Bakıda yanan binada problem olmasa, şənbə günündən təmir işlərinə başlanılacaq. Trend-in məlumatına görə, bunu binanın sakinləri ilə söhbətində Bakı Şəhər İcra Hakimiyyətinin başçısı Hacıbala Abıtalıbov deyib.
H.Abutalıbov bildirib ki, Fövqəladə Hallar Nazirliyi (FHN) binanı müayinə edir: "Əgər FHN desə ki, o binanın dayanıqlılığı yüksəkdir və orada işə başlamaq olar, o zaman təmir işlərinə başlaya bilərik. Heç bir problem olmasa, bu həftənin şənbə günündən təmir işlərinə başlayacağıq".
O qeyd edib ki, binanın bütün ailələri ilə ayrı-ayrılıqda görüşlər keçirilib və ailələrin çoxu pulu alıb: "Bina tam təmir olunandan sonra sakinlər evlərinə köçə biləcəklər. Mebeldən tutmuş mətbəx əşyalarına qədər ən yüksək səviyyədə təmin ediləcək. Çox güman ki, bütün təmir işləri iki-üç aya qədər bitəcək".
Hacıbala Abıtalıbov deyib ki, Prezident İlham Əliyev Bakıda binalara vurulan üzlüklərin keyfiyyətinin yoxlanılması üçün 2 gün vaxt verib.
H.Abutalıbov deyib ki, bu müddətdə ekspertiza aparılacaq. Onun sözlərinə görə, Bakı şəhərinin bütün rayonlarında cəmi 140 binada bu materialdan üzlük var: "Bunların hamısından nümunə götürüləcək, laboratoriyadan keçirilərək ekspertiza olunacaq. Yekun sənəd sonda mənə təqdim olunacaq. Bundan sonra biləcəyik ki, yanğın nədən baş verib. Bundan sonra binalardan üzlüklərin sökülüb-sökülməyəciyinə qərar veriləcək. Çünki müəyyən sənədlərdə bu materiallardan üzlük kimi istifadə oluna biləcəyi yazılmışdı. Həmin material dünyanın bir çox yerində, o cümlədən Türkiyədə, Rusiyada istifadə olunub. Həmin ölkələrdə üzlüklər birbaşa divara yapışdırılaraq ara məsafə saxlanılmır. Ara məsafənin özü də yanğının sürətlənməsinə səbəbdir. Səbəblər çoxdu, sadəcə istintaq araşdırmasının nəticələrini gözləmək lazımdır".
Yanğın hadisəsinin I Avropa Oyunları öncəsi təxribat ola biləcəyi məsələsinə toxunan icra başçısı bildirib ki, bu ehtimal da araşdırılır: "Bunu da istisna etmək lazım deyil. Hadisənin baş verməsi bizim günahımızdır. Lakin əsas işimiz səbəbləri müəyyənləşdirməkdir. Konkret səbəbləri öyrənməliyik. Çünki üzlüklər çoxdan vurulub, amma son zamanlar ard-arda yanır. Prezident İlham Əliyevin göstərişi ilə üzlük vurulan bütün binaların qarşısına mühafizə qoyulub. İnsanlardan xahiş olunur ki, daha ayıq olsunlar. Çünki hazırda bütün dünyanın gözü Azərbaycandadır. Kimsə gəlib bizim ölkəni qoruyası deyil. Ona görə də əvvəlcə özümüz özümüzü qorumalıyıq".
Hacıbala Abutalıbov yaşayış binalarının yanğına həssas üzlüklərinin sökülməsi ilə bağlı yayılan məlumatlara da aydınlıq gətirib. O, bildirib ki, Bakıda bəzi binaların üzlüklərinin sökülməsi ilə bağlı mediada yayılan məlumatlar həqiqətə uyğun deyil.
