Prezident İlham Əliyevin imzaladığı “Azərbaycan Respublikası Vergi Məcəlləsində dəyişiklik edilməsi haqqında” Qanun və bu Qanunun tətbiqinə dair Fərmandan irəli gələn məsələlərlə əlaqədar Vergilər Nazirliyində kütləvi informasiya vasitələri üçün mətbuat konfransı keçirilib.
Vergilər nazirinin müavini Sahib Ələkbərov KİV nümayəndələrinə Vergi Məcəlləsinə əlavə və dəyişikliklərin əsas mahiyyəti və 2019-cu ildə həyata keçiriləcək vergi islahatarının başlıca istiqamətləri barədə məlumat verib. O qeyd edib ki, Vergi Məcəlləsində dəyişikliklərlə bağlı ilk təkliflər apreldə Nazirlər Kabinetinə göndərilib: “Ümumiyyətlə, vergi Məcəlləsindəki dəyişikliklərin hamısı sahibkarların xeyrindədir. Bəziləri düşünür ki, bu birdən-birə bizim ağlımıza gəldi. Amma bu heç də belə deyil. Biz ekspertlərin və digər tərəflərin fikirlərini öyrənib təklifi hökumətə göndərdik. Onların da mövqeyini öyrənib qanun layihəsini Milli Məclisə göndərdik. İlk dəfə idi ki, parlamentdə Vergi Məcəlləsi 3 oxunuşdan keçdi. Deputatların fikirlərini də dinləyib, Məcəllədə bəzi dəyişikliklər də etdik. Məcəllədə bütün dəyişikliklər sahibkarların xeyrindədir".
Nazir müavini qeyd edib ki, yeni məcəllə ilə bağlı xüsusi kitabça nəşr olunur: "Artıq kitabça çapa gedib və ümid edirəm ki, həftə sonuna hazır olacaq. Bu kitabçalar bizim xidmət mərkəzlərimizə paylanacaq.
S.Ələkbərov onu da vurğulayıb ki, Prezident İlham Əliyevin rəhbərliyi ilə Azərbaycanda həyata keçirilən sosial-iqtisadi siyasətin tərkib hissəsi olan vergi siyasəti iqtisadiyyatın bugünkü tələblərinə uyğun olaraq təkmilləşdirilir.
Nazir müavininin sözlərinə görə, Vergilər Nazirliyi differensial ƏDV-nin tətbiqi imkanını öyrənir: “Hazırda səhiyyə sahəsində differensial ƏDV üzrə təkliflərin hazırlanması üzərində çalışırıq. Bu pilot layihədir. Nəticələrdən asılı olaraq bu prosesi davam etdirə bilərik. Hazırda Azərbaycanda 18 faizlik dərəcə ilə ƏDV tətbiq olunur. Son illər bir sıra ekspertlər Azərbaycanda differensial ƏDV-nin tətbiqinin məqsədəuyğun olduğunu qeyd ediblər. Vergilər Nazirliyinin rəhbərliyi hesab edir ki, bu məsələ daha ətraflı öyrənilməlidir. Eyni zamanda, Hesablama Palatası differensial ƏDV-nin tətbiqini məqsədəuyğun hesab edir. Palatanın qiymətləndirmələrinə görə, bu cür differensial ƏDV qeyri-neft sektorunun inkişafının dəstəklənməsi, daxili istehsalın inkişafının stimullaşdırllması, idxaldan asılılığın minimuma qədər azaldılması, istehlakın daimi stimullaşdırılması tədbiridir”.
Vergilər Nazirliyinin Vergi siyasəti departamentinin baş direktoru Samirə Musayeva bildirib ki, mikrobiznes subyektləri 2019-cu ildə vergiləri hesablanmış güzəştlərlə ödəyəcək: “Mikrobiznes subyektlərindən güzəştlər hesablanmadan və ilin sonunda artıq hesablanmış vergi məbləğinin sonradan qaytarılması şərtilə vergi ödəmək tələb olunmur. Vergi Məcəlləsinə daxil edilən və 2019-cu il yanvarın 1-dən qüvvəyə minəcək dəyişikliklərə əsasən, mikro-sahibkarlıq subyektləri üçün nəzərdə tutulan güzəştlərə sahibkarlıq fəaliyyətindən əldə olunan gəlir və mənfəətin 75 faizinin vergidən azad edilməsi daxildir. Bundan başqa, mikro-sahibkarlıq subyekti olan fərdi sahibkarlar və hüquqi şəxslər əmlak vergisindən azad edilir. Həmçinin mikro və kiçik sahibkarlıq fəaliyyəti ilə məşğul olan startaplar startap fəaliyyəti üçün şəhadətnamə aldıqları andan etibarən 3 il müddətinə gəlir və mənfəət vergisi ödənişindən azad edilir”.
Vergi siyasəti departamentinin Vergi qanunvericiliyi idarəsinin direktoru Əvəz Quliyev Vergi Məcəlləsinə dəyişikliklərin əsas istiqamətlərinə həsr olunmuş təqdimatla çıxış edib.
O bildirib ki, dəyişikliklər 5 əsas istiqaməti əhatə edir. Bunlar sahibkarlığın dəstəklənməsi, vergidən yayınmanın və “kölgə iqtisadiyyatı”-nın miqyasının azaldılması, vergitutma bazasının genişləndirilməsi, vergi inzibatçılığının təkmilləşdirilməsi, mövcud və yeni vergi güzəştlərinin səmərəliliyinin yüksəldilməsi kimi istiqamətləri əhatə edir. Təqdimat zamanı bu istiqamətlərin hər biri üzrə əsas dəyişikliklər və onların mahiyyəti barədə məlumat verilib.
Günel CƏLİLOVA
