Elman Məmmədov: "Enerji daşıyıcılarının ödəniş qaydalarında məcburi köçkünlərin xeyrinə belə addımın atılması vacib məsələdir"
Bəhruz Quliyev: "Əbəs deyil ki..."
Xəbər verildiyi kimi, Prezident İlham Əliyevin imzaladığı "Məcburi köçkünlər və onlara bərabər tutulan şəxslər üçün vahid aylıq müavinətin müəyyən edilməsi haqqında" Fərmana dəyişiklik edilib.
Dəyişikliyə əsasən, fərdi qaydada sayğacların quraşdırılması və texniki istismarı mümkün olmayan, sıx müvəqqəti məskunlaşma yerlərində (keçmiş yataqxana, müalicə pansionatları) yaşayan məcburi köçkünlərin fərdi qaydada sayğacların quraşdırılması və texniki istismarı mümkün olan yeni yaşayış sahələrinə köçürülməsinədək onların istifadə etdikləri təbii qaz, elektrik enerjisi, su və məişət tullantılarına görə bütün haqlar 2017-ci il 1 yanvar tarixinədək dövlət hesabına ödəniləcək. Fərmanda nəzərdə tutulmuş məcburi köçkünlər və onlara bərabər tutulan şəxslər üçün vahid aylıq müavinətin məbləği 2017-ci il 1 fevral tarixindən 20 manat məbləğində müəyyən edilir.
Fərmanda Nazirlər Kabinetinə tapşırılır ki, fərdi qaydada təbii qazla təmin olunmayan, sıx müvəqqəti məskunlaşma yerlərində yaşayan məcburi köçkünlər və onlara bərabər tutulan şəxslərin istehlak olunan elektrik enerjisi üzrə limiti üç gün müddətində müəyyən edilsin.
Üstəlik, Nazirlər Kabineti fərmanın 3.1-ci bəndində nəzərdə tutulan yerlərin qazlaşdırılması ilə bağlı təkliflərini on beş gün müddətində Prezidentə təqdim etməlidir.
Sənəddə Qaçqınların və Məcburi Köçkünlərin İşləri üzrə Dövlət Komitəsinə də bir sıra tapşırıqlar verilib.
Prezidentin bu humanist addımına münasibət necədir?
Məsələyə münasibət bildirən millət vəkili Elman Məmmədov buna müsbət prizmadan yanaşdı. Onun fikrincə, ölkə başçısının imzaladığı fərman məcburi köçkünlər tərəfindən müsbət qarşılanıb: "Yataqxana və pansionatlarda məskunlaşan məcburi köçkünlərin kommunal xidmət haqlarının yeni yaşayış sahələrinə köçürülənədək dövlət hesabına ödənilməsi ilə bağlı fərman Prezident İlham Əliyevin məcburi köçkünlərin problemlərinin həllinə diqqət və qayğısının növbəti təzahürüdür. Cənab Prezident aztəminatlı əhalinin, qaçqınların və məcburi köçkünlərin problemlərini diqqətdə saxlayır və onların sosial müdafiəsinin yaxşılaşdırılması üçün mütəmadi olaraq tədbirlər görür. Ötən 10-15 gün ərzində məcburi köçkünlər arasında müəyyən anlaşılmazlıq, narazılıq var idi. Bunlar cənab Prezidentə çatdırılan kimi həmin problemləri dərindən araşdırıb təcili tədbirlər gördü. Enerji daşıyıcılarının ödəniş qaydalarında məcburi köçkünlərin xeyrinə belə addımın atılması vacib məsələdir. İctimai yerlərdə yaşayan məcburi köçkünlər sayğaclaşma məsələsinə başqa cür yanaşırdı. Bu fərman və bundan öncə verilən fərmanların hamısı əhalinin sosial müdafiəsinin gücləndirilməsi, onların rifah halının yaxşılaşdırılmasına yönəlib. Bütün məcburi köçkünlər adından Prezidentə minnətdarlığımızı bildirirəm".
Bəzi məcburi köçkünlərin yeni yaşayış sahələrinə köçürülənədək kommunal xidmət haqlarının dövlət hesabına ödənilməsi ilə bağlı Prezident İlham Əliyevin imzaladığı fərman məcburi köçkünlər tərəfindən rəğbətlə qarşılanıb.
