İranın xarici işlər naziri Abbas Araqçi “Fox News” telekanalına müsahibəsində bildirib ki, ölkədə uranın zənginləşdirilməsi prosesi müvəqqəti dayandırılıb.
ABŞ tərəfindən nüvə obyektlərinə zərbələr endirilməsindən sonra İranda uranın zənginləşdirilməsi davam etmir, amma Tehran bunu milli qürur məsələsi hesab edərək prosesdən imtina etmək niyyətində deyil.
Abbas Araqçi bildirib: “Hazırda proses dayandırılıb, çünki obyektlərə ciddi ziyan dəyib. Eyni zamanda, biz zənginləşdirmədən imtina etmək fikrində deyilik, çünki bu, alimlərimizin nailiyyətidir, üstəlik milli qürur məsələsidir”. Nazir əlavə edib ki, İranın Atom Enerjisi Təşkilatı hazırda nüvə obyektlərinə dəyən zərərin həcmini və zənginləşdirilmiş uran ehtiyatlarının vəziyyətini qiymətləndirir.
Bundan əvvəl “NBC News” telekanalı təfərrüatları açıqlamadan ABŞ-ın zərbələri nəticəsində İranın yalnız bir nüvə obyektinin zədələndiyini bildirmişdi. Ağ ev bu məlumatı təkzib edib.
CNN telekanalının iyunun 24-də verdiyi məlumata görə, ABŞ kəşfiyyatı hesab edir ki, İrana zərbələr respublikanın nüvə proqramının əsas komponentlərinin məhvinə gətirib çıxarmayıb. Kəşfiyyatın ilkin qiymətləndirməsinə görə, hücum böyük ehtimalla Tehranın nüvə silahı əldə etməsini bir neçə ay gecikdirib. Belə qənaətə ABŞ Müdafiə Kəşfiyyat İdarəsi gəlib. Eyni zamanda, bu qənaətin doğru ola bilməyəcəyi də qeyd olunub.
Hələ iyunun 25-də Prezident Donald Tramp və müdafiə naziri Pit Heqset ABŞ kəşfiyyatının yeni məlumatlarına istinad edərək İranın İsfahan, Natanz və Fordoda iyunun 22-nə keçən gecə vurulmuş nüvə obyektlərinin faktiki olaraq yer üzündən silindiyinə əminlik ifadə ediblər. Bundan əlavə, Ağ ev əmin edib ki, Vaşinqtonda olan məlumata görə, İran bu komplekslərdən nüvə materiallarını əvvəlcədən çıxara bilməyib.
ZÜMRÜD
