"Ötən il keçirilən referendumun nəticələrinə görə təsis edilən Azərbaycan Respublikasının Birinci vitse-prezidenti vəzifəsində, heç şübhəsiz, hamı Mehriban xanım Əliyevanı görürdü". Trend-in məlumatına görə, bunu Prezident Administrasiyası rəhbərinin müavini, Beynəlxalq əlaqələr şöbəsinin müdiri Novruz Məmmədov "Twitter" səhifəsində yazıb.
N.Məmmədov qeyd edib: "Əminəm ki, Mehriban xanım bu şərəfli və məsuliyyətli vəzifədə yeni-yeni uğurlara və nailiyyətlərə imza atacaq".
“Mehriban Əliyevanın Birinci vitse-prezident təyin olunması indiyədək öz təşəbbüsü ilə gördüyü işlər üçün məsuliyyətinin daha da artmasıdır”
“Mehriban xanım Əliyeva bu gün Azərbaycanda mədəniyyətin, turizmin inkişafı, Azərbaycanın dünyadakı imicinin gücləndirilməsi üçün çox işlər görür”. Bunu “İsrail-Azərbaycan” Assosiasiyasının baş direktoru Lev Spivak Mehriban Əliyevanın Azərbaycanın Birinci vitse-prezidenti təyin olunmasını şərh edərkən deyib.
L.Spivak qeyd edib ki, Mehriban Əliyevanın Azərbaycanın Birinci vitse-prezidenti təyin olunması mükafat deyil, indiyə qədər öz təşəbbüsü ilə gördüyü işlər üçün məsuliyyətinin daha da artmasıdır: “Onun bu vəzifəyə təyin olunması gördüyü işlərdə göstərdiyi səylərin təsdiqidir”.
“...ölkədə siyasi stabilliyi möhkəmləndirəcək”
“Mehriban Əliyevanın Azərbaycanın Birinci vitse-prezidenti təyin olunması ölkədə siyasi stabilliyi möhkəmləndirəcək və riskləri minimuma endirəcək”. Bunu isə Rusiya Prezidentinin səlahiyyətli nümayəndəsi, Rusiya İctimai Palatasının üzvü, politoloq Sergey Markov deyib.
Onun sözlərinə görə, bu təyinat dövlətçiliyin möhkəmləndirilməsi baxımından böyük əhəmiyyət daşıyır: “Daxili sistemdə hər hansı bir dəyişiklik baş verməyəcək. Mehriban Əliyeva həmişə ölkənin ictimai və siyasi həyatında fəal rol oynayıb”.
“Mehriban Əliyeva Birinci vitse-prezident vəzifəsində özünü görkəmli dövlət xadimi kimi göstərəcək”
Mehriban Əliyeva Azərbaycan dövləti və xalqı üçün çox işlər görüb və Birinci vitse-prezident vəzifəsində özünü görkəmli dövlət xadimi kimi göstərəcək. Bunu TASS agentliyinin baş direktorunun birinci müavini Mixail Qusman deyib.
O, Mehriban Əliyevanın ölkədə humanitar və ictimai sahələrdə iri layihələrin təşkil olunmasında vacib rolunu qeyd edib: "Eurovision", Avropa Oyunları, Formula 1 – bu siyahını uzatmaq olar. Heydər Əliyev Fondunun ölkənin sosial həyatının inkişafında, ehtiyacı olan insanlara yardım göstərilməsində də rolu böyükdür. Əminəm ki, Mehriban xanım sadəcə böyük ictimai xadim deyil, o, həm də Prezidentə ölkənin inkişafı üzrə strateji planların icra olunmasında yardım etməklə bu vəzifədə özünü görkəmli dövlət xadimi kimi göstərəcək”.
Onun sözlərinə görə, Milli Məclisin deputatı, Heydər Əliyev Fondunun prezidenti Mehriban Əliyevanın Birinci vitse-prezident təyin olunması ilə bağlı sərəncam verməklə Azərbaycan Prezidenti İlham Əliyev onun uzun illərdir ki, ölkənin ictimai və siyasi həyatında tutduğu yeri bir daha vurğulayıb.
M.Qusman qeyd edib ki, Mehriban Əliyevanın əvvəlki təcrübəsinə əsaslanaraq demək olar ki, o, yeni vəzifədə ilk növbədə ölkənin humanitar, mədəni və sosial inkişaf sahələri ilə məşğul olacaq.
“Mehriban Əliyeva dövlətə xidmətin yeni bir nümunəsini ortaya qoyacaq”
Prezident İlham Əliyevin sərəncamı ilə Azərbaycanın Birinci vitse-prezidenti təyin edilmiş birinci xanım, Heydər Əliyev Fondunun prezidenti, UNESCO-nun və ISESCO-nun xoşməramlı səfiri, Milli Məclisin deputatı Mehriban Əliyeva bu vəzifəsində öz potensialını daha geniş şəkildə səfərbər edərək dövlətimizə xidmət etməyin yeni bir nümunəsini ortaya qoyacaq və bu da hər bir kəs üçün örnək bir fəaliyyət olacaq. Bunu isə Milli Məclisin vitse-spikeri Bahar Muradova deyib.
