ABŞ Prezidenti Donald Tramp cümə günü Ukrayna Prezidenti Volodimir Zelenski ilə danışdıqdan sonra Ukraynanın müdafiəsi üçün Patriot raketlərinə ehtiyacı olduğunu bildirib və Rusiya Prezidenti Vladimir Putinin döyüşləri dayandırmaqdan imtina etməsinə görə narazılığını ifadə edib.
Baki-xeber.com-un məlumatına görə,Tramp, Air Force One təyyarəsində jurnalistlərə açıqlamasında Zelenski ilə yaxşı bir telefon danışığı keçirdiyini deyib və bir gün öncə Putinlə olan zəngdən "çox narazı" olduğunu təkrarlayıb. O, Rusiyanın atəşkəsə razılaşmaq istəmədiyini bildirib.
Zelenskinin Patriot raketləri ilə bağlı müraciətinə cavab olaraq Trampdan soruşulub ki, ABŞ Ukraynaya əlavə bu sistemləri verməyə razı olacaqmı? Tramp cavabında deyib: “Onlar bu raketləri müdafiə üçün ehtiyac duyurlar... Çünki çox sərt zərbələr alırlar və nəyəsə ehtiyacları var.”
Tramp Patriot raketlərinin yüksək effektivliyini tərifləyib, onları “olduqca möhtəşəm” adlandırıb.
Atəşkəslə bağlı perspektivlər barədə suala cavabında Tramp deyib: “Bu, çox çətin bir vəziyyətdir... Putinlə olan zəngimdən çox narazı qaldım. O, sona qədər getmək, insanları öldürməyə davam etmək istəyir – bu, yaxşı deyil.”
Zelenski Telegram kanalında paylaşdığı mesajda, Ukraynanın səmasını qorumaq qabiliyyətini artırmaq üzərində işləmək barədə razılığa gəldiklərini bildirib. O, həmçinin ABŞ lideri ilə birgə müdafiə istehsalı, birgə satınalmalar və investisiyalar mövzusunu müzakirə etdiklərini də əlavə edib.
Ukrayna, Rusiyanın artan hava hücumları fonunda şəhərlərinin müdafiəsi üçün daha çox Patriot raket sistemi istəyir və bu tələbi dəfələrlə Vaşinqtona çatdırıb.
Vaşinqtonun bəzi silah tədarükünü dayandırmaq qərarı Kiyev tərəfindən tənqid edilib və bildirilib ki, bu addım Ukraynanın Rusiyanın hücumları və cəbhə irəliləyişlərinə qarşı müdafiəsini zəiflədə bilər. Almaniya isə bu boşluğu doldurmaq üçün Patriot sistemləri almaqla bağlı danışıqlar apardığını bildirib.
Tramp-Zelenski telefon danışığı ilə bağlı məlumatlı mənbə Reuters agentliyinə bildirib ki, prezidentlər arasında “çox yaxşı” söhbət olub və nəticədə Patriot raketlərinin tədarükünün bərpa olunacağına ümid var.
Nərgiz QƏHRƏMANOVA Azərbaycan Universitetinin Humanitar və sosial elmlər fakültəsinin I kurs tələbəsi
