Xocalı faciəsinin baş verməsində müəyyən qədər pay həmin dövrdə Azərbaycana rəhbərlik edən adamların da üzərinə düşür. "Trend"in məlumatına görə, bu barədə respublika hərbi prokuroru Xanlar Vəliyev bildirib.
Hərbi prokuror xatırladıb ki, Xocalı faciəsi nəticəsində 613 nəfər azərbaycanlı qətlə yetirilib: "Amma o zamankı daxili işlər naziri və Azərbaycanın prezidenti Ayaz Mütəllibov məişət mübahisəsi zəminində cəmi iki nəfərin qətlə yetirildiyini demişdi".
"Təkcə aprel hadisələri deyil, ümumiyyətlə, hərbi hissələrdə istər öz hərbçilərimiz tərəfindən, istərsə də Ermənistan silahlı qüvvələri tərəfindən törədilən hər bir kriminal hadisə insanlıq əleyhinə olan hadisə kimi hərbi prokurorluq tərəfindən dərhal fiksə olunur" - deyən hərbi prokuror bildirib ki, hər hansı bir hadisə baş verən kimi hadisə yerləri müayinə olunur, cinayət işi başlanılır: "Aprel hadisələri ilə də bağlı cinayət işi başlanıb. Erməni silahlı qüvvələri tərəfindən qətlə yetirilmiş Azərbaycan əsgərlərinin meyitləri müayinə olunub, lazımi istintaq əməliyyatları aparılıb. Ermənistanın hərbi qüvvələri tərəfindən Azərbaycanın Tərtər rayonunun kəndinə beynəlxalq faktlarla istifadəsi qadağan olunmuş fosforlu mərmi atılıb. Bununla bağlı istintaq hərəkətləri aparılır. Xarici ölkələrin Azərbaycanda təmsil olunan diplomatik nümayəndəlikləri də orada iştirak ediblər".
X.Vəliyev bildirib ki, bu faktların beynəlxalq ictimaiyyətə çatdırılması istiqamətində də işlər aparılır.
Həmçinin, bir müddət əvvəl təmas xəttində ermənilər tərəfindən girov götürülmüş Bərdə rayon sakini Elnur Hüseynzadə ilə bağlı Respublika Hərbi Prokurorluğu araşdırmalara başlayıb. Xanlar Vəliyev deyib ki, onun sözlərinə görə, E.Hüseynzadə əvvəllər hərbidə xidmət edib: "Amma düşmən tərəfinə keçməzdən əvvəl hərbi xidmətdən tərxis olunması barədə əmri var. Bununla bağlı hazırda araşdırma aparılır".
Xanlar Vəliyev Azərbaycan Silahlı Qüvvələrində intihar hallarının sayının azaldığını da deyib.
O qeyd edib ki, intihar təkcə hərbi hissələrdə, Azərbaycanda yox, dünyanın hər yerində artıb: "Amma bizdə çox gözəl nəticədir ki, ildən-ilə Azərbaycan Silahlı Qüvvələrində və təkcə Müdafiə Nazirliyində deyil, digər silahlı birləşmələrdə də baş verən intihar hadisələrinin sayı hər il azalmaqda davam edir.
Bunun müxtəlif səbəbləri olur. Hərbi xidmətlə bağlı məsələlərlə də olur".
X.Vəliyev bildirib ki, bəziləri hərbi xidmətin gərginliyinə dözə bilmir: "Nizamnamə ilə tələb olunan hərəkətləri etmir, bir-birinə qarşı nizamnamədən kənar qanunsuz hərəkətlər törədirlər. Bəzi hadisələr isə ailə-məişət məsələləri ilə bağlı olur. Hərbidə baş verən hər bir intihar hadisəsi, ümumiyyətlə ölümlə nəticələnən hadisələr hərbi prokurorluq tərəfindən qeydə alınır və bu hadisələr üzrə cinayət işi başlanır, istintaq olunur. Həmin hadisələrdə hər hansı şəxsin günahı müəyyən olunursa, o, cinayət məsuliyyətinə cəlb olunur".
Baki-xeber.com