Azərbaycanda vitse-prezidentlik institutunun yaradılmasını dövlət idarəçiliyi üçün faydalı sayan B.Muradova qeyd edib ki, artıq konkret olaraq, referendumun nəticələrindən irəli gələn addımlar atılır: “Bu müddət ərzində dəfələrlə bu sualla qarşılaşmışdıq ki, vitse-prezidentlər nə zaman təyin olunacaq və onlar kimlər ola bilər. Səslənən fikirlərin, verilən proqnozların arasında hər zaman əsas fikir o idi ki, Birinci vitse-prezident postuna ən layiqli namizəd Mehriban Əliyevadır. Çox gözəl oldu ki, Prezident bu gün hamının gözlədiyi bir qərarı verdi”.
Mehriban Əliyevanın ölkənin Birinci vitse-prezidenti təyin olunmasını dövlətin idarəçiliyi sahəsində mühüm və əhəmiyyətli qərar sayan B.Muradova hesab edir ki, Mehriban Əliyeva bu günə qədər bütün fəaliyyəti ilə Azərbaycan qadının adını ən yüksək pillələrə qaldırıb, Azərbaycan qadınlarının adını uğurla təmsil edib: “Onun uğuru Azərbaycanın uğurudur. Bu illər ərzində də əmin olmuşuq ki, Mehriban xanım fəaliyyət göstərdiyi bütün sahələrdə mütləq mənada uğura imza atır, ən gözəl olanını edir və bununla da hər kəsin diqqətini göstərdiyi fəaliyyətə cəlb edir. İnanıram ki, Mehriban Əliyeva Prezident İlham Əliyevin ona göstərdiyi bu etimadı doğruldacaq və vəzifəsini çox böyük uğurla yerinə yetirəcək, Prezidentin ölkəmizin inkişafı istiqamətindəki bütün fəaliyyətinə daha yaxından dəstək olacaq. Bu uğurlu tandem yeni dövr üçün Azərbaycana xidmətin yeni nümunəsini ortaya qoyacaq”.
“…tamamilə Azərbaycanın milli və dövlət maraqlarına cavab verən bir təyinatdır"
"Azərbaycan Prezidenti İlham Əliyevin 21 fevral 2017-ci il tarixli sərəncamı ilə Mehriban Arif qızı Əliyevanın Azərbaycan Respublikasının Birinci vitse-prezidenti təyin olunması tamamilə Azərbaycanın milli və dövlət maraqlarına cavab verən bir təyinatdır". Bunu isə millət vəkili, Milli Məclisin Əmək və sosial siyasət komitəsinin sədr müavini Rauf Əliyev deyib.
R.Əliyev qeyd edib ki, artıq Mehriban xanım Əliyeva uzun illərdir Azərbaycan Prezidenti İlham Əliyevlə birlikdə müasir Azərbaycan dövlətinin quruculuğunda yaxından iştirak edir: "Mehriban xanım Əliyeva Heydər Əliyev Fondunun prezidenti kimi, UNESCO-nun və ISESCO-nun xoşməramlı səfiri, Milli Məclisin deputatı kimi ona həvalə edilmiş bütün vəzifələri yüksək səviyyədə yerinə yetirir. Onun rəhbərlik etdiyi Heydər Əliyev Fondu yarandığı gündən etibarən Azərbaycanda təhsil, səhiyyə və digər sosial sahələrdə, yeni ümumtəhsil məktəblərinin, sağlamlıq imkanı məhdud uşaqlar üçün internat məktəblərinin, uşaq bağçalarının, xəstəxanaların tikilib istifadəyə verilməsi, əsaslı təmir olunaraq yenidən qurulması ilə əlaqədar genişmiqyaslı sosial layihələr həyata keçirib".
Millət vəkili xatırladıb ki, Mehriban xanım Əliyeva Milli Məclisin üzvü kimi dəfələrlə Amnistiya aktının qəbul edilməsi ilə bağlı Milli Məclisə müraciət etmiş və bu aktların qəbul edilməsi nəticəsində minlərlə məhkum azadlığa çıxmışdır: "Son illər Azərbaycanda keçrilən beynəlxalq miqyaslı tədbirlərin Təşkilat Komitəsinin sədri kimi fəaliyyəti onun yüksək təşkilatçılıq qabliyyətinin bariz nümunəsidir. Həm “Eurovision” mahnı müsaqibəsinin, həm də I Avropa Oyunlarının Təşkilat Komitəsinə rəhbərlik etməsi bu beynalxalq miqyaslı tədbirlərin uğurla başa çatdırılmasının başlıca amillərindən biri olmuşdur. Hər iki beynəlxalq tədbir ən yüksək səviyyədə keçirilmişdir. Bu yüksək təşkilatçılıq qabiliyyətinə görə Azərbaycan Prezidenti İlham Əliyev cənablarının 18.09.2015-ci il tarixli sərəncamı ilə IV Islam Həmrəyliyi Oyunlarının 2017-ci ildə Bakı şəhərində yüksək səviyyədə keçirilməsini təmin etmək məqsədilə Heydər Əliyev Fondunun prezidenti, Milli Olimpiya Komitəsi İcraiyyə Komitəsinin üzvü, UNESCO-nun və ISESCO-nun xoşməramlı səfiri Mehriban Əliyevanın sədirliyi ilə Təşkilat Komitəsi yaradılmışdır".
Onun sözlərinə görə, Mehriban xanım Əliyevanın bu günə qədər olan fəaliyyəti sübut edir ki, o, Azərbaycan Respublikasının Birinci vitse-prezidenti kimi möhtərəm prezidentimiz İlham Əliyev cənabları ilə birlikdə Azərbaycanın daha da sürətlə inkişaf etməsi istiqamətində apardığı şərəfli işi davam etdirəcək.
