"Kirpi" jurnalının baş redaktoru idi Polad Qasımov. Milli jurnalistikamızın ağsaqqallarından biri kimi söz sənətinin keşiyində dayanırdı. Sağlam tənqidi cəmiyyətin rəhni sayırdı qocaman jurnalist.
Azərbaycan Respublikası əməkdar mədəniyyət işçisi, əməkdar jurnalist və bir sıra fəxri adlara layiq görülən P.Qasımovun vəfatı mətbuat mənsublarını, ictimaiyyət nümayəndələrini, "Kirpi"nin daimi oxucularını dərindən sarsıdıb. Az qala hər gün üz-üzə gəldiyimiz, salamlaşdığımız Polad müəllimin vəfatı xəbəri həqiqətən də gözlənilməz oldu. Ömrünün 75-ci ilində haqqa qovuşan Polad müəllim özündən sonra böyük bir irs qoyub gedib. Tənqid jurnalistikasının önündə gedən Polad müəllim "ağlar güləyən" qələmi ilə "Kirpi"ni dilə gətirib. O, müsahibələrindən birində deyirdi: "Tənqid nöqsanları aradan qaldıran ən yaxşı vasitədir. Çox təəssüf ki, indi bəziləri tənqidlə təhqiri qarışdırır. Kiminsə şərəf və ləyaqətini təhqir etmək, ünvanına şər-böhtan söyləmək bağışlanmaz haldır və bu, jurnalistikadan xəbərsizlərin işidir".
1942-ci ildə Gədəbəy rayonunun Ataxal kəndində anadan olan P.Qasımov Azərbaycan Dövlət Universitetinin Jurnalistika fakültəsini bitirib. 1960-cı illərdən jurnalistika fəaliyyətinə başlayıb. O, "Azərbaycan pioneri", "Kommunist", "Abşeron" qəzetlərində, "Kirpi" jurnalında çalışıb. P.Qasımov 1995-ci ildən vəfatına qədər "Kirpi" jurnalının baş redaktoru vəzifəsində çalışıb.
Tanınmış jurnalist P.Qasımovun jurnalistikaya verdiyi töhfələr həm də onun çoxsaylı yetirmələridir. O, "Kirpi" jurnalına neçə-neçə peşəkar qələm sahibi cəlb edib, gənclərin "Kirpi" ənənələrini davam etdirməsinə çalışıb. P.Qasımov ustad qələm adamı olaraq, hər zaman sözü yerində, sərrast işlədib. Qələmindən qopan tənqid əhvalı insanları qıcıqlandırmayıb, əksinə, onları səhvlərini düzəltməyə vadar edib. Əlbəttə, bu, jurnalist üçün ən böyük uğur sayılıb həmişə.
P.Qasımov ömrünün 75-ci ilində dünyadan köçünü çəkib getdi. Özündən sonra silinməz izlər qoydu satirik jurnalistikada. Qələm adamları dünyadan köçsə də, özlərindən sonra qalanlar onların mənəvi ömrünü davam etdirir.
İradə SARIYEVA
