Dünyanın diqqətlə izlədiyi Mosul əməliyyatı davam edir. Amerikanın CNN televiziyası İraq ordusuna istinadən iki zirehli birliyin Mosula doğru irəlilədiyini və şəhərin ətrafındakı məhəllələrin təxminən 5 kilometrliyinə çatdığını bildirir.
Baki-xeber.com xəbər verri ki, mosullular da kütləvi şəkildə şəhərdən qaçmağa başlayıb. BMT Mosulda qaçan təxminən 900 nəfərlik ilk böyük karvanın Suriya sərhədini keçdiyini bildirir. Beynəlxalq yardım təşkilatı “Save The Children” (Uşaqları Qurtarın) isə Mosuldan son 10 gün ərzində qaçan 5 min adamın Suriyanın şimalındakı Əl Hal düşərgəsinə yerləşdiyini xəbər verir.
Şəhər sakinləri ilə yanaşı İŞİD yaraqlıları da Mosuldan qaçmağa başlayıb. Məlumata görə onlar mülki insanların arasında şəhərdən çıxmağa çalışır. Onların sığınacağı isə gözlənildiyi kimi Suriyadır. Məlumata görə dünən kürd peşmərgələr qadın paltarında Mosuldan qaçan bir neçə İŞİD komandirini ələ keçirib. İraq kəşfiyyatı Mosulda təxminən 5-6 min yaraqlı olduğunu bildirir.
Rusiyanın ordu rəhbərliyi isə İŞİD terrorçularının Mosuldan Suriyaya qaça biləcəyi ilə bağlı xəbərdarlıq edib. “İnterfax”ın bildirdiyinə görə, Moskva bunun qarşısını almaq üçün yaraqlıların görüldüyü yerdə dərhal öldürülməsini tələb edir. “Sputnik”ə açıqlama verən Mosulun keçmiş valisi Esil Nuceyfi də əməliyyat başlayandan İŞİD liderlərinin Suriyaya qaçdığına dair məlumatlar aldıqlarını deyib.
ABŞ isə terrorçuların Mosul və ətrafında kimyəvi silah istifadə edəcəyini gözləyir. Onlara görə, belə bir təhlükə çox yüksəkdir.
Mosulun azadlığı uğrunda əməliyyatların sürətlə davam etməsilə yanaşı şəhərdə gözlənilən məzhəb qarşıdurması təhlükəsi də artır. Ankara və İraq sünnilərinin əməliyyatlara qatılmalarına qarşı çıxdıqları şiə silahlı qrupu qərb cəbhəsindən türkmən qəsəbəsi Telaferə girəcəklərini elan ediblər.
Şiə qrupu “Haşdi Şabi”yə rəhbərlik edənlərdən biri Kasım Məhəmməd Şərif “Al Jazeera”yə İraq ordusu ilə birgə hərəkət edəcəklərini deyib: “Rəhbərliyim altında təxminən 300 nəfərlik bir qüvvə var. İraq ordusunun ardından bu qüvvələrlə Telaferə girəcəyik. Şimalda onsuz da peşmərgə birlikləri var. Bu bölgələrə getmək istəməyən vətəndaşların qaçışı üçün mahalın cənubu açıq olacaq. Mahalda qalan insanların təhlükəsizliyini də biz təmin edəcəyik" (Şərifin dediyi Telaferin cənubundakı bölgə də İŞİD-in nəzarətindədir).
“Reuters” xəbər verir ki, Mosul əməliyyatına qatılan İraq ordusu tankları üzərində şiələrin simvollarını daşıyır. Agentlik onların görüntülərini də yayıb. “Reuters” onların məzhəb qırğını təhlükəsini də artırdığını yazır.
“Haşdi Şabi”nin Telaferə girəcəyini elan etməsindən dərhal sonra ABŞ-dan da bir açıqlama gəlib. Amerika ordusundan general Qari Voleski, şiələri dəstəkləmədiklərini və koalisiya qüvvələrinin, Mosulun geri alınmasında sözügedən qrupu əməliyyatın bir parçası kimi görmədiyini bəyan edib.
Mosulun İŞİD-dən geri alınacağı halda şəhər rəhbərliyinin son 13 ildə beşinci dəfə əl dəyişdirəcəyinə diqqət çəkən “Independent” qəzeti isə, İraq hökumətinin Mosulda heç bir zaman sevilmədiyini, İŞİD-in yalnız bir neçə min döyüşçü ilə iki il əvvəl şəhəri ələ keçirdiyini xatırladır: "Bağdadda məzhəb savaşının baş verdiyi 2006 və 2007-ci illərdə sünnilər, amerikalı diplomatların “qorxulu adalar” kimi xarakterizə etdikləri bölgələrə sıxışdırılmışdılar. İndi İraqın başqa bölgələrində də eyni şey təkrarlanır. Digər iraqlılar sünniləri İŞİD-lə əməkdaşlıq edən bir hissə kimi görə və intiqam almağa çalışa bilər. .. Ölkədə etnik və məzhəb düşmənçiliyi hələ də dərin şəkildə hiss edilir. Mosul xalqını da bu səbəbdən qorxunc və naməlum bir gələcək gözləyir”.
Qeyd edək ki, bundan əvvəl Ankara və İraqdakı sünnilər dəfələrlə şiələrin Telaferə girməsinə qarşı olduqlarını bəyan etmişdilər.
TAHİR
