Qaçqın və məcburi köçkünlərin sosial vəziyyətinin, eləcə də mənzil-məişət şəraitinin yaxşılaşdırılması üçün dövlət tərəfindən çoxsaylı addımlar atılıb. Bu sosial sferadan olan vətəndaşlarımız üçün yaşayış massivləri, şəhərciklər, qəsəbələr salınıb.
Qaçqınların və Məcburi Köçkünləri İşləri üzrə Dövlət Komitəsinin sədr müavini Fuad Hüseynov mətbuata bildirib ki, son 18 ildə 300 min məcburi köçkün ailəsi üçün 102 qəsəbə salınıb. O vurğulayıb ki, təkcə ötən il 5 min 800 köçkün ailəsi üçün fərdi evlər, mənzillər tikilib və istifadəyə verilib. Bu, son illər ərzində rekord göstərici hesab olunur. Qeyd edək ki, 2018-ci ildə Sumqayıt şəhərində qaçqın və məcburi köçkün ailələri üçün inşa edilən yaşayış binaları kompleksinin açılışı olub. Bu kompleksdə 1005 qaçqın və məcburi köçkün ailəsi mənzillə təmin edilib. Abşeron rayonunun Masazır, Mehdiabad, həmçinin Sabunçu rayonunun Ramana qəsəbələrində 470 mənzil məcburi köçkünlərə təqdim edilib. Bununla yanaşı, Heydər Əliyev Fondu tərəfindən alınan 465 mənzilə Binəqədi rayonu, 9-cu mikrorayon ərazisindəki Təcili Tibbi Yardım Stansiyasının yarımçıq binasından məcburi köçkün ailələrinin köçürülməsi başa çatıb. Bu gün evlərlə, mənzillərlə təmin edilən məcburi köçkünlərin sayı artıq 300 minə çatıb, bu da 55 min ailə deməkdir. Prezident İlham Əliyevin həyata keçirdiyi sosial siyasət artıq başqa ölkələrdə də bir nümunə kimi tətbiq olunur.
Tanınmış siyasi şərhçi Rufiz Qonaqov bakı-xeber.com-a bildirdi ki, Azərbaycan dövləti tərəfindən qaçqın və məcburi köçkünlərin sosial rifahının yüksəldilməsi üçün atılan addımlar təqdirəlyiqdir: “Prezident İlham Əliyev indiyə qədər qaçqın və köçkünlərin, yurd-yuvasından didərgin düşən insanların məskunlaşması ilə bağlı müvafiq sərəncamlar imzalayıb. Bu sərəncamlara uyğun olaraq qaçqın və məcburi köçkünlər üçün mərhələli şəkildə müxtəlif şəhər, rayon və qəsəbələrdə binalar, fərdi evlər, şəhərciklər salınıb. Bilirik ki, məcburi köçkünlər antisanitariya şəraitində olan köhnə tikililərdə, yataqxanalarda yaşayırdılar. Bu da onların özlərinin, övladlarının səhhətinə mənfi təsir göstərirdi. Bu gün onlar bu problemi arxada qoyub, şəraitsiz yerlərdə deyil, yüksək təmirli mənzillərdə yaşyırlar. Məcburi köçkünlərin böyük bir qismi Bakıda və Sumqyıtda məskunlaşmışdı. Lakin cənab Prezidentin müvafiq sərəncmlarından irəli gələrək ən qısa zamanda məcburi köçkünlər üçün çoxsaylı qəsəbələr, kəndlər salındı. Məhz o yerlərdə ki, ora Qarabağ və Qarabağa yaxın ərazilərdir. Burada məcburi köçkünlər üçün hər bir şəraiti olan evlər tikildi və onlar kompakt şəkildə bu yaşayış komplekslərində mənzillə təmin edildilər. Eyni zamanda da Prezident onların məşğulluğunun təmin edilməsi ilə bağlı xüsusi Sərəncam imzaladı. Burada göstərilirdi ki, onlar məskunlaşma ilə yanaşı həm də işlə təmin edilsinlər. Son 18 ildə 102 köçkün qəsəbəsinin salınması Azərbaycan dövlətinin öz isti ocağından didərgin düşən məcburi köçkünlərlə bağlı apardığı uğurlu sosial siyasətin nəticəsidir”. R.Qonaqov vurğuladı ki, bu gün ölkəmizdə bir dənə də olsun çadır şəhərciyinin qalmaması bu sosial siyasətin nəticəsidir. Məcburi köçkünlərə göstərilən dövlət qayğısının davamlı xarakter aldığını deyən R.Qonaqovun sözlərinə görə, İlham Əliyev Prezident seçilərkən qaçqın və məcburi köçkünlərin həyat şəraitinin yaxşılaşdırılcağına söz vermişdi. Ölkə başçısının daim öz sözünə əməl etdiyini deyən müsahibimizin qeyd etdiyinə görə, Prezident İlham Əliyevin şəxsi iradəsi və yürütdüyü siyasət nəticəsində məcburi köçkünlərin daha yüksək səviyyədə, qayğısız yaşaması üçün addımlar atılır. Cocuq Mərcanlının azad olunmasından qısa müddət sonra kənd sakinləri öz doğma evlərinə qayıtdılar. Onlar üçün müasir tipli evlər tikildi, uşaq bağçası, məktəb və s. inşa edildi. Bu da bir daha onu göstərdi ki, həqiqətən də Azərbaycan Prezidenti üçün Azərbaycan xalqının mənafeyi, maraqları hər şeydən üstündür”-deyə R.Qonaqov bildirdi.
İradə SARIYEVA
