Dünən Azərbaycan Tibb Universitetində (ATU) Yeni Azərbaycan Partiyasının Nəsimi rayon təşkilatının ərazi dairəsi üzrə hesabat seçki yığıncağı keçirilib. Toplantının əvvəlində Azərbaycan uğrunda şəhid olanların xatirəsi 1 dəqiqəlik sükutla yad edilib.
Nəsimi rayonu üzrə YAP təşkilatının ATU nəzdindəki ilk ərazi təşkilatının sədri, tədris və müalicə işləri üzrə prorektor Sabir Əliyev rəhbərlik etdiyi təşkilatın yekun hesabatını iştirakçıların nəzərinə çatdırıb. Tədbirdə ATU-dan 250 nəfərin iştirak etdiyini vurğulayan prorektor S.Əliyev qeyd edib ki, YAP Nəsimi rayon təşkilatının ATU nümayəndəliyi xüsusi fəallığı ilə seçilir. ATU-nun YAP üzrə olan əməkdaşları bir çox toplantılarda iştirak edir. Ərazi üzrə partiya təşkilatın əməkdaşlarının sayı 1150-dən çoxdur. Bunlardan 406 nəfəri kişi, 557 nəfəri qadındır. Onlar arasında professorlar 96 nəfər, əməkdar elm xadimləri 28 nəfər, kafedra müdiri 55 nəfər, dosent və baş müəllim 402, assistentlər isə 238 nəfərdir.
Hesabat xarakterli çıxışdan sonra ATU üzrə YAP-ın ilk ərazi təşkilatının sədr seçkiləri baş tutub. Nəticədə ATU-nun tədris və müalicə işləri üzrə prorektoru Sabir Əliyev qurumun sədri seçilib. ATU-nun patoloji fiziologiya kafedrasının dosenti Sərdar Əliyev və universitetin beynəlxalq əlaqələr üzrə prorektoru dosent Nadir Zeynalov isə sədrin müavinləri seçilib.
Tədbirdə ATU-nun bir sıra tələbələrinə YAP-ın üzvlük vəsiqəsi təqdim edilib.
YAP Nəsimi rayon təşkilatının sədri, Milli Məclisin deputatı Məlahət İbrahimqızı çıxış edərək qeyd edib ki, ümummilli lider Heydər Əliyevin şəxsi qətiyyəti və iradəsi hesabına yaradılan və bu gün bütün regionda lider partiya olan YAP-ın yaradılmasının 25 illiyi respublikada təntənəli şəkildə qeyd edilir.
ATU-nun rektoru, professor Gəray Gəraybəyli çıxışında YAP-ın yaradılması və formalaşması dövrünə siyasi ekskurslar edərək deyib ki, bu gün ölkədə çoxlu partiyalar var. Buna baxmayaraq, YAP-ın istər daxili, istərsə də xarici siyasətini düzgün, peşəkar və düşünülmüş şəkildə aparması onu digərlərindən fərqləndirir". G.Gəraybəyli ATU tələbələrinin könüllü şəkildə YAP-a üzvlük üçün müraciət etməsinin sevindirici hal olduğunu qeyd edib.
Tədbirdə daha sonra ATU-nun İnsan anatomiyası kafedrasının müdiri professor Vaqif Şadlinksi, əczaçılıq texnologiyası və idarəçəliyi kafedrasının müdiri Məhbubə Vəliyeva, ATU-nun tibbi-profilaktika fakültəsinin dekanı dosent Aydın Məmmədov da çıxış edərək fikirlərini bildirlər.
Baki-xeber.com
