İran hakimiyyəti İsrail və ABŞ-ın ölkədəki nüvə obyektlərinə hücumlarını qanuniləşdirməkdə və onları qınamamaqda ittiham etdikləri MAQATE-nin direktoru Qrossini Təl-Əviv administrasiyasının hərəkətlərini dəstəkləməkdə və İranın milli təhlükəsizliyinə qarşı xəyanət etməkdə ittiham edir.
İran lideri Ayətullah Əli Xamneyinin baş müşaviri və parlamentin keçmiş sədri Əli Laricani X hesabında paylaşdığı mesajda “Müharibə bitəndə Qrossini hesaba çəkəcəyik” deyib. Bunun ardınca isə, iyunun 25-də İran parlamenti İsrail və ABŞ-ın son hücumlarını pisləməməsinə cavab olaraq Beynəlxalq Atom Enerjisi Agentliyilə bütün əməkdaşlığı dayandırmağı nəzərdə tutan qanun layihəsini böyük səs çoxluğu ilə təsdiqləyib. İran parlamentinin qəbul etdiyi qanunları təsdiq edən orqan olan Keşikçilər Şurası isə iyunun 26-da qanunu təsdiqləyib.
Qanuna görə, heç bir MAQATE müfəttişinin ölkəyə buraxılmayacaq və nüvə fəaliyyətləri ilə bağlı agentliyə hesabat verilməyəcək. İranın yüksək rütbəli məmurları tərəfindən “casus” kimi qələmə verilən MAQATE-nin direktoru Qrossi ilə hökumətin əməkdaşlığı da qanunla qadağan edilib.
Bunun ardınca Qrossi İranın MAQATE ilə əməkdaşlığı dayandırmaq qərarından “çox narahat olduğunu” bildirib. Qrossi həmçinin İranın nüvə obyektlərinə baş çəkmək istədiyini bildirib və yoxlamaların davam etdirilməsi üçün xarici işlər naziri Abbas Ərakçiyə məktub yazıb.
Ərakçi isə Qrossinin tələbi ilə bağlı X hesabında paylaşdığı mesajda onu "vəzifəsinə xəyanət etmək"də günahlandırıb. Ərakçi Qrossinin nüvə obyektlərinə edilən hücumları qınamamasını tənqid edib və Qrossinin təhlükəsizlik tədbirləri bəhanəsi ilə bombalanmış əraziləri ziyarət etməkdə israr etməsini mənasız və ehtimal ki, “pis niyyət" adlandırıb.
İranda dövlətə məxsus “Keyhan” qəzeti isə yazıb ki, “Qrossi İrana daxil olarsa, o, casusluq ittihamı ilə mühakimə olunmalıdır”. Mövzu ilə bağlı açıqlama verən parlament sədrinin müavini Məhəmməd Hacıbabayi, İranın bundan sonra Qrossinin ölkədə olmasına və MAQATE tərəfindən ölkənin nüvə obyektlərinə yeni müşahidə kameralarının quraşdırılmasına icazə verməyəcəyini bildirib.
TAHİR
