XX əsrin dəhşətli soyqırım hadisəsi olan Xocalı qətliamının törədilməsindən 25 il keçir. Bununla bağlı respublikamızda və ölkəmizdən kənarda silsilə tədbirlər keçirilir. Fevralın 21-də Beynəlxalq Mətbuat Mərkəzində Xocalı soyqırımının 25 illiyində "ifadələr iddianı məhv edir" ideyası əsasında çəkilən "Dəhliz" sənədli filminin təqdimatı keçirildi. Filmin rejissoru Elmar Məlikovdur.
Təqdimat mərasimini açan Azərbaycan Mətbuat Şurasının sədri, Milli Məclisin deputatı Əflatun Amaşov bildirdi ki, 25 il əvvəl erməni silahlı qüvvələri və 366-cı motaatıcı alayın hərbçiləri tərəfindən törədilən Xocalı soyqırımı insanlığa qarşı böyük cinayətdir. Ə.Amaşov qeyd etdi ki, ermənilərin həyata keçirdiyi qanlı cinayət nəticəsində uşaqlar, qadınlar, qocalar qətlə yetirilib, yaralanıb, əsir düşüb. 613 nəfər insanın qətlə yetirildiyi soyqırım hadisəsinin tanıdılması ilə bağlı müxtəlif səpkili işlər görülür. O vurğuladı ki, Heydər Əliyevin prezidentliyi dövründə Xocalı soyqırımının dünyaya çatdırılması istiqamətində böyük işlər görülüb, çoxsaylı sənədlər qəbul edilib.
Azərbaycan Respublikası Prezidenti İlham Əliyev tərəfindən də bu istiqamətdə bir sıra tədbirlərin həyata keçirildiyini diqqətə çatdıran millət vəkili dedi ki, qəbul edilən sənədlər dünya ictimaiyyətinə, beynəlxalq aləmə çatdırılıb. Ə.Amaşovun sözlərinə görə, 100-ə yaxın ölkədə Xocalı hadisəsi soyqırım kimi tanınıb. ABŞ-ın 20-dən artıq ştatı Xocalı soyqırımını tanıyıb. Azərbaycan Respublikasının müxtəlif qurumları, o cümlədən də Milli Məclis tərəfindən çoxsaylı sənədlər qəbul edilib. O, həmçinin, qeyd etdi ki, Xocalı dəhşətini törədənlərə qarşı Azərbaycan hüquq-mühafizə orqanları tərəfindən cinayət işi başlanıb, bu vəhşiliyi törədənlər hazırda hakimiyyətdə olsa da, nə zamansa onlar məsuliyyətə cəlb ediləcək. "Hazırda Milli Məclisdə beynəlxalq cinayətlərin qarşısının alınması və cəzalandırılması ilə bağlı layihə müzakirə edilir və yəqin ki, yaxın vaxtda o sənəd qəbul ediləcək. Məhz o sənədə əsasən, Xocalı soyqırımında əli olanlar harada olmasından asılı olmayaraq, Azərbaycana gətiriləcək və cinayət məsuliyyətinə cəlb ediləcək" - deyə Ə.Amaşov bildirdi.
Ə.Amaşov vurğuladı ki, ermənilər tərəfindən törədilən Xocalı vəhşətini hadisə şahidlərindən yaxşı heç kəs dünyaya çatdıra bilməz. Onun bildirdiyinə görə, yəhudilərin soyqırımı faşizmdən əziyyət çəkən, işgəncələr görən yəhudilərin ifadələri əsasında dünyaya tanıdıldı. Yəni şahid ifadələri əsasında məhkəmə quruldu və cinayətkarlar ifşa olundu. "Azərbaycanda Xocalı soyqırımının tanıdılması ilə bağlı çoxsaylı işlər görülüb. Bu gün Xocalı şahidləri yaşayır və onların danışdıqları tarixin yaddaşında qalacaq və şahid dili ilə erməni vəhşətini ifşa edəcək" - deyə bildirən Ə.Amaşov tədbir iştirakçılarını "Dəhliz" filminə baxmağa dəvət etdi.
Filologiya üzrə fəlsəfə doktoru, filmin çəkilişinə yaxından dəstək olmuş Sona Vəliyeva çıxış edərək əvvəlcə filmin yaradıcı heyətinə təşəkkürünü bildirdi. O qeyd etdi ki, film az büdcə ilə çəkilib. S.Vəliyeva vurğuladı ki, təbliğat işində çalışan hər bir qələm adamı Xocalı soyqırımı ilə bağlı işlər görməlidir. O, çıxışında ermənilərin zaman-zaman işğalçılıq siyasəti yürütdüklərini, günahsız insanları vəhşiliklə qətlə yetirdiklərini nəzərə çatdırdı. S.Vəliyeva, həmçinin, bildirdi ki, Fransada ermənilər Xocalı qətliamını guya ermənilərin qətliamı kimi qələmə verir və bizə qarşı təbliğat aparır. Bu gün dünyanın erməni yalanına inandığını bildirən S.Vəliyevanın sözlərinə görə, ermənilər uşaqdan qocaya qədər bizim əleyhimizə silahlanıb. O dedi ki, dünya erməni yalanlarına inanmasaydı, bu qədər ədalətsizlik olmazdı: "Yəhudi soyqırımını bütün dünya tanıdı. Onların Berlinin mərkəzində rəmzi qəbiristanlıqları var. Xocalı faciəsinin dünyaya çatdırılması istiqamətində daha çox işlər görməliyik. Biz uşaqlarımıza milli düşüncəmizi təbliğ etməliyik. Təbliğat işinə bağçadan, məktəbdən başlamalıyıq. Evdə analar dil açan körpəyə dostumuzun və düşmənlərimizin kimliyi barədə danışmalıdır. Ermənilər körpələri yatmayanda "türk gəlib səni aparar" deyir. Onlar hər zaman bizə qarşı təbliğat aparır. Biz də təbliğat işləri görməliyik. Xocalı şahidləri danışdıqca, onlara baxıram, onlar sanki ayaq üstə "ölü"dürlər. Bu filmi fransız dilinə tərcümə edin, çünki fransada erməni təbliğatı güclüdür. "Dəhliz" ingilis və digər dillərə də tərcümə edilməlidir".
S.Vəliyeva vurğuladı ki, Xocalı hadisəsinin soyqırım kimi tanınması Azərbaycan Respublikasının sabiq prezidenti Heydər Əliyevin adı ilə bağlıdır. "Ümummilli liderimiz Heydər Əliyev hakimiyyətə gəldikdən sonra Xocalı hadisəsinə soyqırım statusu verildi. Bu, sıradan bir hadisə deyildi və dünyanı sarsıdan soyqırımdır. Heydər Əliyev bu soyqırımı bəşər tarixində misli görünməmiş cinayət adlandırırdı" - deyə bildirən S.Vəliyeva qeyd etdi ki, erməni vəhşiliyini dünyaya çatdırmaq üçün millət olaraq həmrəy olmalıyıq, həmrəy olsaq, düşmənin cinayətini ifşa edə bilərik.
Tədbirdə Aydın Quliyev, Hikmət Babaoğlu, Umud Rəhimoğlu, Bəhruz Quliyev, Elçin Mirzəbəyli və digərləri çıxış edərək öz təəssüratlarını bölüşdülər.
İradə SARIYEVA
