Azər Həsrət: “Belə bir vəziyyətdə Rusiyanın Avropa İttifaqına şərt irəli sürməsi gülüncdür”
Rusiya Avropa ilə dialoqa hazırdır, lakin özü təmaslara təşəbbüs göstərmək niyyətində deyil. Bu sözləri Rusiya prezidentinin mətbuat katibi Dmitri Peskov Avropa İttifaqı Şurasının Prezidenti Antonio Koştanın Rusiya ilə potensial danışıqlarla bağlı açıqlamasına münasibət bildirərkən deyib.
“Avropalıların hazır olduqları təqdirdə dialoqumuzda irəliləməyə hazırıq. Lakin Putin dəfələrlə qeyd etdiyi kimi, avropalıların tutduqları mövqedən sonra biz özümüz belə əlaqələr qurmağa təşəbbüs etməyəcəyik”, - deyə Kremlin sözçüsü qeyd edib.
Rusiya prezidentinin mətbuat katibi onu da vurğulayıb ki, Rusiya ilə Avropa arasında münasibətlərin kəsilməsinin təşəbbüskarı Moskva deyil: “Rusiya tərəfi münasibətlərimizin kəsilməsinin təşəbbüskarı olmayıb. Bunun təşəbbüskarları Brüssel və ayrı-ayrı Avropa paytaxtları olub”.
Maraqlıdır, Putinin belə yekəxana davranmasında Trampın ona verdiyi dəstək nə dərəcədə rol oynayır?
Sözügedən məsələni baki-xeber.com-a şərh edən siyasi ekspert Azər Həsrətin fikrincə, Rusiya Trampın loyallaşması fonunda bu cür “ürəklə” danışa bilir: “Ancaq bu, heç nəyi dəyişmir. Putinin Trampdan ilhamlanması Rusiyanı tükəndirici müharibədən xilas etmir. Əksinə, Rusiya daha çox resurs itirir. Avropa əslində Rusiyaya əl uzadır, şans verir. Bir jest edir ki, gəl bu vəziyyətdən üzüağ çıx və biz də sənə kömək edək. Lakin problem ondadır ki, Rusiyanın dövlət ağlı bunu dəyərləndirə bilmir. Ona görə də belə yekəxanalıq edirlər. Elə bilirlər ki, elə bundan sonra da bu cür davam edə biləcəklər. Əlbəttə, bu, mümkün olmayacaq. Ukrayna faktiki olaraq Rusiyanın üzərinə çöküb. Rusiyanın hər tərəfindən hər gün bomba səsləri eşidilir. Rusiyanın hər tərəfi qan içindədir, dağıntılara məruz qalır. Yəni müharibə faktiki olaraq Rusiyanın içərilərinə daşınıb. Halbuki, 4 il bundan əvvəl Rusiya müharibəyə başlamaq istəyəndə planları tamam başqa idi. Fikirləşirdilər ki, 3 günə Kiyevi dizə gətirəcəklər, amma bu, baş tutmadı. Bəli, Ukraynanın bəlli əraziləri işğal edilib, şəhərlər dağıdılıb, çoxsaylı mülki insan öldürülüb. Lakin artıq çarx tərsinə dönməyə başlayıb. Faktiki olaraq indiki şəraitdə Ukrayna Rusiyanın üzərinə gedir. Baxmayaraq ki, torpaqları işğal altındadır, yavaş-yavaş, qarış-qarış o torpaqları azad edir. Ən başlıcası isə Ukrayna Rusiya kimi ərazicə böyük ölkənin dərinliklərinə zərbələr endirir. Xüsusən də Rusiyanın iri neftayırma zavodlarının hədəf alınması bu ölkəyə baha başa gəlir. Ukrayna bəzən ağıla gəlməyən bölgələrə belə hücumlar edir. Bütün bunların fonunda Moskva 9 May qələbə paradını səksəkə içində keçirməyə məcbur oldu. Dünya liderləri o paradda iştirak etməkdən imtina etdi. Rusiya faktiki olaraq arzuolunmaz bir dövlətə çevrilib. Belə bir vəziyyətdə Rusiyanın Aİ-yə şərt irəli sürməsi və demək ki, “onlar arzu edərsə biz bunu edərik” bu, gülüncdür. Ona görə ki, onların buna ehtiyacı yoxdur. Buna ehtiyacı olan hazırda Rusiyadır. Danışıqlara ən çox ehtiyacı olan Rusiya dövlətidir. Bunu anlamır, dövlət ağlı ilə dəyərləndirə bilmirlərsə, problem yenə Rusiyanın özündədir”.
Vidadi ORDAHALLI
