Imamoğludan sonra Özgür Özəlin də həbsinə hazırlıq başladı
Cümhuriyyət Xalq Partiyasının (CHP) sədri Özgür Özəl haqqında İstanbul Baş prokuroru Akın Gürleklə bağlı verdiyi ifadələrə görə istintaq başladıldı. Baş Prokurorluğun bəyanatında deyilir ki, araşdırmaya səbəb “ədliyyə işçisinin öz vəzifəsini yerinə yetirməsinə mane olmaq üçün hədələmə” və “dövlət məmurunu vəzifə borcuna görə açıq şəkildə təhqir etməsi” olub.
YILMAZ TUNÇDAN AÇIQLAMA
Araşdırmalardan sonra ədliyyə naziri Yılmaz Tunç sosial media hesabından açıqlama verib. Tunçun açıqlamasında deyilir: “CHP sədrinin Baş Prokurorumuzu və məhkəmə üzvlərini hədəfə alan təhdid xarakterli açıqlamaları tamamilə qəbuledilməzdir. Heç kim bizim ədliyyə üzvlərimizi hədəfə ala, hədə-qorxu ilə hakimliyə istiqamət verə bilməz. Bu ehtiyatsız və məsuliyyətsiz bəyanatlar birbaşa Hüquq Dövlətini və məhkəmə hakimiyyətinin müstəqilliyini hədəf alır. Konstitusiyamızın 138-ci maddəsində vurğulanır ki, hakimlər və prokurorlar öz vəzifələrini heç bir şəxsdən, hakimiyyətdən və ya orqandan göstəriş almadan, yalnız qanuna və vicdana uyğun yerinə yetirirlər. Türkiyə məhkəmə sistemi müstəqil və qərəzsiz olaraq öz vəzifələrini davam etdirir. Hakim və prokurorlarımız təhdidlərə boyun əyməyəcəklər; ədalət tərəzisi heç bir təzyiqə məruz qalmadan, yalnız qanunla işləməyə davam edəcək”.
Cümhuriyyət Xalq Partiyasının (CHP) Qaziosmanpaşada təşkil etdiyi “Xalq İradəsi Yanındadır” toplantısında çıxış edən Özgür Özəl prezident Rəcəb Tayyib Ərdoğanı tənqid atəşinə tutub. İBB ilə bağlı aparılan araşdırmaları “sui-qəsd” adlandıran Özəl, İstanbul Baş prokuroru Akın Gürleki də tənqid etmişdi. İBB əməliyyatlarında nəzarətə alınanların xəstəxanaya aparıldığı görüntülərə reaksiya verən Özəl deyib: “Onların təyin etdikləri adamlar prokuror paltarında çevrilişi həyata keçirirlər, biz bu çevrilişə müqavimət göstərəcəyik!"
Surxay Əliyev
