Bakıda daha bir binanın üzlüyü yanıb. Məlumata görə, Bakının Azadlıq prospektində 16 mərtəbəli binada güclü yanğın baş verib. Dərhal Fövqəladə Hallar Nazirliyinin Dövlət Yanğından Mühafizə Xidmətinin canlı qüvvə və texnikası hadisə yerinə cəlb olunub və aidiyyəti qurumlar məlumatlandırılıb.
Trend-in hadisə yerində olan əməkdaşının verdiyi məlumata görə, yanğının söndürülməsinə bir helikopter də cəlb edilib.
Azərbaycanın daxili işlər naziri və baş prokuroru yanğın baş verən əraziyə gəlib. Məlumata görə, daxili işlər naziri Ramil Usubov, baş prokuror Zakir Qaralov və fövqəladə hallar nazirinin müavini Etibar Mirzəyev yanğın baş verən əraziyə gəliblər.
Yanğın zamanı ölənlərin sayı 16 nəfərə çatıb, xəsarət alanlar isə 54 nəfərdir. Bu barədə Trend-ə SN-nin mətbuat xidmətinin əməkdaşı Səfayə Əhmədova məlumat verib.
Yanğınla bağlı Fövqəladə Hallar, Daxili İşlər nazirlikləri və Baş Prokurorluq birgə istintaq qrupu yaradıb.
Binada insan qalmayıb, hamı təxliyə olunub
Hadisə yerində təqribən 40 yanğın briqadası işləyir, yanğının söndürülməsnə iki helikopter cəlb edilib (Trend). Fövqəladə hallar nazirinin müavini, general-leytenant Etibar Mirzəyevin sözlərinə görə, hazırda binanın daxilində insan qalmayıb, hamı təxliyə olunub: "Yanğının belə gec söndürülməsinin - təqribən 4 saat - səbəbi yolda tıxacın olması olub, buna görə də yanğın briqadaları hadisə yerinə vaxtında çata bilməyiblər".
Nazir müavini bildirib ki, ekspertlər binaya dəymiş ziyanı qiymətləndirəcəklər: "Yanğının səbəbi araşdırılır. Binada qaz olmayıb, lakin yanğın zamanı qaz balonları bir neçə dəfə partlayıb".
E.Mirzəyev deyib ki, xəsarət alanlardan 25 nəfəri FHN əməkdaşları tərəfindən təxliyə olunub: "Bütün mənzillərin qapıları açılaraq yoxlanlılıb. Mənzillərində qalıb kömək gözləyənlərin 80 faizi sağ qalıb, bloka çıxanlar isə tüstüdən boğulublar".
Yanğınla bağlı ilkin ehtimal
Baş prokuror Zakir Qaralov isə bildirir ki, yanğının ilkin səbəbinin binanın üzlüyünün lazımı keyfiyyətdə olmaması ehtimal edilir. Onun sözlərinə görə, bu sahədə istintaqa, əməliyyat qrupuna ixtisaslaşdırılmış kadrlar cəlb olunub: "İcra orqanlarından təhvil-təslim aktları götürülüb. Bu hadisəyə lazımi qiymət veriləcək”.
Yanğın hadisəsi Prezidentin nəzarətindədir
Hadisə ilə bağlı Baş Prokurorluq, FHN və Daxili İşlər Nazirliyinin mətbuat xidmətləri birgə məlumat da yayıb. Məlumatda deyilir ki, Bakıda yaşayış binasında baş verən yanğınla bağlı həyata keçirilən istintaq və əməliyyat-axtarış tədbirləri Azərbaycan Respublikası Prezidentinin nəzarətindədir.
