Dünyanın yeni düzəni Bakıda müzakirə olunur

Prezident İlham Əliyev Bakıda III Qlobal Açıq Cəmiyyətlər Forumunda

Həqiqətən də Dağlıq Qarabağ problemi indiyədək həll olunsaydı, digər münaqişələri görməzdik

Aprelin 28-də Bakıda III Qlobal Açıq Cəmiyyətlər Forumu işə başlayıb. "Trend"in məlumatına görə, Azərbaycan Respublikasının Prezidenti İlham Əliyev Forumun rəsmi açılış mərasimində iştirak edib. Diasporla İş üzrə Dövlət Komitəsinin dəstəyi, Nizami Gəncəvi Beynəlxalq Mərkəzinin təşkilatçılığı ilə keçirilən Forum "Yeni dünya düzənində etimadın yaradılması" mövzusuna həsr olunub. Forumu Misirin "İsgəndəriyyə" Kitabxanasının direktoru, Nizami Gəncəvi Beynəlxalq Mərkəzinin həmsədri İsmail Serageldin açıb. Dövlət başçısı mərasimdə nitq söyləyib.
"BMT Təhlükəsizlik Şurasının Ermənistan qoşunlarının Azərbaycanın işğal edilmiş ərazilərindən dərhal və qeyd-şərtsiz çıxarılmasını tələb edən 4 qətnaməsinə baxmayaraq, Azərbaycanın beynəlxalq birlik tərəfindən tanınmış tarixi ərazilərinin Ermənistan tərəfindən işğalı uzun illərdir davam edir". Bunu Prezident İlham Əliyev aprelin 28-də Bakıda III Qlobal Açıq Cəmiyyətlər Forumunın açılış mərasimində çıxışı zamanı deyib.
Prezident qeyd edib ki, Dağlıq Qarabağ Azərbaycanın tarixi ərazisi və ayrılmaz hissəsidir: "Dünyada heç bir ölkə Dağlıq Qarabağın müstəqilliyini tanımır. Biz işğaldan əziyyət çəkirik, ərazilərimizin 20 faizi Ermənistanın işğalı altındadır və bir milyondan çox azərbaycanlı öz doğma yurdunda qaçqın və məcburi köçkün vəziyyətinə düşüb. Biz etnik təmizləmədən, artıq dünyanın 10-dan artıq ölkəsi tərəfindən tanınan və tanınma prosesi davam edən Xocalı soyqırımından əziyyət çəkirik. Ərazi bütövlüyü beynəlxalq qanunun fundamental prinsipidir. Bu, BMT-nin Nizamnaməsində də təsbit olunub, bu, beynəlxalq qanunun ən vacib elementlərindən biridir və Helsinki Yekun Aktında müəyyən edildiyi kimi, çox aydın şəkildə göstərilir ki, öz müqəddəratını təyinetmə hüququ ölkələrin ərazi bütövlüyünü pozmamalıdır və heç bir ölkənin ərazi bütövlüyü həmin ölkənin hökumətinin və xalqının razılığı olmadan dəyişə bilməz".
Dövlət başçısı çıxışında bildirib ki, Azərbaycanın da ərazi bütövlüyü digər ölkələrin ərazi bütövlüyü kimi eyni dəyərə malikdir.
İlham Əliyev təəssüflə qeyd edib ki, dünyada separatizm, aqressiv sepatarizm siyasəti davam edir və ərazi bütövlüyünün pozulması münaqişələrə səbəb olur: "Əgər Dağlıq Qarabağ münaqişəsi indiyə qədər həll olunsaydı, biz bu gün digər münaqişələri görməzdik".
Prezidentin sözlərinə görə, Azərbaycan Dağlıq Qarabağ münaqişəsinin beynəlxalq qanun normaları və BMT Təhlükəsizlik Şurasının qətnamələri əsasında həll edilməsinin tərəfdarıdır: "Avropa Parlamenti, Avropa Şurası Parlament Assambleyası, İslam Əməkdaşlıq Təşkilatı, Qoşulmama hərəkatı kimi digər mühüm beynəlxalq təşkilatlar eyni qətnamələr qəbul edib ki, Dağlıq Qarabağ münaqişəsi beynəlxalq qanun psinsipləri və Azərbaycanın ərazi bütövlüyü əsasında öz həllini tapmalıdır".

