Bu gün Milli Məclisdə 2016-cı il dövlət büdcəsinin yenilənmiş layihəsinin müzakirəsi keçirilib. Trend-in məlumatına görə, parlamentin plenar iclasında çıxış edən maliyyə naziri Samir Şərifov bildirib ki, dövlət büdcəsinə dəyişikliklərin edilməsi iki faktorla şərtlənib: "Birincisi, son 18 ayda neftin qiymətinin 4 dəfədən çox azalmasıdır ki, bu da dövlət və icmal büdcələrin proqnozlaşdırılan gəlirlərini azaldıb. İkincisi, dekabrda manatın devalvasiyası və milli valyutanının üzən məzənnə rejiminə keçidi xarici valyutada ifadə edilmiş xərclərin nisbətsizliyinə gətirib çıxarıb”.
Milli Məclisin İqtisadi siyasət, sənaye və sahibkarlıq komitəsinin sədri Ziyad Səmədzadə isə qeyd edib ki, dünyada baş verən proseslər istənilən halda Azərbaycan iqtisadiyyatına təsir edir: "2016-cı il dövlət büdcəsinə dəyişikliklərin edilməsinin əsas səbəbi onunla əlaqədardır ki, ölkə iqtisadiyyatı müəyyən dərəcədə son vaxtlar bir neçə dəfə azalan neftin qiymətindən asılıdır".
Onun sözlərinə görə, son 15 ildə dövlət büdcəsinin proqnozlarına dəyişikliklər üçün səbəb yaranmayıb.
Deputat qeyd edib ki, Azərbaycanın gələcəkdə dövlət büdcəsinin gəlirlərini artırmaq üçün kifayət qədər potensialı var.
Azərbaycanın 2016-cı il dəqiqləşdirilmiş icmal büdcəsinin gəlirləri 15 738,6 milyon manat səviyyəsində gözlənilir ki, bu da təsdiq edilmiş büdcə ilə müqayisədə 981,5 milyon manat və ya 5,9 faiz azdır.
Bəzi nazirlərin parlamentdə iştirak etməməsi narazılıq yaratdı
Yeni Azərbaycan Partiyasının icra katibinin müavini, deputat Siyavuş Novruzov isə nazirlərin və Nazirlər Kabinetinin üzvlərinin iştirak etməməsi ilə bağlı narazılığını bildirib.
O, bildirib ki, bugünkü müzakirələrdə iqtisadi bloka daxil olan nazirlərin heç biri iştirak etmir: "Bu gün büdcə yenidən müzakirə olunacaq. Amma iclasda iqtisadi blokdan heç bir nazir yoxdur. Ola bilər ki, kimsə ezamiyyətdə olsun. Büdcə Samir Şərifovun və ya Mərkəzi Bankın sədrinin büdcəsi deyil ki? Heç olmasa nazirlərin müavinləri iştirak etməli idi. Nazirlər Kabinetində 6 müavin var. Mənim onlara sualım var, amma heç biri burada yoxdur. Bu yanaşma dövlət başçısının yanaşmasına heç bir halda uyğun deyil. Hesab edirəm ki, onlar bura dəvət olunmalıdır”.
Spiker Oqtay Əsədov isə qeyd edib ki, nazirlərin əksəriyyəti Prezident İlham Əliyev ilə birgə İrana rəsmi səfərdə iştirak edirlər: "Nazirlər Kabineti ilə bağlı dedikərinizlə isə razıyam”.
Universitetlər, tibb müəssisələri də özəlləşdirməyə çıxarılmalıdır
Qüdrət Həsənquliyev isə deyib ki, "Lənkəranda hava limanı tikiləndə dedim ki, onun yerinə orada velosiped zavodu tikilsin, hər il Azərbaycana 100 minə qədər velosiped gətirilir”.
Deputat bildirib ki, budcədə özəlləşdirmədən gələcək gəlir 100 milyon manat məbləğində müəyyən olunub: "Bu məbləğ çox azdır, özəlləşdirməyə daha böyük diqqət ayırmaq lazımdır. Regionlarda tikilmiş hava limanları da özəlləşdirilməlidir. Universitetlər, tibb müəssisələri də özəlləşdirməyə çıxarılmalıdır”.
Q.Həsənquliyev həmçinin futbol klublarına diqqətin artırılmasını təklif edib.
O bildirib ki, futbol klubları maliyyə çatışmazlığı səbəbindən bağlanır: "Biz buna imkan verməməliyik”.
Tez gəlir gətirən sahələrə diqqəti artırmaq lazımdır
Millət vəkili Vahid Əhmədov isə deyib ki, ölkədə tez gəlir gətirən sahələrə diqqəti artırmaq lazımdır (APA). Millət vəkili deyib ki, kiçik və orta sahibkarlığın inkişafı sahəsinə diqqət artırılmalıdır: "Bununla bağlı, vergi və gömrük orqanlarından xahiş edirəm... Düzdür, son vaxtlar gömrük sistemində çox ciddi islahatlar aparılır. Xüsusilə, sərhəd zonalarında bunu görmək olar. Mən bunu çox müsbət addım kimi qiymətləndirirəm. Amma elə etməliyik ki, Azərbaycanda kiçik və orta sahibkarlığın inkişafında problemlər olmasın. Dövlət başçısının son vaxtlar qəbul etdiyi sərəncamlar, fərmanlar, Milli Məclisin qəbul etdiyi bir sıra qərarlar bizə imkan yaradır ki, 2016-cı ildə də çətinliklərə baxmayaraq manatın növbəti devalvasiyasından qaçaq və 2016-cı ildə də Azərbaycanın iqtisadi inkişafını uğurla davam etdirək".
