Bunu ABŞ prezidenti Donald Tramp deyib. "Bunlar etirazçı deyil, iğtişaşçılar və üsyançılardır", - deyə Tramp bazar günü Truth Social sosial şəbəkəsində qeyri-qanuni mühacirlərin kütləvi saxlanmasına qarşı Los-Ancelesdə davam edən etiraz aksiyalarını dəyərləndirərkən yazıb. "Bunlar pullu iğtişaşlardır", -deyə Amerika lideri iddia edib. Trampın sözlərinə görə, Kaliforniya qubernatoru Qevin Nyusom və Los Angeles meri Karen Bass “dəhşətli iş gördüklərinə” və “davam edən iğtişaşlara” görə şəhər sakinlərindən “üzr istəməlidirlər”. Məlum olduğu kimi,bazar günü Los-Ancelesdə etiraz aksiyaları zamanı iki polis məmuru yaralanıb. Hüquq-mühafizə orqanları bir hissəsi nümayişçilər tərəfindən bağlanmış şəhərin əsas magistral yolunu nəqliyyatın hərəkəti üçün təmizləməyə çalışır. Yerli medianın məlumatına görə, etirazçılar polis əməkdaşları ilə toqquşur, onlara şüşə parçaları və daş atırlar. İğtişaşçılar ən azı beş avtomobili yandırıblar. Los-Ancelesdə qeyri-qanuni mühacirlərin hakimiyyət tərəfindən kütləvi saxlanmasına qarşı etirazlar üçüncü gündür ki, davam edir. Ağ Ev rəhbərinin müavini Stiven Miller bu nümayişləri iğtişaşlar adlandırıb və miqrantların kütləvi deportasiyası prosesində iştirakdan imtina edən Los-Anceles polisinin mövqeyini tənqid edib. Tramp isə Kaliforniya qubernatorunun başının üzərindən iğtişaşlarla mübarizə üçün Milli Qvardiyanın 2000 əsgərinin göndərilməsini əmr edib.
Surxay Əliyev