"Təəssüflər olsun ki, heç də bütün ölkələr beynəlxalq qanunlara hörmət etmir"

"Azərbaycan dünyanın aparıcı beynəlxalq təşkilatı olan BMT Təhlükəsizlik Şurasına seçilən zaman aydın şəkildə bəyan etdik ki, ədaləti və beynəlxaq qanunu müdafiə edəcəyik. Təəssüflər olsun ki, heç də bütün ölkələr beynəlxalq qanunlara hörmət etmir. Təəssüflər, ancaq bu reallıqdır". Bakıda III Qlobal Açıq Cəmiyyətlər Forumunın açılış mərasimində çıxışı zamanı İlham Əliyev daha sonra deyib: "Bəzən elə görünür ki, beynəlxalq qanunlar yalnız müxtəlif vasitələrlə öz məqsədlərinə nail olmaqda kifayət qədər güclü olmayan ölkələr üçün məcburidir. Biz aydın şəkildə görürük ki, zaman-zaman dünyanın aparıcı ölkələri kobud şəkildə beynəlxalq qanunların normalarını pozur və bu da beynəlxalq münasibətlər sistemini pozur. Hesab edirəm ki, bu bizim çox açıq və aydın şəkildə həll etməli olduğumuz ən vacib məsələlərdən biridir və beynəlxalq münasibətlər sistemi, beynəlxalq qanunları gücləndirmək üçün biz öz imkanlarımızdan, intellektual potensialımızdan və dünyadakı nüfuzumuzdan istifadə etməyə çalışmalıyıq".
Prezident bildirib ki, beynəlxalq təşkilatların qətnamələrinə hörmət edilməlidir: "Bəzi hallarda beynəlxalq təşkilatların, yəni BMT Təhlükəsizlik Şurasının qətnamələri dərhal yerinə yetirilir, digər hallarda isə bu qətnamələr illərlə və onilliklərlə yerinə yetirilmir. Bu isə beynəlxalq qanunlarla ziddiyyət təşkil edir və ikili standartların bir qaydaya çevrilməsinə səbəb olur. Bir ölkə kimi biz bunun nə qədər acı olduğunu bilirik, çünki biz ikili standartlardan, beynəlxalq qanunların kobud şəkildə pozulmasından əziyyət çəkirik".

"III Qlobal Açıq Cəmiyyətlər Forumu vacib məsələlərin həlli üçün unikal imkandır"

"III Qlobal Açıq Cəmiyyətlər Forumu vacib məsələlərin həlli üçün sabiq prezidentlər, baş nazirlər, siyasətçilər, dövlət xadimlərinə gözəl imkan təqdim edir" deyən İlham Əliyev fikrini bu şəkildə davam edib: "Mən çox şadam ki, hazırda biz Bakıda belə vacib, nəzərəçarpan beynəlxalq tədbir təşkil etmişik".
Prezidentin sözlərinə əsasən, Forum üzləşəcəyimiz məsələləri müzakirə etmək, eləcə də bütün dünyada müşahidə edilən gərginliyi azaltmaq üçün unikal imkan təqdim edir.
Dövlət başçısı qeyd edib ki, Azərbaycan əsrlər boyu sivilizasiyaların görüşdüyü yer olub: "Azərbaycan Avropa və Asiya arasında təbii coğrafi körpüdür. Və əminəm ki, bu hazırda Avropa və müsəlman dünyası arasında mədəni və siyasi körpüdür".
İlham Əliyev deyib: "Cəmiyyətimizdə multikultiralizm ənənələrinin çox dərin kökləri var. Azərbaycanda siyasi strukturun formasından asılı olmayaraq müxtəlif millətlər, etnik qruplar, bütün dinlərin nümayəndələri ölkəmizdə həmişə sülh şəraitində və ləyaqətlə yaşayıblar. Bax, buna görə də Azərbaycan müstəqil dövlət olanda ölkə multikultiralizmin dünya mərkəzlərindən birinə çevrildi".
Prezidentin sözlərinə əsasən, Azərbaycan may ayında Mədəniyyətlərarası Dialoq üzrə III Beynəlxalq Forum keçirəcək: "Hər il Beynəlxalq Humanitar Forum təşkil edirik. Forumda ilk növbədə dünyanın müxtəlif millətləri arasında dinc yaşamaq, etimadın möhkəmləndirilməsi və gərginliyin azaldılması məsələləri müzakirə olunur".
Dövlət başçısı əlavə edib ki, dərin tarix və mədəniyyətə malik olan Azərbaycan 20 ildən artıqdır ki, müstəqil dövlət kimi mövcuddur.

