Quzey Kıbrıs Türk Cümhuriyyətinin (KKTC) Prezidenti Ersin Tatar 16–17 iyul tarixlərində Nyu-Yorkda keçiriləcək 5+1 formatındakı görüşdən öncə dəyərləndirmələr edib.
O, yeni keçid qapılarının açılması məsələsində uzlaşmaz mövqe sərgiləyən rum rəhbəri Nikos Hristodulidisi tənqid edib. Ersin Tatar son günlərdə Metaxan keçid məntəqəsində Cənubi Kipr mənbəli yaşanan çətinliklərin, Haspolat qapısının açılması ilə bağlı israrlı mövqelərinin nə qədər doğru olduğunu bir daha ortaya qoyduğunu vurğulayıb. O qeyd edib ki, Nyu-Yorkdakı görüş zamanı Haspolat və Akıncılar bölgələrində yeni keçid qapılarının açılması məsələsini gündəmə gətirəcək. KKTC lideri keçid qapıları ilə bağlı həssaslığını hər platformada dilə gətirdiyini, bu mövzunu Cenevrədə də yenidən gündəmə gətirdiyini, lakin Hristodulidisin mart ayından bəri konstruktiv mövqe sərgiləmədiyini bildirib. Nyu-Yorkda keçiriləcək görüşün əhəmiyyətinə toxunan Ersin Tatar bütün görüşlərə iki dövlətin əməkdaşlığı prizmasından baxdıqlarını qeyd edib. O, ortaq zəmin yaranacağı təqdirdə danışıqlar masasının qurula biləcəyini, bununla yanaşı, iki tərəf arasında konstruktiv münasibətlərin davam etdirilməsinin vacib olduğunu söyləyib. Prezidentliyi dövründə texniki komitələrin fəaliyyət göstərməsi üçün çalışdıqlarını bildirən Ersin Tatar rum tərəfinin zaman-zaman problemlər yaratdığını, KKTC rəsmilərini tərəf olaraq qəbul etmək istəmədiyini qeyd edib. Rum tərəfinin KKTC rəsmilərini tərəf kimi qəbul etməsinin onların statusunun yüksəlməsi mənasına gəldiyini düşündüyünü deyən Tatar, buna baxmayaraq, zəlzələ komitəsi, gənclik komitəsi kimi məsələlərdə uğur əldə edildiyini dilə gətirib. Ara bölgədə günəş enerjisi investisiyası mövzusunun tıxandığını bildirən Tatar rum tərəfinin istehsal olunan bütün enerjinin Cənubi Kiprə verilməsini, daha sonra KKTC-yə pay ayrılmasını istədiyini, bunun isə qəbuledilməz olduğunu qeyd edib. “Halbuki olması gərəkən, ara bölgədən hər kəsin öz payını almasıdır”, – Ersin Tatar əlavə edib. Rum tərəfinin özünü Kıbrısın sahibi, Kıbrıs türklərini isə sadəcə bir icma olaraq gördüyünü ifadə edən Tatar əsl mübahisənin mənbəyinin də bu olduğunu vurğulayıb. İki dövlətli siyasətin davam etdiriləcəyini və Türkiyənin də bu siyasəti dəstəklədiyini bildirən Tatar suveren bərabərlik və bərabər beynəlxalq status qəbul olunmadan rəsmi danışıqlara keçilməyəcəyini vurğulayıb. Əsas tələb kimi “3-D” – birbaşa uçuş, birbaşa ticarət, birbaşa təmas və izoliyaların aradan qaldırılması məsələsini gündəmə gətirdiklərini qeyd edən Tatar Birləşmiş Millətlər Təşkilatının bunu həyata keçirməyə çalışdığını, lakin rum tərəfinin bunu qəbul etmədiyini bildirib. Holquinin də ortaq zəminin olmaması səbəbilə federasiya danışıqlarının başlamasının mümkün olmadığını söylədiyini çatdıran Tatar Nyu-Yorkda keçiriləcək görüşün əməkdaşlıq yönümlü olacağını ifadə edib. Ersin Tatar altı başlıq xaricində başqa mövzular gündəmə gələrsə, qayıtdıqdan sonra onların üzərində işləyəcəklərini bildirib.
SAMİRƏ
