Vamiq Şükürov: "Diplomatik müstəvidə bunun faydası ola bilər"
2016-cı ilin aprel döyüşləri ilə bağlı Azərbaycandan Avropa İnsan Haqları Məhkəməsinə 700 ərizə göndərilib və həmin işlər artıq icraata götürülüb. Xəbər verildiyi kimi, bu barədə Azərbaycan Prezidenti Administrasiyasının Hüquq-mühafizə orqanları ilə iş şöbəsinin İnsan hüquqlarının müdafiəsi məsələləri sektorunun müdiri Çingiz Əsgərov Milli Məclisdə "Beynəlxalq cinayətlərin qarşısının alınması və onları törədən şəxslərin cəzalandırılması haqqında" qanun layihəsinin müzakirəsi zamanı deyib.
Azərbaycanın Avropa İnsan Haqları Məhkəməsindəki daimi nümayəndəsi Ç.Əsgərov bildirib ki, Dağlıq Qarabağda ermənilər tərəfindən cinayətlər törədilib. Bu cinayətlər hələ də davam edir. Orada Ermənistan tərəfindən dəvət edilən şirkətlər iş aparır: "Azərbaycana məxsus tarixi abidələrdə dəyişiklik edilir. Ermənilər Dağlıq Qarabağdan iqtisadi sahədə də istifadə edirlər, orada istehsal olunan malları öz malları kimi təqdim edirlər. Bu cinayətdir. Ona görə də bu cinayətlərin qarşısı alınmalıdır. Bu baxımdan bu gün müzakirə edilən qanun layihəsinin qəbulu mühüm əhəmiyyət kəsb edir".
Bütövlükdə, verilən şikayət ərizələri ilə bağlı bu istiqamətdə nə kimi nəticələr əldə etmək mümkündür? Məsələyə münsibət bildirən hüquqşünas Vamiq Şükürovun sözlərinə görə, bunun müəyyən əhəmiyyəti var: "Bunun vətəndaşlar üçün xeyri ondan ibarət olar ki, baş verən dağıntılara görə Ermənistan cərimələnə bilər. Həmin cərimələri əldə etməklə, baş verən dağıntıları müəyyən qədər kompensasiya etmək mümkündür. Ümumən Avropa İnsan Haqları Məhkəməsinin qərarlarının Dağlıq Qarabağ münaqişəsinin həllinə birbaşa təsir göstərəcəyini düşünmürəm. Yəni bunun prinsipial əhəmiyyəti olmayacaq. Sadəcə olaraq, sözügedən məhkəmənin qəbul etdiyi qərarlardan Azərbaycan Xarici İşlər Nazirliyi istifadə edə bilər. Vətəndaşlarının hüquqlarının pozulması ilə bağlı müəyyən məsələləri qaldıra bilər. Diplomatik müstəvidə bunun faydası ola bilər. Dəymiş zərərin tələb edilməsi ilə əlaqədar bunun verdiyi imkanlardan istifadə olunmalıdır".
Vidadi ORDAHALLI
