Yaxın Şərqdəki müharibə fonunda Avropanın aviaşirkətləri yanacaq çatışmazlığı səbəbindən uçuşları ləğv edir. "Politico" nəşri bildirir ki, Londonun Hitrou və Böyük Britaniyanın digər hava limanlarında yanacaq böhranı səbəbindən uçuşların ləğvi artıq başlayıb.
Regional aviaşirkət "Skybus" aviayanacaq qiymətlərinə görə bir marşrutu dayandırıb. Enerji təhlili şirkəti "Kpler"in proqnozuna görə, növbə Fransanın hava limanlarına çatıb. "Bizim hesablamalarımıza görə, Böyük Britaniyadan sonra Fransa tələb və təklif arasında ən böyük kəsirə malikdir", - deyə şirkətin neft analitiki Corc Şou bildirib. O qeyd edib ki, bununla belə, Fransa Körfəzdən kənar mənbələrdən əlavə yanacaq əldə etmək üçün yaxşı mövqedədir. ABŞ və İsrail tərəfindən İrana qarşı başlanan müharibə Tehranı Hörmüz boğazını əksər gəmilər üçün bağlamağa vadar edib və bu, qlobal enerji bazarlarını pozub. Bu yaxınlara qədər dünya xammalının təxminən beşdəbir hissəsi bu su yolundan keçirdi. İxtisaslaşmış "Argus" nəşrinin məlumatına görə, Avropada reaktiv yanacağın qiymətləri cümə günü rekord həddə - metrik ton üçün 1900 dollara çatıb. İndiyə qədər qitənin hava limanlarında təyyarələrin uçuşunu təmin etmək üçün kifayət qədər yanacaq var, lakin "Argus" potensial çatışmazlıqlar barədə xəbərdarlıq edib. Nəşrin proqnozuna görə, Portuqaliyada dörd ay, Macarıstanda beş ay, Danimarkada altı ay, İtaliya və Almaniyada yeddi ay, Fransa və İrlandiyada isə səkkiz ay ərzində reaktiv yanacaq ehtiyatları tükənə bilər. Polşa reaktiv yanacaqla özünü təmin edir, ona görə də böhranla üzləşmə ehtimalı azdır. "Yaxın Şərqdəki mövcud vəziyyət və onun nə qədər davam edəcəyi ilə bağlı qeyri-müəyyənlik növbəti bir neçə həftə və bir ay ərzində Avropada reaktiv yanacağın mövcudluğu ilə bağlı narahatlıqlar yaradır", - deyə "Airlines for Europe" lobbisinin idarəedici direktoru Uraniya Georgutsakou bildirib. "Ryanair" aviaşirkətinin baş direktoru Maykl O'Liri bildirib ki, müharibənin may və ya iyun aylarında davam edəcəyi təqdirdə iyun və iyul ayları arasında uçuşların 5,10 faizini ləğv etməyi düşünür. Aviaşirkətin rəhbəri xəbərdarlıq edib ki, marşrutları seçmək üçün çevikliyə malik olmayacaq. Yaxın Şərqdəki müharibədən əvvəl belə, aviaşirkətlər blokun struktur kerosin kəsiri ilə üzləşdiyini bildirmişdilər, Bu, qismən Rusiya neftinə qarşı sanksiyalar və Avropanın emal gücünün azalması səbəbindəndir. Avropanın reaktiv yanacaq istehsalı əsasən Yaxın Şərqdən xammal idxalına əsaslanır. Beynəlxalq Hava Nəqliyyatı Assosiasiyasının (IATA) aviaşirkət lobbisi ötən il xəbərdarlıq edib ki, Avropa uzun müddətdir reaktiv yanacağın xalis idxalçısıdır və bu tədarük regional tələbatın təxminən 30 faizini təşkil edir. "İdxaldan asılılıq infrastrukturun qeyri-bərabər inkişafı ilə birlikdə geosiyasi şoklar və ya sanksiyalar səbəbindən qlobal reaktiv yanacağın mövcudluğunu daha da məhdudlaşdırarsa, lokal çatışmazlıqlar və qiymət dəyişkənliyi riski artacaq", - deyə IATA təhlilində yazıb. Avropanın hava nəqliyyatı təşkilatı "Eurocontrol"a görə, münaqişənin hazırkı formasında davam edəcəyi təqdirdə yay aylarında hər gün marşrutların dəyişdirilməsi 1150 reysin ləğv olunması ilə nəticələnə bilər. "Döyüşlər nə qədər uzun sürərsə, yanacaq qiymətlərinin artması baxımından tələbata bir o qədər böyük təsir göstərər, dünyanın bir çox yerində potensial olaraq aviayanacaq çatışmazlığı artar ki, bu da uçuşların həcminə və qiymətlərinə təsir göstərə bilər", - deyə "Eurocontrol" bildirib.
İRADƏ
