Beynəlxalq ictimai-siyasi jurnal olan "Tarixi şəxsiyyətlər" özünün 36-cı sayı ilə oxucularının görüşünə gəlib. Yeri gəlmişkən xatırladım ki, jurnalın bundan öncəki sayı Türkiyəyə, onun prezidentinə və dövlətinə həsr edilmişdir. öz prinsiplərinə sadiq qalan "Tarixi şəxsiyyətlər" bu dəfə də bizə yaxın olan dövlətlərdən birinə, yəni Əfqanıstana həsr edilibdi.
Maraqlıdır ki, elə ilk səhifəsindən başlayaraq Əfqanıstan barəsində geşin məlumat verən jurnal bu ölkənin tarixini, siyasətini, bugününü və bizimlə əlaqələrini maraqlı faktlar, fotolar vasitəsilə sərgiləyir. İlk səhifəsi Əfqanıstan İslam Respublikasının Azərbaycandakı fövqəladə və səlahiyyətli səfiri Muhəmməd Taqı Xəlilinin müraciətilə başlanan jurnalda Azərbaycan-Əfqanıstan əlaqələrinə geniş yer ayrılıb. Bu əlaqələrin tarixi kökləri istər coğrafi, istər də iqtisadi-siyasi baxımdan şərh edilibdi. Jurnaldakı fotolar, Əfqanıstanın xəritəsi, bu ölkənin gerbi və himni, eləcə də 1919-1926-cı illərdə Əfqanıstanın əmiri olmuş Əmənulla xanın bioqrafiyası oxucu diqqətinə çatdırılır.
Mənim üçün maraqlı olan məqamlardan biri Azərbaycan Prezidentinin Əfqanıstan prezidenti Muhəmməd Əşrəfini öz iqamətgahında qəbul etməsi və bu məqamların foto görüntüləridi. Həmin görüş və imzalanan görüş barəsində tarixi şəxsiyyətlər oxuculara kifayət qədər bilgi verir. Həmçinin Əfqanıstanın Milli Günü ilə bağlı Azərbaycanın Mədəniyyət və turizm naziri Əbülfəz Qarayevin iştirakı ilə bağlı keçirilən bayram tədbirinin təəssüratı da jurnalda yer alıbdı. Yeri gəlmişkən xatırladım ki, jurnaldakı materialların müəyyən hissəsi rus dilində çap olunub. Təbii ki, bu da həm jurnalın beynəlxalq əlaqələrinin, həm də onun mövzsunun tələblərindən irəli gəlir. Ümumiyyətlə, jurnalın bu sayında Əfqanıstanla bağlı kifayət qədər bilgi var. Həmçinin bu ölkədə xidmət keçmiş Azərbaycan vətəndaşlarının xatirələri, eyni zamanda Azərbaycan-Əfqanıstan Veteranları Birliyinin sədri Məhəmməd Vəliyevin təəssüratları da maraqlı məqamlardandır. Düşünürəm ki, jurnalın bu sayı da oxucuların diqqətini çəkəcəkdi və onu araya-ərsəyə gətirən baş redaktor Xəlil Qarəhmədovun əməyi oxucuların diqqətindən kənarda qalmayacaqdı.
Əbülfət MƏDƏTOĞLU
