Azərbaycanın işğal altındakı Qarabağ regionunda yaradılan qondarma rejimin “prezidentinin mətbuat xidmətinin” rəhbəri David Babayan Avropanı “Lapşin işi”nə seyrçi qalmaqda ittiham edib.
Ermənistanın NEWS.am saytına danışan Babayan deyib ki, əslində bununla Bakı Dağlıq Qarabağı informasiya blokadasında saxlamaq məqsədi güdür və Avropa da buna seyrçi qalır. Lapşinin Bakının “əcinnə ovu”nun qurbanı olduğunu deyən qondarma rejim sözçüsü bildirib ki, guya “Lapşin işi” ilə bağlı bütün proses kobud qanun pozuntuları ilə müşayiət olunub və Avropanı demokratik prinsiplərinə sadiq qalmağa çağırıb.
Əvvəla ondan başlayaq ki, sözügedən məsələdə Azərbaycanın tam qanuni hərəkət etməklə beynəlxalq hüququn bütün norma və tələblərinə əməl etdiyi ən müxtəlif səviyyələrdə etiraf olunub. Belə olmasaydı, Azərbaycan tək Ermənistanın deyil, bütün sivil dünyanın qınağına tuş gələrdi. Göründüyü kimi isə istər Lapşinin vətəndaşlığını daşıdığı Rusiya və İsrail, istərsə də digər ölkələr prosesi tam normal qarşıladı və məntiqi sonluğuna çatmasını da təmkinlə izləyir.
Babayanın açıqlamasında daha maraqlı məqam isə onun Belarus prezidenti Aleksandr Lukaşenko barəsində səsləndirdiyi fikirlərdir. O deyib ki, 2010-cu ildə Uşaq “Avroviziya” yarışmasında qalib olan Vova Arzumanyanı Lukaşenko, bilə-bilə ki, Dağlıq Qarabağdandır(?), şəxsən təbrik etdi. Maraqlıdır, insanların Qarabağdan olması nə zamandan qəbahət sayılıb və ya Azərbaycan nə zaman buna etiraz edib? Təbii ki, Babayan özü də bunu gözəl bilir. Onu da gözəl bilir ki, 20 ildən çoxdur aparılan danışıqlarda Azərbaycan heç bir vəchlə Qarabağda erməni icmasının yaşamasına etiraz etməyib, haqlı olaraq azərbaycanlı icmasının oradan – öz doğma yurd-yuvasından didərgin salınmasına etiraz edib və etməkdədir. Sadəcə, burada ermənilərin məqsədi yenidən özünü dünyaya “əzabkeş millət” olaraq sırımaqdır. Çünki yaxşı bilirlər ki, beynəlxalq hüquq “Lapşin işi”ndə onlara söz haqqı tanımır. Yəni on illərlə işğal altında saxlasan da, o torpaqlar sənin deyilsə, ora kimlərin ayaq basa biləcəyinə bu torpaqların əsl sahibi qərar verə bilər və bunun alternativi yoxdur. İndi belə görünür ki, “nala-mıxa” vurmaqla əslində ermənilər yeni bir oyuna başlamaq ərəfəsindədir. Boşboğazlığa söykənən bu oyunun perspektivsizliyi isə elə indidən bəllidir...
Samirə
