“Almaniya özünün əsas və ümidverici partnyorlarından biri olaraq Azərbaycanı çox dəyərləndirir və biz əlimizdən gələn hər şeyi edirik ki, bu ölkənin yaralı yeri olan Dağlıq Qarabağ münaqişəsi öz ədalətli həllini tapsın”.
Bu sözləri Almaniya nümayəndə heyətinin rəhbəri Doris Barnet qurumun Berlində Cənubi Qafqazda stabillik və təhlükəsizlik mövzusunda keçirdiyi simpoziumda deyib.
Xanım Barnet bildirib ki, ATƏT-ə sədrliyi dövründə AFR münaqişə tərəflərinin bir araya gətirilməsi və danışıqların aparılması yönündə ciddi səy göstərib. Onun sözlərinə görə, Azərbaycan və Ermənistan vaxtilə qatı düşmən olmuş Almaniya ilə Fransa arasındakı bugünkü müttəfiq münasibətlərindən ibrət götürərək münaqişənin sülh yolu ilə həllinə cəhd edə bilər. Qarabağda artıq qanın axmamalı olduğunu deyən Bundestaqın deputatı onu da əlavə edib ki, Azərbaycan və Ermənistan isə əksinə, heç bir kompromisə gəlmək fikrində deyil, hətta hər iki ölkə ordusunu gücləndirməklə məşğuldur. Müqayisənin əsas qüsurlu tərəfi isə işğala məruz qalan Azərbaycanın işğalçı Ermənistanla "tərəzinin eyni gözünə" qoyulmasıdır.
Ümumiyyətlə, Barnetdən başqa da bir sıra siyasətçilər Ermənistan-Azərbaycan münaqişəsinin həllindən danışarkən məhz Almaniya ilə Fransa arasındakı örnəyə diqqət çəkir. Lakin bu halda unudurlar ki, alman-fransız münasibətlərinin yoluna qoyulması yalnız nasist Almaniyasının tam çöküşündən sonra mümkün oldu. Belə ki, Üçüncü Reyxin süqutundan sonra Almaniya işğal etdiyi Elzas və Lotaringiyanı Fransaya qaytardı və yalnız bundan sonra iki ölkə arasında dostluq bağlarının qurulmasından danışmaq mümkün oldu. Buna qədər isə Almaniya Fransa üçün işğalçı və aqressor dövlət olaraq qalmaqda idi. O üzdən yaxşı olar ki, Dağlıq Qarabağ münaqişəsinin həllində maraqlı olan, bu həllə öz töhfəsini vermək istəyən dövlətlər və ya təşkilatlar Almaniya-Fransa yaxınlaşması kimi məsələləri misal göstərərkən bu modelin hərtərəfli tətbiqinə də çağırış etsinlər.
Elə Azərbaycanın da tələbi işğal edilmiş torpaqlarının qaytarılması deyilmi?
Samirə
