Rusiyada prokurorluq rüşvət işi üzrə mühakimə olunan general-mayor Aleksandr Oqloblinə 12,5 il həbs cəzası istəyib.
Oqloblin Rusiya Silahlı Qüvvələrinin Baş Rabitə İdarəsinin 1-ci şöbəsinin planlaşdırma şöbəsinin keçmiş rəisi olub. O, 2024-cü ilin oktyabrında “xüsusilə külli miqdarda rüşvət almaq” ittihamı ilə saxlanılıb. Məhkəmə zamanı o, 12 milyon rubl (təxminən 135 min dollar) rüşvət aldığını etiraf edib.
Bu arada, Rusiya müdafiə nazirinin keçmiş müavini general Timur İvanov yenidən məhkəmə qarşısına çıxarılıb. Prokurorluq general Timur İvanovun ümumi dəyəri 1,2 milyard rubl olan aktivlərinin dövlətin xeyrinə müsadirə edilməsini tələb edir.
Prokurorluğun məlumatına görə, müdafiə nazirinin müavininin 2016-2024-cü illər arasında əldə etdiyi rəsmi gəlir onun sahibi olduğu əmlakların dəyərindən qat-qat azdır. Üstəlik, fərq bir milyard rubldan çoxdur.
Generalın oğurladığı milyonları qohumlarının adına keçirmək və müxtəlif ofşor şirkətlərinə köçürmək cəhdləri isə uğursuz alınıb. İstintaq onun 1,239 milyard rubl dəyərində aktivlərinin olduğunu ortaya çıxarıb. General saxlanan zaman ondan nağd şəkildə 333 milyon rubl və xarici valyuta 235 milyon rubl dəyərində qızıl-zinət əşyaları və saatlar aşkarlanıb. Bundan başqa, Moskvada, Moskva vilayətində, Tver vilayətində və Kareliyada müxtəlif daşınmaz əmlaklara, 23 avtomobilə və 13 premium motosikletə, bahalı rəsmlərə, nadir silahlara, antik kitablara sahib olduğu ortaya çıxıb.
İvanov 2024-cü ilin aprelində həbs edilib. Onun barəsində hazırda üç cinayət işi gedir, Moskva Şəhər Məhkəməsi onu "ən yüngül " hesab etdiyi birinci iş üzrə 13 il müddətinə azadlıqdan məhrum edib. “İnterkommertsbank”dan 3,9 milyard rublun oğurlanması ilə bağlı ikinci iş hazırda araşdırılır. Üçüncü cinayət işi isə təqribən 1,3 milyard rubl rüşvət almaq ittihamı ilə bağlıdır.
Hər iki cinayət işi son illərdə Rusiya ordusunda ortaya çıxan səs-küylü korrupsiya araşdırmalarının bir hissəsi hesab olunur. Xüsusilə Rusiyanın müdafiə və təhlükəsizlik qurumlarının yüksək rütbəli məmurlarına qarşı rüşvət və mənimsəmə ittihamları son vaxtlar tez-tez baş verir.
Məsələn, son illərdə bir neçə hərbi vəzifəli şəxs satınalma prosesində qanun pozuntularına yol verməkdə və dövlət vəsaitlərini mənimsəməkdə ittiham olunur. Belə hallar həm ictimaiyyət, həm də beynəlxalq mətbuat tərəfindən diqqətlə izlənir.
TAHİR
