"Bu, qonşu dövlətə göstərilən münasibətin göstəricisidir"
Məlum olduğu kimi, Azərbaycan paralimpiya yığması "Rio-2016"da 27 idmançı ilə çıxış edəcək. Ölkəmiz Braziliyadakı yarışa buraxılmayan Rusiya paralimpiyaçılarının kənarda qalması üzündən Azərbaycana verilən lisenziyalardan imtina edib.
Belə ki, İdman Arbitraj Məhkəməsinin (CAS) çıxardığı qərara əsasən, Beynəlxalq Olimpiya Komitəsi tərəfindən rusiyalı paralimpiyaçıların lisenziyaları əllərindən alınaraq digər ölkələrə paylanıb. Ölkəmizə də 3 lisenziyanın təqdim edilməsini Azərbaycan Paralimpiya Komitəsi açıqlasa da, Gənclər və İdman Nazirliyi tərəfindən bir müddət bundan öncə elan olunan qərara əsasən, bu müsbət qarşılanmayıb və lisenziyalar qəbul edilməyib. Nəticədə paralimpiyaçılarımız özlərinin qazandığı vəsiqə ilə Paralimpiya Oyunlarına qatılıb.
Qeyd edək ki, "Rio-2016"da 27 paralimpiyaçımız 6 idman növündə ümumilikdə 44 dəst medal uğrunda yarışacaq.
Bu arada Rusiya Xarici İşlər Nazirliyinin rəsmi nümayəndəsi Mariya Zaxarova Azərbaycan tərəfinin Rusiya paralimpiyaçılarından alınmış lisenziyalardan imtina etməsini şərh edib. Rusiya XİN rəsmisi keçirdiyi brifinqdə Azərbaycan tərəfinə bu addımı atdığına görə təşəkkürünü bildirib: "Azərbaycanlı həmkarlarımız Rusiya paralimpiyaçılarının üzləşdiyi problemi, onlara olan münasibəti yaxşı anlayır. Ona görə də bizim paralimpiyaçıları dəstəkləyən hər kəsə, şəxsən Azərbaycandan olan həmkarlarımıza təşəkkürümüzü bildiririk".
Ümumən Azərbaycanın atdığı bu addıma münasibət necədir?
Məsələyə münasibət bildirən VİP-in sədr müavini Ramil Hüseynovun sözlərinə görə, Azərbaycan Rusiya ilə yaxın münasibətlərə görə bu addımı atıb: "Bu, qonşu dövlətə göstərilən münasibətin göstəricisidir. Belə ki, zaman-zaman Azərbaycan belə məsələlərdə diqqətli davranıb. Xüsusən də Rusiyaya münasibətdə. Son illər iki ölkə münasibətlərində xeyli yaxınlaşma var. Ona görə də indiki məqamda belə bir addımın atılması başadüşüləndir. Bu baxımdan idmançılarımız Rusiya idmançıları ilə həmrəylik göstərib. Hesab edirəm ki, bəzi məqamlarda dövlətçilik maraqlarından çıxış edib bu cür addımlar atmaq lazımdır. Ancaq yaxşı olardı ki, lazım gələrsə, Rusiya da Azərbaycana münasibətdə analoji addımlar atsın".
Vidadi ORDAHALLI
