər Nazirliyinin Mühafizə polisi tərəfindən aparılması barədə qərar qəbul edilib. “Azərenerji” ASC tərəfindən “Azərbaycan İES” MMC-nin mühafizəsinin zəruri hissəsi Daxili İşlər Nazirliyinə həvalə olunduğundan, Mingəçevir və Varvara Su Elektrik Stansiyalarının mühafizəsinin böyük hissəsi Fövqəladə Hallar Nazirliyi tərəfindən həyata keçirildiyindən, eləcə də “Azərbaycan İES” və bir sıra stansiyalarda ağıllı müşahidə kameraları quraşdırıldığından və hasarlama işləri aparıldığından bəzi işçilərin ixtisarı barədə qərar qəbul olunub. Bütün bunlarla yanaşı, Birinci vitse-prezident Mehriban Əliyeva məsələnin işçilərin əmək hüquqlarının bərpa olunması şərti ilə operativ həllinə və onların müvafiq işlə təmin olunmasına dair göstəriş verib. Mehriban xanımın bu qərarı ölkədə aparılan uğurlu sosial siyasətin göstəricisidir. Yəni vətəndaşların əmək hüquqları qorunur. Bu baxımdan sözügedən qərarı ekspertlər necə dəyərləndirir? Məsələyə münasibət bildirən ekspert Rəsul Cahangirli sözügedən qərara müsbət prizmadan yanaşdı: “Mehriban xanımın bu qərarı alqışa layiqdir. Ona görə ki, ötən il məlum səbəblərdən ixtisar olunan bir qrup şəxs işlə təmin olunacaq. Bunun sayəsində onların əmək hüquqları qorunacaq. Bütövlükdə, bu kimi addımlar cəmiyyətdə büyük rəğbətlə qarşılanır. Eyni zamanda, sözügedən addımlar aparılan islahatların daha ağrısız həyata keçirilməsini təmin edir. Hansısa sosial narazılığa, gərginliyə səbəb olmur. O baxımdan Mehriban xanımın bu qərarı təqdirəlayiqdir. Hesab edirəm ki, bununla bağlı görülən işlərin müsbət effekti davamlı olacaq. Eyni zamanda, ixtisara düşən vətəndaşların işlə təmin olunmasına və bu sahədə dinamikliyin artmasına öz müsbət təsirini göstərəcək ”.
Vidadi ORDAHALLI