Qeyd edilir ki, 2015-ci il mayın 19-da, saat 11 radələrində Bakı şəhəri, Binəqədi rayonu, Azadlıq prospekti, 200/36 ünvanında yerləşən çoxmərtəbəli yaşayış binasında yanğın baş verib. Hadisə yerinə dərhal Fövqəladə Hallar Nazirliyinin Dövlət Yanğından Mühafizə Xidmətinin canlı qüvvəsi, texnikası, Səhiyyə Nazirliyinin Təcili Tibbi Yardım xidmətləri cəlb edilib. Hadisə yerinin mühafizəsi və xilasedicilərin maneəsiz fəaliyyəti Daxili İşlər Nazirliyinin Çevik Polis Alayının və paytaxtın polis orqanlarının əməkdaşları tərəfindən təmin edilib.
Operativ surətdə həyata keçirilmiş tədbirlərlə binanın 27 sakini təxliyə olunub, 37 nəfər xilas edilib. Təxminən saat 14 radələrində yanğın lokallaşdırılıb, yaxınlıqdakı binalar yanğından mühafizə olunub. Bununla belə, ilkin ehtimallara görə binanın fasadından başlayan və qısa müddətdə böyük bir hissəsini əhatə edən yanğın nəticəsində 15 nəfər həlak olub, 26 nəfər isə yanıq xəsarəti və tüstüdən zəhərlənmə ilə müxtəlif tibb müəssisələrinə yerləşdirilib.
Hazırda binada xilasetmə tədbirləri və mənzillərin müayinəsi davam etdirilir.
Fövqəladə Hallar Nazirliyinin rəhbər vəzifəli şəxsləri, respublikanın Baş prokuroru və daxili işlər naziri hadisə yerinə çıxıblar.
Fakt üzrə Baş Prokurorluğun Ağır Cinayətlərə dair İşlər üzrə İstintaq İdarəsində Azərbaycan Respublikası Cinayət Məcəlləsinin 225.2-ci - ehtiyatsızlıqdan zərərçəkmiş şəxsin ölümünə və digər ağır nəticələrə səbəb olan yanğın təhlükəsizliyi qaydalarını pozma, 308.2-ci - vəzifə səlahiyyətlərindən sui-istifadə və 314.2-ci - ağır nəticələrə səbəb olan səhlənkarlıq maddələri ilə cinayət işi başlanıb, eləcə də Baş Prokurorluğun, Daxili İşlər və Fövqəladə Hallar nazirliklərinin təcrübəli əməkdaşlarından ibarət istintaq-əməliyyat qrupu yaradılıb.
Araşdırmaların gedişi barədə ictimaiyyətə əlavə məlumat veriləcək.
Yanan binada istifadə edilən üzlüyün istehsalçısı axtarılır
Standartlaşdırma, Metrologiya və Patent üzrə Dövlət Komitəsi yanında Texniki Tənzimləmə və Standartlaşdırma üzrə Dövlət Xidməti bu gün Bakıda yanan binada istifadə edilən üzlüyün istehsalçısını müəyyənləşdirir. Bunu Trend-ə Dövlət Komitəsindən deyiblər.
Komitədən bildiriblər ki, ilk növbədə, üzlüyün Azərbaycanda istehsal olunmasını və ya idxal edildiyini araşdırmaq lazımdır: "Bunu müəyyənləşdirdikdən sonra üzlüyü istehsal edən və idxal edən şirkətdə monitorinq aparılacaq. Belə yoxlamalar artıq bu ilin aprelində aparılıb”.
Dövlət Komitəsindən qeyd ediblər ki, penopolistiroldan hazırlanmış dekorativ üzlüyün istehsalı ilə məşğul olan iki müəssisədə aparılmış monitorinqin nəticələri üzrə müəyyən çatışmazlıqlar aşkarlanıb: "Bununla əlaqədar onların fəaliyyəti dayandırılıb. Müəssisələrdən biri "M.N.F.” MMC-nin adına qeydiyyata alınıb, digəri isə fiziki şəxsə məxsus olub. Düzdür, hazırda yanan binadakı üzlüyün həmin müəssisələr tərəfindən istehsal edilməsini demək olmaz”.