"Trend"ə açıqlamasında Ağdam rayon İcra Hakimiyyətinin başçısı Raqub Məmmədov deyibki, bu fərman bir daha sübut etdi ki, Prezident İlham Əliyev əhalinin, xüsusən də məcburi köçkünlərin problemlərini daim diqqətdə saxlayır və bu problemlərin həllinə çalışır: "Cənab prezidentin bu addımı məcburi köçkünlərə diqqət və qayğısının növbəti təzahürüdür. Bu fərman məcburi köçkünlər tərəfindən yüksək səviyyədə qiymətləndirilir, onlar dövlət başçısına təşəkkürlərini bildirirlər. Hazırda həmin kateqoriyaya aid olan ərazilərin müəyyənləşdirilməsi ilə məşğuluq, əhali ilə görüşürük. Bu, məcburi köçkünlərin indiki vəziyyətində vaxtında verilmiş qərardır".
"Ekspert Bəhruz Quliyev isə agentliyə bildirib ki, bu mühüm dövlət sənədinin imzalanması bir daha sübut edir ki, Azərbaycan Prezidenti ölkə vətəndaşlarının sosial rifahının yaxşılaşdırılmasını, xüsusən də məcburi köçkünlərin vəziyyətini hər zaman diqqət mərkəzində saxlayır, onların problemlərinə həssaslıqla yanaşır: "Həmçinin Prezident İlham Əliyevin məlum fərmanı ilə məcburi köçkünlərin sosial müdafiəsi daha dəqiq mexanizmlə təmin olunacaq, güclənəcək və sosial müdafiənin ünvanlılıq prinsipi həllini tapacaq. Belə ki, fərmana əsasən, məcburi köçkünlərin kompakt şəkildə müvəqqəti məskunlaşdığı ərazilərdə qazlaşdırma və sayğaclaşma mümkün olmadığı halda, kommunal xidmətə görə ödənişlər 1 fevral 2017-ci il tarixindən dövlət hesabına mərkəzləşdirilmiş qaydada həyata keçiriləcək. Bu norma isə məcburi köçkünlər yeni yaşayış sahələrinə köçdükləri günə qədər qüvvədə qalmaqda davam edəcək. Yəni onlar fevral ayından etibarən əvvəli qaydada 20 AZN müavinət alacaqlar. Bütövlükdə isə burada əsas faktorlardan biri də Prezident İlham Əliyevin daim insan amilinə diqqət yetirməsidir ki, hər bir Azərbaycan vətəndaşı bu diqqəti öz üzərində hiss edir və alqışlayır".
Ekspert əlavə edib: "Əbəs deyil ki, ölkə başçımız mütəmadi olaraq qaçqın və məcburi köçkünlərlə bağlı əhəmiyyətli fərmanlar imzalayır, onların həyat və məişətlərinin, sosial vəziyyətlərinin təminatının daha da yaxşılaşdırılması istiqamətində işlər aparır. Bütün bu kimi əhəmiyyətli məqamlara diqqət yetirərkən, biz bir daha əmin oluruq ki, atılan addımlar, dövlət başçımızın reallaşdırdığı tədbirlər planı 2017-ci ildə də Prezidentin diqqəti mərkəzində olacaq və insanlarımız aparılan davamlı və təməlli islahatların səmərəsini, uğurunu hiss edəcək.
Biz həm də inanırıq ki, Ali Baş Komandan, Prezident İlham Əliyev cənablarının yürütdüyü qətiyyətli, prinsipial siyasəti nəticəsində işğal altındakı torpaqlarımız düşməndən təmizlənəcək, qaçqın və məcburi köçkünlərimiz yaxın vaxtlarda öz doğma yurd-yuvalarına geri dönəcək".
"Trend"ə Milli Məclisin deputatı Fəzail Ağamalı isə deyib ki, Prezident İlham Əliyevin siyasətinin mərkəzində xalqımızın, eyni zamanda qaçqın və məcburi köçkünlərin yüksək həyat şəraitinin yaradılması dayanır: "Dövlət başçısı hər zaman qaçqın və məcburi köçkünlərin və onlara bərabər tutulan şəxslərin həyat səviyyəsinin yüksəldilməsinin qayğısına qalır. Onlar öz doğma yurdlarına qayıdana qədər də bu tədbirlər davam etdiriləcək. Ümidvaram ki, ölkə prezidentinin bu fərmanı qaçqınların problemlərinin həllinə ciddi təsir göstərəcək".
Deputat əlavə edib ki, bu fərman həmçinin, məcburi köçkünlərə ayrılan vəsaitin təyinatı üzrə sərf olunması üçün ciddi əhəmiyyət kəsb edir.
Vidadi ORDAHALLI
