Rusiya Xarici İşlər Nazirliyi Azərbaycanda həbsdə olan digər Rusiya vətəndaşı Marat Ueldanov ətrafında yaranan vəziyyətə münasibət bildirib.
APA-nın Moskva müxbirinin verdiyi məlumata görə, Rusiya XİN-in rəsmi nümayəndəsi Mariya Zaxarova M. Ueldanovun istintaqının davam etdiyini söyləyib: "O, əvvəlki kimi Azərbaycan Dövlət Təhlükəsizlik Xidmətinin istintaq təcridxanasında saxlanılır. Rusiyanın Azərbaycandakı səfirliyinə daxil olan məlumata görə, Marat Ueldanovun saxlanma şəraiti Avropa standartlarına cavab verir. Ueldanovun sağlamlıq vəziyyəti ümumilikdə qənaətbəxşdir. Onun səhhətinin pisləşdiyi barədə bir çox məlumat yayılıb, ona görə də biz xüsusi olaraq bu məlumatları yoxladıq. Yazılanlar doğru deyil. Rusiya vətəndaşı tibbi yardım alır. Əlimizdə bunları təsdiq edən materiallar var. Vətəndaş Ueldanova dövlət tərəfindən vəkil təyin olunub. İlkin istintaq zamanı o, özü bu vəkili seçib”.
M. Zaxarova qeyd edib ki, Azərbaycan tərəfi ilə bu məsələyə dair müxtəlif səviyyələrdə danışıqlar aparılır: “Bakıdakı Rusiya səfirliyinə bu məsələni xüsusi nəzarətdə saxlamaq və yeni məqamlar barədə dərhal məlumat vermək tapşırılıb. Nəzərinizə bir məqamı da çatdırmaq istəyirəm ki, səfirliyimizin əməkdaşlarının indiyədək Ueldanova baş çəkməməsi ilə bağlı məlumatlar da yalandır. Rusiya səfirliyinin əməkdaşları vətəndaş Ueldanova iki dəfə baş çəkiblər: ötən il iyulun 28-də və dekabrın 16-da. Axırıncı görüş iki saat çəkib. Növbəti görüşə hazırlıq gedir. Xahiş edirik ki, bu məsələnin həssaslığını nəzərə alaraq doğru olmayan məlumatı yaymamaqdan ötrü bizimlə əlaqə saxlayasınız".
Qeyd edək ki, 2016-cı il iyulun 28-də Bakıda Rusiya vətəndaşı Marat Ueldanov saxlanılıb. Ona qarşı narkotik maddələrin qanunsuz dövriyyəsi ittihamı irəli sürülüb. Bundan sonra Ermənistan mətbuatı və Rusiyadakı ermənipərəst KİV-lər M. Ueldanovun bacısı Marianna Mirzoyana istinadən məlumat yayıblar ki, guya M. Ueldanov erməni olduğuna görə saxlanılıb. Bacısının dediyinə görə, Marat həyat yoldaşının soyadını götürüb: “Onun əsl soyadı Qalustyan olub. Bakıda guya o, erməni olduğuna və Ermənistana casusluq etdiyinə görə həbs edilib”.
M. Zaxarova Aleksandr Lapşinin Azərbaycana ekstradisiya edilməsinə də yenidən münasibət bildirib. Zaxarova Belarus tərəfinə Rusiya vətəndaşının üçüncü ölkəyə ekstradisiyasının yolverilməzliyi barədə mövqelərinin dəfələrlə çatdırılıdığını söyləyib.
"Nəzərinizə çatdırım ki, Aleksandr Lapşin həm Rusiya və həm də İsrail vətəndaşıdır. Rusiya səfirliyinin nümayəndələri fevralın 9-da təcridxanada Lapşinə baş çəkiblər. Rusiyalı diplomatlarla görüş zamanı Lapşin saxlanma şəraiti ilə bağlı heç bir şikayət etməyib. Səfirliyimiz Azərbaycanın hüquq-mühafizə orqanları ilə, Baş Prokurorluq, Azərbaycan XİN, o cümlədən İsrailin bu ölkədəki səfirliyi ilə daim təmasdadır. Səlahiyyətimiz çərçivəsində Rusiya vətəndaşının bütün hüquqlarını müdafiəsini təmin etmək üçün mümkün tədbirləri görür, məsələni nəzarətdə saxlayırıq. Hazırda Lapşinə yüksək ixtisaslı vəkil yardımı göstərilir. Qarşıda məhkəmə prosesi var. Mətbuatdan xahiş edirik ki, yoxlanılmamış məlumatları dərc etməsin. Biz bundan sonra da sizi məlum məsələ ilə bağlı məlumatlandıracağıq".
“Yaxın vaxtlarda Rusiya və Azərbaycan xarici işlər nazirləri arasında təmas qurulacaq”. Bunu da M. Zaxarova deyib. O qeyd edib ki, fevralın 21-22-də Moskvada Rusiya və Ermənistan xarici işlər nazirlərinin görüşündə Dağlıq Qarabağ münaqişəsinin nizamlanması müzakirə ediləcək.
M.Zaxarovanın sözlərinə görə, tezliklə Azərbaycan tərəfi ilə də müvafiq səviyyədə təmas qurulacaq.
XİN rəsmisi fevralın 17-19-da keçiriləcək Münhen Təhlükəsizlik Konfransı çərçivəsində Dağlıq Qarabağ üzrə görüşlə bağlı razılığı təsdiq etməyib: "Hələ belə razılıq əldə olunmayıb".
Xəbər Trend və APA agentliklərinin məlumatları əsasında hazırlanıb.
Baki-xeber.com
