Məlum olduğu kimi, bu il aprelin 23-də Fransada prezident seçkiləri keçiriləcək. Bununla bağlı bu ölkədəki erməni lobbisi artıq hərəkətə keçib.
Belə ki, fevralın 8-də Fransadakı erməni təşkilatlarının koordinasiya şurası geniş tərkibdə nahar təşkil edib. Nahara, ifrat sağçı və ifrat solçu namizəddən (Marin le Pen və Jan-Lyuk Melanşon) başqa bütün prezidentliyə namizədlər dəvət olunub, lakin təkcə sosialist Benua Amon gəlib.
Erməni mətbuatının xəbərlərində deyilir ki, sözügedən nahara nazirlər, deputatlar, senatorlar, hətta hazırkı prezident Fransua Olland da gəlib. Xəbəri yazan erməni saytı nahardan bəhs edərkən maraqlı nüansa diqqət çəkir. Bildirir ki, Fransa prezidentliyinə sosialist namizəd Benua Amon ziyafətdə çıxış edərək, erməni icmasının Fransanın istər sosial-mədəni, Istərsə də siyasi həyatında önəmli rol oynadığını bildirib və bu zaman onunla üzbəüz oturan Fransua Ollanda... göz vurub. Lakin gecənin başlıca intriqası ermənilərin prezidentliyə ən şanslı namizəd saydığı və səs verməyə hazırlaşdığı Fransua Fiyonun tədbirə gəlib-gəlməyəcəyilə bağlı olub. Bütün gözləntilərə rəğmən isə o, nahara təşrif gətirməyib. Bu da naharın təşkilatçılarını ciddi şəkildə məyus edib.
Bəllidir ki, Fransanın erməni icmasının əsas hədəfi yeni seçiləcək prezidentdən qondarma “erməni genosidi” ilə bağlı “sərfəli” vədlər almaqdır. Sözügedən naharın təşkili də əslində bu məqsədə xidmət olub, lakin ümid bağladıqları Fiyonun təşrif buyurmaması ermənilərin arzusunu gözündə qoyub. Koordinasiya Şurasının başçılarından olan Frank Papazyan təəssüflə bildirib ki, bu nahar “genosid və Dağlıq Qarabağ problemlərinin diqqətə çatdırılması üçün çox yaxşı fürsət idi”.
Xatırladaq ki, erməni icması 2012-ci ildə açıq şəkildə Fransua Ollandın namizədliyini dəstəkləyib və ondan qondarma “genosid”lə bağlı vəd alıb. Lakin sonradan onların istəyi gerçəkləşməyib. Belə ki, sağçı deputat Valeri Buayenin “erməni genosinin” inkarının cinayət məsuliyyəti yaratması təklifi parlamentdə iki dəfə səsvermədən keçsə də, Konstitusiya Şurası onu təsdiqləməyib və beləliklə də Olland dönəmində həmin təklif tarixin arxivinə atılıb. Bu mənada fevralın 8-də təşkil edilən ziyafət əslində Fransanın erməni icması üçün “ölüm-qalım” məsələsi idi. Burada onlar Fiyondan, prezident seçilərsə, həmin mənfur təklifin “xortladılmasını” xahiş edəcəkdilər.
Əslində Fransua Fiyon hələ praymerizə qədər ermənilərin simpatiyasını qazana bilib. Belə ki, o, prezident olarsa, Suriya münaqişəsi kontekstində Yaxın Şərqdəki xristianlara yardım əlini uzadacağını vəd edib. Həmin regionda isə ermənilərin çoxluq təşkil etdiyi faktdır. Lakin təbii ki, erməni icması bununla kifayətlənmək fikrində deyil. Onlara konkret “genosid” və Qarabağ vədi verilməlidir. Fransua Fiyonun nahara gəlməməsi və günlər öncə dəvət olunmasına baxmayaraq, nahara cəmi 2 saat qalmış gəlməyəcəyini bildirməsi təşkilatçıları ciddi şəkildə məyus etməklə həm də çətin sual qarşısında qoyub: kimə səs verməli?
Samirə