V. Əhmədov əlavə edib ki, yenilənmiş dövlət büdcəsindən kənd təsərrüfatı sahəsinə 86 mln. manatın ayrılması nəzərdə tutulub. Millət vəkili hesab edir ki, bu, olduqca azdır: "Çünki, kənd təsərrüfatında, xüsusilə emal və suvarma sahəsində problemlər həddən artıq çoxdur. Taxtakörpü su anbarı, Şəmkirdə böyük su anbarının inşa edilməsinə baxmayaraq, rayonların su təminatında çox ciddi problemlər var. Mən belə hesab edirəm ki, Azərbaycan hökuməti suvarma ilə bağlı xüsusi proqram işləyib hazırlamalı və qəbul etməlidir. Əks təqdirdə biz kənd təsərrüfatında ciddi irəliləyişə nail ola bilmərik”.
V. Əhmədov əlavə edib ki, hökumət ipotekaya ayrılan vəsaitin artırılması istiqamətində də işləməlidir. Onun sözlərinə görə, 2016-cı ilin dövlət büdcəsində ipotekaya 50 mln. manatın ayrılması nəzərdə tutulub: "Bundan başqa, prezident İlham Əliyevin ipotekaya daha 200 milyon manatın artırılması barədə də tövsiyəsi var. Hökumət bu məsələyə baxmalıdır".
2016-cı ilin yenilənmiş dövlət büdcəsi
Müzakirələrdən sonra 2016-cı ilin dövlət büdcəsinə dəyişikliklər qəbul edilib. Dəyişikliklərə əsasən, dövlət büdcəsinin dəqiqləşdirilmiş gəlirləri 16,822 milyard manat səviyyəsində gözlənilir ki, bu da təsdiq edilmiş proqnozlardan 15,5 faiz çoxdur.
Xərclər 18,495 manat səviyyəsində proqnozlaşdırılır. Dövlət büdcəsinin kəsiri 1,673 milyard manat təşkil edəcək.
Dövlət və icmal büdcələrin parametrləri 1 barel neftin 25 dollar səviyyəsində dəqiqləşdirilib.
"Valyuta tənzimi haqqında" qanuna dəyişikliklər qəbul edildi
İclasda "Valyuta tənzimi haqqında" qanuna dəyişikliklər də qəbul edilib. Dəyişikliklərə müvafiq olaraq rezident və qeyri-rezidentlər tərəfindən Azərbaycandan kənara xarici valyutanın köçürülməsi üçün əməliyyat məbləğinin 20 faizi miqdarında icbari yığım tam məbləğdə dövlət büdcəsinə ödənilir.
Daha əvvəl Azərbaycan Prezidenti İlham Əliyev Milli Məclis tərəfindən 2016-cı il yanvarın 19-da qəbul edilmiş "Valyuta tənzimi haqqında" qanuna dəyişikliklər edilməsi barədə" Azərbaycan Respublikası Qanununu imzalamadan 2016-cı il fevralın 3-də Milli Məclisə geri qaytarmışdı.
Milli Məclisin sədri Prezidentin qaytardığı "Valyuta tənzimi haqqında" qanuna dəyişikliklər edilməsi barədə" qanunu Milli Məclisin Daxili Nizamnaməsinin 21-ci maddəsinin ikinci hissəsinə uyğun olaraq, İqtisadi siyasət, sənaye və sahibkarlıq komitəsinin rəyinə göndərib.
İqtisadi siyasət, sənaye və sahibkarlıq komitəsi 2016-cı il fevralın 9-da keçirdiyi iclasda bu məsələyə baxaraq, Prezidentin "Valyuta tənzimi haqqında" qanuna dəyişikliklər edilməsi barədə" qanunun məqsədəuyğun olmaması barədə təklifinin qəbul edilməsini Milli Məclisə təklif edib.
Yeni dəyişikliklərə əsasən, əməliyyatların həcminin 20 faizi miqdarında icbari yığım rezident və qeyri-rezident olan fiziki və hüquqi şəxslər tərəfindən (banklar və sığorta şirkətləri istisna olmaqla) birbaşa investisiyalar, qiymətli kağızların, daşınmaz əmlakın və torpaq sahələrinin, eləcə də daşınmaz əmlak hesab olunan əmlaka görə haqqın əldə edilməsi üçün çıxarılan xarici valyutaya aid edilir.
Bundan başqa, dəyişikliklərə əsasən, rezident olan hüquqi şəxslər tərəfindən Azərbaycan şirkətlərinin xarici nümayəndəliklərinə, filiallarına və törəmə strukturlarına köçürmələr qismində çıxarılan xarici valyutaya ildə 50 min dolları üstələyən məbləğin 20 faizi miqdarında icbari yığım qoyulacaq.
