"Bu mexanizmlər olmayanda, bir sıra hallarda, internet medianın statusu bəlli olmur"
"Hər iki qanuna dəyişiklik ümumən internet məkanımızda zəruri tənzimləməni aparmağa xidmət edir. Dəyişikliklər bu sahədə hüquqi tənzimləmə işlərinin aparılması ilə bağlı irəliyə doğru atılmış mühüm addımlardır. İnanıram ki, qanun layihələri parlamentin plenar iclasında qəbul olunacaq".
Bu sözləri Milli Məclisin deputatı, Azərbaycan Mətbuat Şurasının sədri Əflatun Amaşov "İnformasiya, informasiyalaşdırma və informasiyanın mühafizəsi haqqında" və "Telekommunikasiya haqqında" qanunlara təklif olunan dəyişiklikləri şərh edərkən deyib. Ə.Amaşov bildirib ki, hər iki layihədə nəzərdə tutulan dəyişikliklər ümumən internet məkanda görüləcək işləri tənzimləmək baxımından, bir növ, bir-birini tamamlayır. MŞ sədri fikirlərini konkret olaraq "İnformasiya, informasiyalaşdırma və informasiyanın mühafizəsi haqqında" qanun layihəsinin 2-ci maddəsi üzərində cəmləşdirib: "Həmin maddə qanun üzrə əsas anlayışları nəzərdə tutur. Burada mühüm əhəmiyyət daşıyan dəyişiklik qanuna internet informasiya ehtiyatı, internet informasiya ehtiyatının sahibi, domen adı, domen adının sahibi, internet provayder, host provayder, domen adlarının milli inzibatçısı, domen adlarının qeydiyyatçısı anlayışlarının əlavə edilməsidir. Bu qanunun 6-cı, 11-ci, 13-cü, 18-ci, 19-cu, 20-ci maddələrinin müxtəlif hissələrindəki dəyişiklik isə informasiyanın mülkiyyətçisi ilə yanaşı, onun sahibi məsələsini də hüquqi münasibətlər sisteminə daxil edir. Bütün bunlar ümumən internet məkanın idarə edilməsində məsuliyyəti ön plana çıxaran məsələlərdir. Dünyanın bir çox qabaqcıl ölkələrində bu yol gedilib".
Bütövlükdə, internet mediası ilə bağlı qanunda nəzərdə tutulan yenilikləri ekspertlər necə dəyərləndirir? Məsələyə münasibət bildirən "Xalq Cəbhəsi" qəzetinin baş redaktoru Elçin Mirzəbəyli nəzərdə tutulan yeniliklərə müsbət prizmadan yanaşdı: "Əflatun müəllim dəfələrlə internet mediası ilə bağlı hüquqi tənzimləmələrə ehtiyac olduğunu xüsusi vurğulayıb. Bu mexanizmlər olmayanda, bir sıra hallarda, internet medianın statusu bəlli olmur. Belə olanda da həmin mediaya daxil olanların hüquqi statusları aydın olmur ki, fors-major hallarda onlara qarşı hansı hüquqi addımlar atılsın. Bu baxımdan da həm internet medianın dəstəklənməsi, həm də bu medianın statusu ilə bağlı irəli sürülən yeniliklər təqdirəlayiqdir. Sözügedən təkliflər mövcud problemlərin aradan qaldırılmasına zəmin yaradır. O üzdən, birmənalı şəkildə təklifləri dəstəkləyirəm və hesab edirəm ki, bununla bağlı qanunda aparılan dəyişikliklər internet media sahəsində olan hüquqi proseslərin tənzimlənməsinə imkan yaradacaq".
Vidadi ORDAHALLI
