İranda hökumət əleyhinə etirazlarda 12-si azyaşlı olmaqla ən azı 304 adam ölüb. Baki-xeber.com xarici mediaya istinadən xəbər verir ki, bu barədə Amnesty International təşkilatı məlumat yayıb.
Noyabr ayında benzinin qiymətinin kəskin artması İranın bir neçə şəhər və qəsəbəsində təxminən dörd gün davam edən etirazlar ilə nəticələnmişdi. Zorakılıqlar zamanı və sonrakı günlərdə İran hakimiyyəti internetə girişi əngəlləmişdi.
Amnesty International təşkilatının Yaxın Şərq və Şimali Afrikada araşdırma və müdafiə direktoru Filip Luther İran təhlükəsizlik qüvvələrinin silahsız etirazçılara atəş açdığını və çox sayda insanın öldüyünü deyib. Londonda qərarghlanan təşkilat bildirib ki, İran hakimiyyəti minlərlə etirazçını, eləcə də jurnalistlər, hüquq müdafiəçiləri və tələbələri etiraz aksiyaları barədə danışmalarına mane olmaq üçün həbs edib.
Amnesty International, benzinin artmasına görə ölkə daxilində keçirilən etiraz aksiyaları zamanı ən azı 304 nəfərin, o cümlədən 12 uşağın öldüyünü bildirir: "İran təhlükəsizlik qüvvələri, təhlükə yaratmayan silahsız etirazçılara atəş açıb. Ölümlərin çoxu odlu silahlarla baş, ürək, boyun və digər həyati orqanların hədəf alnması nəticəsində baş verib".
İki həftə əvvəl hökumət təhlükəsizlik qüvvələrinin etirazçıları güllələdiyini və öldürdüyünü etiraf etsə də, Tehran iğtişaşların miqyası barədə hər hansı bir statistika açıqlamayıb. İranın dövlət mediası vurulan və öldürülənlərin bəzilərini "iğtişaşçılar" adlandırıb.
Sözügedən qurum bu ayın əvvəli 15-18 noyabr etirazlarında ən azı 208 adamın öldüyünü bildirmişdi. Təşkilat ölkə daxilində onlarla insanla danışdığını və etibarlı hesabatlar hazırladığını təkrarlayaraq, yeni və daha yüksək ölüm halları ilə bağlı izahat verməyib.
Hüquq müdafiə qrupu etiraz aksiyaları zamanı İranın internet əlaqəsini bağlayaraq, ölkə daxilində insanların baş verənlər və qarışıqlığın tam miqyası barədə video görüntüləri paylaşmasını blokladığını qeyd edib.
Qiymətlərin artmasına baxmayaraq, İran benzinin qiymətinin dünyada ən ucuz olduğu ölkələrdən biri olaraq qalır.