"Azərbaycan Avropa üçün yeganə yeni qaz mənbəyidir"

Azərbaycanın Avropa üçün yeganə yeni qaz mənbəyi olmasına diqqət çəkən dövlət başçısı bildirib ki, Azərbaycan enerji daşıyıcılarının şaxələndirilməsində vacib rol oynayır: "Biz 20 ildir ki, regionda tamamilə yeni enerji xəritəsini yaradan neft strategiyasını reallaşdırırıq.
Hazırda Xəzər dənizindən neft təkcə Azərbaycandan deyil, həm də Xəzərin şərq sahillərindən beynəlxalq bazarlara çatdırılır".
Çıxışında Azərbaycanın yenidən təşəbbüskarı olduğu Avropanın iri infrastruktur layihəsinin reallaşdırılmasını vurğulayan dövlət başçısı əlavə edib ki, Cənub Qaz Dəhlizi bir neçə hissədən ibarətdir: "Bura dünyada ən iri qaz yataqlarından biri olan Azərbaycanın "Şahdəniz" yatağının işlənməsi, Cənubi Qafqaz boru kəməri, Transanadolu qaz kəməri və Transadriatik boru kəmərinin daxil olduğu yeni boru kəmərləri sisteminin tikilməsi aiddir".
İlham Əliyev bildirib ki, Bolqarıstan da Azərbaycanın enerji siyasətinin hissəsidir, Azərbaycan-Gürcüstan-Türkiyə üçtərəfli formatı isə daha böyük formata çevrildi: "Göstərilən layihələr texniki cəhətdən mürəkkəbdir və geniş əlaqələndirmə və əməkdaşlıq tələb edir. Bu məqsədlə fevralda Azərbaycanın təşəbbüsü ilə Bakıda Cənub Qaz Dəhlizinin Məşvərət Şurasının ilk iclası keçirildi. Həmin iclas sadaladığım ölkələrin bütün yüksək vəzifəli nümayəndələrinə, eləcə də ABŞ və Avropa İttifaqı Komissiyasının nümayəndələrinə bu məsələni müzakirə etməyə imkan verdi. Və biz mətbuat üçün birgə bəyanat verdik. Azərbaycanın qabaqcıl rolu dəqiq müəyyənləşdirildi".
Prezident deyib ki, Azərbaycanın 2018-2019-cu illər üzrə planına uyğun olaraq, adıçəkilən bütün layihələr reallaşdırılmalıdır: "Əminəm ki, yaxın illərdə Balkan ölkələri bizim boru kəməri sistemimizə qoşulacaq. Üstəlik, hazırda Avropada interkonnektorlar tikilir, biz bunu tam dəstəkləyirik, çünki Azərbaycan iri qaz ehtiyatlarına və tikinti mərhələsində olan infrastruktura malikdir".
Dövlət başçısı xatırladıb ki, adıçəkilən layihələr Azərbaycanın Avropa ilə əməkdaşlığının yeganə hissəsi deyil: "Biz başa düşürük ki, Avropa üçün enerjinin şaxələndirilməsi həqiqətən də milli təhlükəsizlik məsələsidir və biz də bu məsələyə eyni münasibəti göstərməliyik. Enerji təhlükəsizliyi milli təhlükəsizlikdən ayrı götürülə bilməz".
Sonra Forumda Bolqarıstanın Prezidenti Rosen Plevneliev, Makedoniyanın Prezidenti George İvanov, Maltanın Baş naziri Cozef Muskat çıxış edib.
Almaniya kansleri Angela Merkelin, Böyük Britaniyanın Baş naziri Devid Kemeronun, BMT-nin sabiq baş katibi Butros Butros-Qalinin, ABŞ-ın keçmiş dövlət katibi Henri Kissincerin müraciətləri dinlənib.
Daha sonra Latviyanın sabiq prezidenti və Nizami Gəncəvi Beynəlxalq Mərkəzinin həmsədri Vayra Vike-Freyberqa çıxış edib.

