ABŞ və İsrailin hücumlarından sonra bölgədə gərginlik artıb. Rusiya İrandakı Buşehr Atom Elektrik Stansiyasından 198 nəfərin təxliyə olunduğunu açıqlayıb.
Rusiyanın dövlət nüvə enerjisi korporasiyası Rosatom, İranın cənubundakı Buşehr Atom Elektrik Stansiyasında baş verən hadisələrdən sonra genişmiqyaslı təxliyə əməliyyatına başlayıb. Şirkətin baş direktoru Aleksey Lixaçev, ümumilikdə 198 nəfərin stansiyadan çıxarıldığını açıqlayıb.
Lixaçev, təxliyə edilənlərin avtobusla İran-Ermənistan sərhədinə aparıldığını bildirib və bunun indiyə qədər həyata keçirilən ən böyük təxliyə əməliyyatı olduğunu qeyd edib. Lixaçev həmçinin Rusiya Prezidenti Vladimir Putinin proseslər barədə anbaan məlumatlandırıldığını bildirib.
Bu arada, Rusiya Xarici İşlər Nazirliyinin sözçüsü Mariya Zaxarova stansiyaya edilən hücumu "qanunsuz və ehtiyatsız" addım adlandırıb və bunun beynəlxalq təhlükəsizliyə ciddi təhdid yaratdığını vurğulayıb. Açıqlamada həmçinin mülki əhali arasında itkilərə səbəb olan hücum pislənilib.
ABŞ və İsrail tərəfindən stansiyaya edilən dördüncü hücumda ən azı bir nəfərin öldüyü bildirilir. Bu hadisələr nüvə obyektlərinin təhlükəsizliyi ilə bağlı qlobal narahatlıqları artırıb.
Beynəlxalq Atom Enerjisi Agentliyinin (BAEA) baş direktoru Rafael Mariano Qrossi də nüvə obyektlərinin hədəfə alınmasının qəbuledilməz olduğunu bildirən və bütün tərəfləri təmkinli olmağa çağıran bir bəyanat yayıb. Buşehrdəki vəziyyətin kritik bir nöqtəyə yaxınlaşdığı bildirilir və bölgədəki hadisələr beynəlxalq ictimaiyyət tərəfindən diqqətlə izlənilir.
Tahir TAĞIYEV
