İŞİD terror təşkilatının rəhbəri Əbubəkr əl-Bağdadi öldürüldüyü iddia edilir. Baki-xeber.com xarici mediaya istinadən xəbər verir ki, Bağdadinin ABŞ hərbçilərinin Suriyanın İdlib vilayətində keçirdiyi əməliyyat zamanı məhv edildiyi bildirilir.
Bundan əvvəl ABŞ Prezidenti Donald Tramp Twitter hesabından “Az əvvəl çox önəmli bir şey oldu” mesajını paylaşıb. Ağ Ev isə Trampın gün ərzində önəmli bir açıqlama verəcəyini bildirib, ancaq açıqlamanın nədən ibarət olduğuna dair heç nə deyilməyib.
“Newsweek” jurnalı Pentaqondakı mənbəyə istinadən, Trampın bir həftə əvvəl İŞİD lideri Əbubəkr əl-Bağdadinin hədəf alınacağı çox gizli bir əməliyyata icazə verdiyi və əməliyyatın keçirildiyi barədə məlumat yayıb.
Məlumata görə, Pentaqon rəhbərliyi Suriyanın İdlib vilayətində keçirilən əməliyyatda Bağdadinin öldüyünə inandıqları, bunu qətiləşdirmək üçün araşdırma apardıqlarını bildirilir.
İraq dövlət televiziyası İdlibdəki hücumun havadan görüntülərinin olduğunu bildirib. Sosial mediada isə İŞİD liderinin öldürüldüyü ehtimal edilən gizli əməliyyata aid olduğu iddia edilən görüntülər yayılıb.
Iddialara görə, Bağdadinin öldürüldüyü deyilən əməliyyyatda ABŞ hərbi qüvvələri helikopterlə gecəyarısı bölgəyə əsgər endirərək 4 saat davam edən qarşıdurmaya girib. Anadolu Agentliyi bildirir ki, Birləşmiş Ştatların helikopterlə eniş əməliyyatı keçirdiyi ərazi, bölgənin şimalında qaçqın düşmüş mülki şəxslərin sığındığı Turlaha düşərgəsindən bir neçə kilometr məsafədə yerləşir.
Gecə saat 00.00 radələrində bölgəyə 8 ABŞ helikopteri və 2 pilotsuz uçuş aparatı gələrək Barışa kəndi yaxınlığındakı hədəfi saat yarım ərzində atəşə tutub. Helikopterlərə yerdən ağır silahlarla qarşılıq verilib. Təxminən 1,5 saat davam edən ilk qarşıdurmalardan sonra helikopterlər bölgəni tərk edib. Yarım saatdan sonra geri dönən helikopterlər hücumu davam etdirib. Bu vaxt, helikopterlərdən ABŞ xüsusi təyinatlı qüvvələri olduğu ehtimal edilən əsgərlər yerə endirilib. Qaşıdurmanın ikinci hissəsi təxminən 2,5 saat davam edib.
Təxminən dörd saat davam edən əməliyyatdan sonra helikopterlər ərazini tərk ediblər.
Bölgəyə gələn səhiyyə qrupu, Anadolu Agentliyinə, əməliyyatın keçrildiyi nöqtədə tamamilə dağıdılmış bir ev və ətrafında yanmış bəzi çadırlar gördüklərini bildiriblər. Onlar hadisə yerində 3-ü kişi, 3-ü qadın və 1-i uşaq olmaqla cəmi 7 cəsəd tapdıqlarını, 5 yaralıya da ilkin tibbi yardım göstərdiklərini deyiblər.
Qeyd edək ki İdlibdəki Suriya hava məkanına Rusiya nəzarət edir.
Türkiyə Müdafiə Nazirliyi, ABŞ tərəfindən dünən gecə Suriyanın İdlib vilayətində keçirilən əməliyyatdan əvvəl iki ölkənin hərb qurumları arasında məlumat mübadiləsi aparıldığını açıqlayıb. Açıqlamada "ABŞ-ın dünən gecə İdlibdə keçirdiyi əməliyyatından əvvəl hərbi səlahiyyətlilər arasında məlumat və koordinasiya mübadiləsi aparılmışdır" deyilir.
