Qazaxıstan prezidenti Kasım-Jomart Tokayev Ruslan Jaksylykovun müdafiə naziri vəzifəsindən azad edilməsi haqqında sərəncam imzalayıb. Onu əvvəllər Qazaxıstan Silahlı Qüvvələrinin Hava Hücumundan Müdafiə Qüvvələrinin baş komandanı postunu tutmuş general-leytenant Dauren Kosanov əvəzləyib. İstefanın səbəbləri açıqlanmayıb. Bununla belə, KİV-də və hərbi bloqer Mixail Zvinçukun “Rybar” Telegram kanalında yazılanlara görə, Jaksylykovun istefası onun Rusiyayönümlü ritorikası və Astanada narazılığa səbəb olan daxili qalmaqallarla bağlıdır. Belə ki,2022-ci ilin yanvarından Müdafiə Nazirliyinə rəhbərlik edən Ruslan Jaksylykov bir sıra mübahisələrin mərkəzində olub.O, Türkiyənin “Otokar” zirehli maşınlarının alınması ilə bağlı korrupsiya qalmaqallarına, habelə Ukraynada səfərbərlik üsulları ilə müqayisə edilən çağırışçıların ölümü və çağırışçıların məcburi saxlanması hallarına görə tənqid edilib. Onun 2025-ci ilin aprelində Rusiyanın müdafiə naziri Andrey Belousovla görüşündə verdiyi bəyanatlara isə xüsusi diqqət yetirilib. Jaksylykov Rusiya və Qazaxıstan hərbçilərini “silah qardaşları” adlandırıb və mayın 7-də Astanada keçirilən paradın Vətən Müdafiəçiləri Gününə deyil, Böyük Qələbəyə həsr olunduğunu vurğulayıb. Müdafiə nazirinin bu sözlər naziri Moskvaya həddən artıq loyallıqda ittiham edən qazax milli vətənpərvərlərinin kəskin reaksiyasına səbəb olub.Maraqlıdır ki, Jaksylykovun istefası Qazaxıstanın Qərb ölkələri ilə hərbi əməkdaşlığının güclənməsi ilə eyni vaxta düşüb. İyunun 6-da, fərmandan üç gün əvvəl Astana Böyük Britaniya ilə hərbi əməkdaşlıq haqda sazişi imzalayıb və analitiklərin fikrincə, bu, NATO ilə yaxınlaşma istiqamətində atılan addımın bir hissəsidir. Rybar Telegram kanalı isə iddia edir ki, Jaksylykov Rusiyadan uzaqlaşmaq və Qərblə əlaqələri gücləndirmək məqsədi daşıyan “yeni siyasi kursun girovuna” çevrilib. Qazaxıstan KTMT-nin üzvü kimi ənənəvi olaraq Moskva və Qərb tərəfdaşları arasında balanslaşdırılmış siyasət yürüdüb, lakin Astananın son addımları, o cümlədən NATO təlimlərində iştirak və ABŞ ilə əlaqələrin genişləndirilməsi prioritetlərin dəyişdiyini göstərir.
Surxay Əliyev
