Belçikanın baş naziri Bart De Vever Aİ liderlərini Ukraynaya kredit vermək üçün dondurulmuş Rusiya aktivlərindən istifadə edərkən ortaya çıxa biləcək potensial maliyyə risqlərini bölüşməyə məcbur edən sənəd imzalamağa çağırıb. Bununla belə, baş nazir vurğulayıb ki, bütün müttəfiqlər Ukraynanın dəstəklənməsinə töhfə verərsə, bu vasitəyə əl atmağa ehtiyac qalmaz.
Bart De Vever bildirib ki, Rusiya aktivlərinin ələ keçirilməsinə icazə verməzdən əvvəl hüquqi aspektlər və maliyyə risqləri ilə bağlı məsələyə aydınlıq gətirilməlidir. Baş nazir bununla bağlı Avropadakı müttəfiqlərindən hələ ki, cavab almadığını bildirib.
Xatırladaq ki, Belçikada yerləşən beynəlxalq depozitar təşkilatı "Euroclear"da Rusiyanın 191 milyard avro dəyərindəki aktivləri dondurulub.
Bu arada, “Bloomberg”, Avropa İttifaqının Rusiya Mərkəzi Bankının dondurulmuş ehtiyatlarını “kompensasiya krediti” kimi Ukraynaya yönəldəcəyi təqdirdə, Kremlin Rusiyada fəaliyyət göstərən Qərb şirkətlərinin aktivlərini geniş şəkildə milliləşdirməyə hazırlaşdığını yazıb.
Məsələ ilə bağlı məlumatlı mənbələrin bildirdiyinə görə, prezident Vladimir Putinin imzaladığı yeni fərmanla ələ keçirilən şirkətlərin dərhal satılması nəzərdə tutulur. Bu çərçivədə qiymətləndirmə müddəti 10 günə endirilib, mülkiyyətin ötürülməsi və qeydiyyat prosedurlarının müddəti də qısaldılıb. Satış prosesi ilə dövlətin nəzarətində olan “Promsvyazbank” məşğul olacaq.
İndiyədək Kreml, birbaşa özgəninkiləşdirmədən yayınıb, əvəzində xarici şirkətlərin aktivlərini müvəqqəti administrasiyalara ötürüb, rus investorlarına güzəştli qiymətlərlə satmağı hədəfləyirdi. Lakin “Bloomberg”in məlumatına görə, Aİ-nin təxminən 200 milyard avro dəyərində Rusiya aktivlərindən istifadə etməyə hazırlaşdığına dair xəbərlər Moskvanın bu siyasəti dəyişməsinə səbəb olub.
TAHİR
