Rusiya səfiri: "Dağlıq Qarabağ münaqişəsinin həlli ilə daha ciddi məşğul olmalıyıq"
Bolqarıstan səfiri: "Cocuq Mərcanlıda bir neçə il sonra daha çox insanın yaşayacağına ümid edirik"
Xarici ölkələrin Azərbaycanda akkreditə olunmuş diplomatik nümayəndələrinin və beynəlxalq təşkilatların rəhbərlərinin Cəbrayıl rayonunun işğaldan azad edilmiş Cocuq Mərcanlı kəndinə səfəri təşkil olunub.
Qaçqınların və Məcburi Köçkünlərin İşləri üzrə Dövlət Komitəsindən verilən məlumata görə, nümayəndə heyəti Cocuq Mərcanlıda həyata keçirilən yenidənqurma və tikinti işləri ilə yaxından tanış olub.
Baş nazirin müavini, Qaçqınların və Məcburi Köçkünlərin İşləri üzrə Dövlət Komitəsinin sədri Əli Həsənov işğal altında qaldığı müddətdə ermənilərin Cocuq Mərcanlıda törətdikləri vəhşiliklər, eləcə də Azərbaycan Prezidentinin sərəncamı ilə hazırda burada görülən bərpa işləri barədə 55 nəfərlik nümayəndə heyətinə ətraflı məlumat verib.
Ə.Həsənov xarici qonaqlara, 4 ay işğal altında qalmasına baxmayaraq, ermənilərin Cocuq Mərcanlıda böyük dağıntılar törətməsindən danışıb. Erməni vandalizminə diqqət çəkən Komitə sədri ermənilərin uzun illər Lələtəpə yüksəkliyindən kəndi atəş altında saxladığını bildirib.
Ə.Həsənov ölkə Prezidentinin fərmanına əsasən kənddə salınacaq yeni yaşayış massivi üçün nəzərdə tutulan 10 hektar ərazinin 60 faizində minadan təmizlənmə işləri aparıldığını diqqətə çatdırıb. Ə.Həsənov bu zaman su quyusundan 5 ədəd partlamamış minaatan mərmisi aşkarlandığını da diqqətə çatdırıb.
Ə.Həsənov bildirib ki, Cocuq Mərcanlı kəndində yaxın zamanlarda 150 evlik yeni qəsəbənin tikintisinə başlanacaq. O deyib ki, qəsəbədə təhsil, səhiyyə, mədəniyyət ocaqları da inşa olunacaq.
Ə.Həsənov "Azərbaycanda işğaldan azad olunan kəndlərə qayıdış başlayıb, ermənilər isə Qarabağdan kütləvi köç edir", deyə bildirib. Sonra qonaqlar ANAMA-nın brifinq sahəsini gəziblər. Diplomatlara kəndin coğrafi mövqeyi barədə məlumat verilib. Xüsusi hazırlanan ərazidən keçən xarici nümayəndələr kənddə inşa olunacaq məktəb binasının bünövrəsinin qazılması prosesilə tanış olub. Daha sonra diplomatlar Cocuq Mərcanlıda yaşayan Həziyevlər ailəsinə baş çəkib.
Qeyd edək ki, səfər Prezident İlham Əliyevin yanvarın 30-da regionların 2014-2018-ci illərdə sosial-iqtisadi inkişafı Dövlət Proqramının icrasının üçüncü ilinin yekunlarına həsr olunmuş konfransda verdiyi tapşırıqlara uyğun olaraq təşkil edilib.
"Bütün səfirlər buradadır, yalnız 5-6 səfir gələ bilməyib. Onların bəziləri üzrlü səbəbdən burada deyil. ABŞ səfiri, bir də Qızıl Xaç Komitəsinin Bakıdakı nümayəndəliyinin rəhbəri gəlməyib. Təəssüf edirəm ki, onlar burada deyillər". APA-nın xəbərinə görə, bunu da Əli Həsənov deyib.
"ABŞ səfiri ölkədədir, Qızıl Xaç Komitəsi isə belə izah edib ki, guya nizamnaməsinə görə onlar belə tədbirlərdə iştirak edə bilmirlər. Belə nizamnaməyə inanmıram. Halbuki, onlar cəbhə bölgəsinə getmələri üçün dəfələrlə bizə müraciət edir. Biz bəzən icazə veririk, bəzən isə yox. Amma onlar həmişə cəbhə xəttində olmaq istəyirlər. Cənab Prezidentin məqsədi bu idi ki, xarici ölkələrin səfirləri, beynəlxalq təşkilatlar - Avropa Şurası, Avropa İttifaqı və ATƏT nümayəndələri ermənilərin 4 ay işğalda olan bir yaşayış məntəqəsini nə hala saldıqlarını öz gözləri ilə görsünlər. Bunu ATƏT-in faktaraşdırıcı missiyası da təsdiqləyib. Amma bir var kağız üzərində olsun, bir də var gözləri ilə görsünlər", - deyə o vurğulayıb.
"Bizim səfərimiz bir tərəfdən professional xarakter daşıyır, burada informasiya alırıq, amma digər tərəfdən bunun emosional tərəfləri də var". Bu sözləri bir qrup səfir və beynəlxalq təşkilat nümayəndələri ilə Cəbrayıl rayonunun Cocuq Mərcanlı kəndinə səfər edən Rusiyanın Azərbaycandakı səfiri Vladimir Doroxin deyib. O bildirib ki, münaqişə barədə kağızlardan oxumaq və ya çıxışları dinləməkdən fərqli olaraq, orada öz gözləri ilə hər şeyi görür, insanlarla danışırlar: "Bu, təbii bir daha o mesajı verir ki, biz münaqişənin həlli ilə daha ciddi məşğul olmalıyıq. Rusiya ATƏT-in Minsk Qrupunun həmsədri kimi çox iş görür və biz digər həmkarlarımızla birlikdə bunu etməyə davam edəcəyik".
"Burada bir ailə ilə tanış olduq. Onlar uzun illərdir bu ərazini tərk etmir. Bu bir daha onların Azərbaycan torpağına, ərazisinə sevgisini göstərir". Bunu isə Bolqarıstanın Azərbaycandakı səfiri Mariya Xristova deyib. O bildirib ki, həmin vətənpərvərlik ruhunu Cocuq Mərcanlıda hiss etdilər: "Biz Azərbaycana hər şeyin ən yaxşısını diləyirik və arzu edirik ki, bu yerlərdə bir neçə il sonra daha çox insan yaşasın, uşaq bağçaları olsun. Ölkə Prezidenti də bu barədə tədbirlər planı müəyyən edib. Bizi bunun effektinə inanırıq. Təşəkkür edirəm ki, bizi buraya gətiriblər".
Xəbər "Trend" və APA agentliklərinin məlumatları əsasında hazırlanıb.
Baki-xeber.com
