Rusiyanın Ukraynaya atdığı qanadlı raket Polşa ərazisinə düşüb. Polşanın Baş naziri Mateuş Moravetski Təhlükəsizlik və Müdafiə üzrə Hökumət Komitəsinin təcili iclasını çağırıb. Polşa mediasının məlumatına görə, Przevodovda (Ukrayna ilə sərhəddən 10 kilometr aralıda) taxıl qurutma zavodunda partlayış baş verib.
Yanğınsöndürmə idarəsi iki nəfərin öldüyünü bildirib. Əraziyə giriş məhdudlaşdırılıb. Hadisənin dəqiq səbəblərini və şəraitini müəyyən etmək üçün yanğınsöndürənlər və polis hadisə yerindədir. Yerli sakinlər iki partlayış səsi eşitdiklərini bildirirlər. Polşa ordusunun hərbi birləşmələri hadisə yerinə və ətraf ərazilərə yerləşməyə başlayıb. Polşa Hərbi Hava Qüvvələri isə Tomaşov-Lubelski aerodromundan döyüş təyyarələrini havaya qaldırıb.
Rusiya Müdafiə Nazirliyi Polşa KİV-nin və rəsmilərinin guya Rusiya raketlərinin Pşevodov ərazisinə düşməsi ilə bağlı bəyanatlarını təxribat adlandırıb.
Bu barədə Rusiya Müdafiə Nazirliyi məlumat yayıb: “Polşa mətbuatının və rəsmilərinin Rusiya raketlərinin Pşevodov yaşayış məntəqəsi ərazisinə guya düşməsi ilə bağlı bəyanatları vəziyyəti gərginləşdirmək üçün qəsdən törədilmiş təxribatdır. Ukrayna-Polşa sərhədi yaxınlığındakı hədəflərə Rusiya silahları ilə heç bir zərbə endirilməyib”.
Müdafiə Nazirliyi vurğulayıb ki, Polşa mediasının hadisə yerindən yaydığı qalıqların fotoşəkillərinin Rusiya silahları ilə heç bir əlaqəsi yoxdur. Qeyd edək ki, Polşa NATO üzvüdür. NATO nizamnaməsinin 5-ci maddəsinə əsasən, əgər bir NATO üzvü silahlı hücumun qurbanı olarsa, Alyansın bütün digər üzvləri bu zorakılıq aktını bütün NATO ölkələrinə qarşı silahlı hücum hesab edəcək və hücuma məruz qalmış NATO ölkəsinə kömək etmək üçün lazım bildikləri tədbirləri görəcəklər.
Bu hadisə NATO-nun Rusiyaya qarşı açıq müharibəyə başlaması üçün əsas ola bilərmi?
Hərbi-siyasi ekspert Emin Həsənli “Bakı-Xəbər”ə açıqlamasında bildirdi ki, bu hadisə ilkin baxışdan bilərəkdən baş vermiş hadisə olduğu qənaətini yaradr: “Rusiya Ukraynada belə bir ağır vəziyyətlə üz-üz qaldığı halda, yenidən dünyanı öz üzərinə gətirmək istəməyəcək. Onsuz da dünya birliyi bu hadisədə Ukraynaya hər cür dəstək verdi ki, Rusiyanın üzərinə getsin. Ancaq bunu açıq şəkildə etsələr də, NATO ordusu prosesə qoşulmadı. Ukraynanın ordusu ilə müharibədə məğlub durumda olan Rusiya iqtisadiyyatının bu halında NATO ilə üz-üzə gəlmək istəməz. Ona görə də, Polşaya atılan raketin də indiki anlamda heç bir mənası yoxdur. İlkin dövrlər atılsaydı, Avropaya mesaj verilərdi ki, Ukraynanı siz dəstəkləyirsiz, silah verirsiz, ona görə də, mən Avropaya da hücum edəcəyəm. Bu, Avropanı hardasa qorxuda bilərdi. Amma indiki anlamda bunun heç bir məqsədi yoxdur. Onlar Rusiyanın bir neçə günə Kiyevi alacağını Putin səviyyəsində bəyan edirdisə, artıq ard-arda məğlub olaraq geri çəkilməsini, ərazilərin hamısını döyüşlə itirməsini hər kəs görür. Eyni zamanda, Rusiya kimi hərbi sənaye kompleksilə öyünən bir dövlət İrandan uçuş aparatları alır, başqa dövlərlərə müraciət edir ki, silah ehtiyatı kifayət qədər deyil. Döyüş aparma potensialı olan ən elitar hərbi hissələri orada məglubiyyətə düçar olub. Rusiyanın illərlə hazırlığı olan elitar hissələrin hamısı sıradan çıxıb, səfərbərlik istəyi uğursuzluqla nəticələnib. Son müharibə onu göstərdi ki, raketləri də dəqiq vuran raketlər deyil. 10 - 15 km səhv edə bilir. O ki qaldı NATO-nun açıq müharibəyə qoşulmağına, NATO da buna getməyəcək. Çünki NATO onsuz da bütün gücü ilə Ukraynada bu müharibəni aparır. Bu müharibə Ukrayna-Rusiya müharibəsi deyil. Bu, NATO - Rusiya müharibəsidir. Amerika başda olmaqla, İngiltərə, Polşa, Almaniya hər bir vacib silahlarının hamısını Ukraynaya verib. Ukrayna ordusunu zamanında hazırlayıb. Hər cür maddi dəstək verilib. Bu müharibənin bir məqsədi də var ki, ABŞ NATO-nu, onun dövlətlərini öz nəzarətində saxlasın. Niyə? NATO və Varşava Birliyi bir - birinə qarşı idi. SSRİ dağıldıqdan, Varşava Paktı gündəmdən çıxandan sonra dünyada belə bir fikir yaranırdı ki, NATO - ya nə ehtiyac var? Xüsusən də, Avropanın bir neçə dövləti xüsusi şəkildə qabardıblar ki, Avropa Birliyinin öz ordusu olsun. Bir müddət Bin Ladenlə islam radikalizm məsələsi ilə ABŞ bunun ömrünü uzatmağa çalışdı. Ondan əvvəl isə Bosniya-Herseqoviniyada, Yuqoslaviyada olan proseslərlə buna cəhd etdi. Daha sonra 2008 - ci ildə Gürcüstan hadisələri, 2014 - cü ildə Ukrayna hadisələri yenə də bu məsələlərin müzakirəsinə gətirdi. NATO gündəmdən çıxmışdı. Ukrayna-Rusiya müharibəsində isə NATO daha çox gündəmə gəldi. NATO artıq beynəlxalq aləmdə sülhü mühafizə edir. Və bu müharibədə Amerikanın ən böyük istəyi elə NATO - nun gündəmdə qalması idi. Buna da nail oldu. İkincisi, müharibəyə qədər Amerika Yaxın Şərqdə, İraqda, Suriyada öz nüfuzunu itirmişdi. Əksinə, Rusiyanın normal bir nüfuzu yaranmışdı. Amma bu müharibədən sonra əks proses baş verdi. Rusiya nüfuzunu itirdi, cinayətkar, əraziləri işğal edən bir dövlət kimi tanındı. Amerika isə qurtarıcı, xilaskar rol oynamağa başladı. İmperialistlərin fərqi yoxdur. Müxtəlif zamanlarda isə rollarını dəyişirlər. Mən düşünmürəm ki, Rusiya ilə NATO açıq müharibəyə gedəcək. Onsuz da Ukraynanın arxasından bu müharibəni NATO başda ABŞ olmaqla aparır”.
Məhəmmədəli QƏRİBLİ
