Mehman Muradlı: "Bu, sistemli və genişmiqyaslı hüquqi islahatların yeni mərhələsidir"
Prezident İlham Əliyevin penitensiar sahədə islahatlara dair son sərəncamı ölkə başçısının humanist siyasətinin növbəti təzahürü kimi qiymətləndirilir. Bu gün Azərbaycanda dövlət idarəçilik sisteminin müasirləşdirilməsi sahəsində ciddi tədbirlər həyata keçirilir. Bu istiqamətdə reallaşdırılan dövlət siyasəti həm də məhkəmə-hüquq sahəsində əsaslı pozitiv dəyişikliklərin baş verməsi ilə müşahidə olunur. Yeni fərman hüquq sahəsində aparılan yeni islahat dalğası kimi xarakterizə olunur.
Yeni dəyişikliklər indiyə kimi aparılan hüquqi islahatlardan nəyi ilə fərqlənəcək?
Hüquqşünas Mehman Muradlı qəzetimizə bildirdi ki, artıq xeyli müddətdir Azərbaycan köklü islahatlara start verib: "Sevindirici hal ondan ibarətdir ki, bu islahatlar məhdud bir çərçivə deyil, geniş bir spektri əhatə edir. Son sərəncam dövlət başçısının humanist siyasətinin növbəti təzahürü, həyata keçirilən sistemli və genişmiqyaslı hüquqi islahatların tərkib hissəsidir. Bu, eyni zamanda, cinayət təqibi və cəzaların icrası sahələrində hüquqi islahatların yeni mərhələsinin başlanğıcıdır. Çünki sözügedən sərəncam penitensiar sahənin inkişaf etdirilməsi və cəza siyasətinin humanistləşdirilməsi üçün proqram xarakteri daşımaqla, bu istiqamətdə fəaliyyət göstərən dövlət orqanları üçün "yol xəritəsi" olacaq.
Bu sahədə bütün problemlərin aradan qaldırılması üçün kompleks institusional, qanunverici və praktiki tədbirlər görüləcək. Sərəncamın məqsədi cəza siyasətinin humanistləşdirilməsi, cinayət-hüquq siyasətinin liberallaşdırılması və cinayətlərin dekriminallaşdırılmasıdır. Eyni zamanda, burada böyük ictimai təhlükə törətməyən və az ağır cinayətlərə görə həbs və azadlıqdan məhrumetmə tədbirlərinin tətbiqinin məhdudlaşdırılması da nəzərdə tutulur. Sərəncamdan irəli gələn məsələlərdən biri də penitensiar müəssisələrin fəaliyyətinin təkmilləşdirilməsi, onların maddi-texniki bazasının gücləndirilməsi, cəzanı icra edən orqan və müəssisələrdə mövcud olan nöqsanların aradan qaldırılması, cinayət təqibi və cəzaların icrası sahəsində korrupsiyanı istisna edən şəraitin təmin olunması, həmçinin, cinayət təqibi və cəzaların icrası sahəsində müasir texnoloji vasitələrin tətbiq edilməsidir. Hesab edirəm ki, sadaladığımız faktorlardan indiyə kimi aparılmayan kifayət qədər islahatlar arealı nəzərə çarpır. Fərqi bunda görürəm".
Məhəmmədəli QƏRİBLİ
