İraqın ikinci böyük şəhəri Mosulu İŞİD terrorçularından geri almaq üçün başlayan hərbi əməliyyatlar davam edir. Koalisiya qüvvələrinin də dəstək verdiyi əməliyyatda ilk 24 saatda 20 kənd İŞİD-dən azad edilib.
Əməliyyatların davam etməsinə baxmayaraq, Mosula hansı qüvvələrin girəcəyi və Türkiyə ilə rəsmi Bağdad arasında Başika böhranı da davam edir. Qeyd edək ki, iki gün əvvəl Bağdad rəhbərliyi əməliyyatların başladığını elan edərkən şəhərə yalnız İraq ordusunun girəcəyini demişdi. Açıqlamada nə kürd peşmərgənin nə də başqa qrupların adı çəkilirdi. Bu sırada təbii ki, Türkiyənin, İraq kürdlərinin israrla qarşı çıxdığı İran dəstəkli şiə silahlıların da adı çəkilmirdi.
Ancaq yayılan məlumatlara görə, şiələr döyüşlərdə İraq ordusu ilə birgə hərəkət edir.
“Reuters” xəbər agentliyi Mosul və Kərkük arasında kritik sünni şəhəri Haviceyə doğru irəliləyən ordu birliklərinin qarşısında şiə qrupların olduğuna dair xəbər yayıb. Agentliyi görə, şiələrin burada olması olabiləcək bir məzhəb qarşıdurması təhlükəsini də artırır.
Qeyd etdiyimiz kimi, buna qarşı çıxanlardan biri də Türkiyədir. Ankara ümumiyyətlə İran yönümlü İraq hökumətinin də dəstəklədiyi şiələrin Mosul əməliyyatlarında iştirakına qarşı çıxır.
Türkiyə Bağdadın etirazlarına rəğmən, Mosulda olabiləcək məzhəb qarşıdurmasını önləmək üçün təlim keçdiyi yerli sünni mosullulardan ibarət birliklə bərabər əməliyyatlarda iştirak etmək və şəhərə girməkdə israrlıdır.
Qeyd edək ki, Mosul əməliyyatını müzakirə etmək üçün Bağdada gedən türk heyətlə danışıqlar nəticəsiz başa çatıb. Müzakirələrdən sonra da İraq Xarici İşlər Nazirliyi Türkiyədən əsgərlərini geri çəkməyə çağırıb. Ancaq buna baxmayaraq, Türkiyə milli müdafiə naziri Fikri İşıq Türkiyənin Mosul əməliyyatına qatılacağını bəyan edib: "Mosul əməliyyatına təyyarələrimizin qatılması ilə bağlı koalisiya qüvvələrilə razılığa gəldik. Türkiyə olmadan, Mosulun gələcəyilə bağlı qərar vermək mümkün deyil".
Türkiyə Prezidenti Rəcəb Tayyib Ərdoğan isə bildirir ki, Mosulda şiə-sünni müharibəsi olmamalıdır: “Mosul əməliyyatı başladı. Mosul ərəb və türkmənlərin sıx yaşadığı sünnilərdən ibarət bölgədir. Şiə-sünni müharibəsi olmamalıdır. Sənin Bağdad dediyin (İraq rəhbərliyini nəzərdə tutur) tamamilə şiələrdən ibarət ordunun rejissorudur. Mosulun taleyini onlarla paylaşmağa cəhd etsək, burada şiələrlə sünniləri üz-üzə qoyacaq, sonra buranı “Haşdi Şabi”yə (şiələr) verib çıxıb gedəcək. İndi onu da danışırlar ki, 30 min nəfərlik “Haşdi Şabi” gəlir. Neçə min adamla gəlirsə-gəlsinlər, gələcəyi varsa, görəcəkləri də var”.
Bu arada “Tasnim” xəbər agentliyinə açıqlama verən şiələrin “Haşdi Sabi” təşkilatının sözçüsü Yusuf əl Kelabi Türkiyəni təhdid edib. O iddia edib ki, Türkiyənin İraqdakı Başika düşərgəsini mühasirəyə alıblar: “İraq ordusu Başika bölgəsində sürətli bir şəkildə irəliləyərək bölgəni nəzarət altına alıb və türk əsgərlərinin olduğu düşərgəni mühasirəyə alıb. İraq ordusunun bu bölgəni ələ keçirməsi Türkiyə ordusunun buradakı hərəkətlərini məhdudlaşdırır və türk əsgərləri hər hansı cəhd edərlərsə hədəfə alınacaqlar”.
O, iddia edib ki, Mosul əməliyyatının mərhələlərindən biri türk əsgərlərini əməliyyatdan uzaq saxlamaq və onları əməliyyat bölgəsindən təcrid etməkdir.
TAHİR
