Dünən xəbər yayıldı ki, sosial şəbəkələrdə "Avesta" şirkətinin sabiq əməkdaşlarından biri şirkətin sahibi Hacı İbrahim Nehrəmliyə qarşı maaş tələbi ilə video yerləşdirib və şirkətin işçilərinə hazırda Azərbaycandakı ictimai-siyasi sabitliklə uyğunlaşmayan çağırışlar edib.
Baki-xeber.com "Avesta" şirkətinin sahibi Hacı İbrahimlə mübahisənin hansı mahiyyətdə olduğunu aydınlaşdırmağa çalışıb və iddiaçı xanımın videoda səsləndirdiyi iddialara tam əks mənzərə ortaya çıxarıb.
Hacı İbrahim Sadiqova Sabirə Aslan qızı adlı bu xanımın 2015-ci ilin aprelinədək şirkətdə mühasib işlədiyini, bu işdə cəmi 9 ay çalışdığını, aprel ayında işdən öz ərizəsi ilə azad olduğunu bildirdi. Hacı İbrahim əlavə etdi ki, Sabirə Sadiqova bütün aylar üzrə maaşlarını, o cümlədən aprel ayı üzrə maaşını vaxtında alıb, sadəcə qalan vəsait onun 1814 manat məbləğində son hesabıdır: "Bu məbləğ şirkətdə yaranmış sizlərə də məlum vəziyyətlə əlaqəli bir qədər geciksə də, şirkətin işçiləri bir neçə gündən sonra keçmiş mühasiblə son hesabı çəkməyə cəhd edib, lakin xanım qəribə mövqe göstərib. Əvvəlki həftələrdə ona zəng vuraraq gəlib son hesabı almağa dəvət etsələr də, o, Gürcüstanda olduğunu deyərək hələlik gəlib pulu almağı təxirə salıb. Ancaq maraqlıdır ki, Gürcüstanda olduğu üçün gəlib pulu götürə bilmədiyini dediyi halda, sosial şəbəkəyə video yerləşdirir. Bu, məntiqsizlik və anlaşılmazlıq kimi görünür. Biz bu gün də ona təklif etmişik ki, istənilən vaxt son hesabını kəsə bilər".
Həqiqətən də maraqlıdır, keçmiş mühasib ölkədə olmadığı üçün son hesabı ala bilmirsə, onda onun sosial şəbəkələrdə iddialı videolar yerləşdirməsinin səbəbi nədir?
Bəlkə kimsə xanımı bu addımı atmağa yönəldib? Bəlkə bu, Hacı İbrahimə qarşı əvvəllər də rast gəlinən şantaj cəhdlərindən biridir? Axı sahibkar işçinin son hesabını kəsməkdən heç vaxt imtina etməyib? Belədə xanım niyə sosial şəbəkə kimi kütləvi təzyiq üsuluna əl atıb?
Namiq QULİYEV