Angela Merkel Bakı Forumuna müraciət etdi

Avropada təhlükəsizliyə nail olmaq üçün dialoq, əməkdaşlıq və qarşılıqlı etimad lazımdır. Bu sözlər Almaniya kansleri Angela Merkelin Bakıda keçirilən III Qlobal Açıq Cəmiyyətlər Forumunın iştirakçılarına ünvanladığı müraciətində yer alıb.
Müraciətdə bildirilir ki, Almaniya tərəfdaşları ilə birlikdə Avropada öz dəyərlərini və dünya nizamını həmişə qoruyur.
Sənəddə qeyd edilir ki, Ümumdünya İnsan Haqları Bəyannaməsi 1948-ci ildə qəbul edilib, lakin indiyədək onun bütün prinsiplərinə riayət edilmir.
Müraciətdə deyilir: "Bu o deməkdir ki, biz hələ çox işlər görməliyik".
Sənəddə həmçinin vurğulanır ki, Almaniya intensiv dialoq yolu ilə yeni dünya nizamının inkişafında iştirak etməyə hazırdır.
Almaniya kansleri müraciətində Forum iştirakçılarına ən xoş arzularını da çatdırıb.

Henri Kissincer Bakı Forumunun böyük uğurlara nail olacağını deyir

"Bakıda keçirilən III Qlobal Açıq Cəmiyyətlər Forumu böyük uğurlara nail olacaq" - deyən növbəti çıxışçı - ABŞ-ın sabiq dövlət katibi Henri Kissincer Bakıda keçirilən III Qlobal Açıq Cəmiyyətlər Forumunun iştirakçılarına müraciətində tədbir iştirakçılarına uğurlar arzulayıb və Forumun böyük nailiyyətlər əldə edəcəyinə əminliyini bildirib.
O qeyd edib ki, Forum daha çox aktual olan çağdaş problemlərin müzakirəsi və həlli məqsədilə bütün dünyadan intellektualları bir araya toplayır.
H.Kissincer vurğulayıb ki, keçmiş dünya ənənələrinin yoxa çıxması və yeni ənənələrin yaranmasını nəzərə alarkən, bu Forum dünyanı gələcək nəsillər üçün daha münasib bir məkana çevirmək imkanı yaradır.

Abdulla Gül Birinci Avropa Oyunlarının Bakıda keçirilməsini böyük uğur adlandırdı

"Bakıda olmaqdan çox məmnunam. Bakını hər səfərimdə daha inkişaf etmiş, parlayan bir şəhər kimi görürəm və qürur duyuram. Buna görə də, başda Prezident İlham Əliyev olmaqla, xidməti olan hər kəsi təbrik etmək istəyirəm".
APA-nın məlumatına görə, bu sözləri Diasporla İş üzrə Dövlət Komitəsinin dəstəyi və Nizami Gəncəvi Beynəlxalq Mərkəzinin təşkilatçılığı ilə Bakıda keçirilən III Qlobal Forumda iştirak edən Türkiyənin sabiq prezidenti Abdulla Gül deyib.
Azərbaycan və Türkiyənin bir millətin parçası olan dövlətlər olduğunu vurğulayan A. Gül bildirib ki, hər iki ölkə bir-birinin uğurları ilə daim qurur duyur: "Bakıda keçirilən III Qlobal Forumda iştirak etməkdən böyük məmnuniyyət duyuram. Tədbirdə önəmli dövlət xadimləri var. Bu insanları Bakıya toplamaq və belə bir tədbir keçirmək böyük bir uğurdur. Bununla Azərbaycan dünyada daha da tanınır. Şübhəsiz ki, bu forumda iştirak edən insanlar sonradan Azərbaycan haqqında daha yüksək fikirdə olacaqlar və Azərbaycanla bağlı məsələləri xaricdə dəstəkləyəcəklər".
Türkiyənin sabiq prezidenti, "Eurovision" mahnı müsabiqəsi kimi, Birinci Avropa Oyunlarının da Bakıda keçirilməsinin böyük uğur olduğunu qeyd edib: "Azərbaycanın "Eurovision" mahnı müsabiqəsində birinci yeri tutması türk dünyasını sevindirmişdi. İqtisadi inkişaf, yeni layihələr təqdir olunmalıdır".