Koronavirus (COVİD - 19) infeksiyasının Azərbaycan ərazisində yarada biləcəyi təhlükənin qarşısının alınması məqsədilə təxirəsalınmaz tədbirlər davam etdirilir.
Nazirlər Kabinetinin yanında Operativ qərargahdan bildirilib ki, yoluxma hallarının qarşısının alınması, bu sahədə aparılan müvafiq profilaktik tədbirlərin effektivliyinin yüksəldilməsi, ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin intensivləşdirilməsi məqsədilə 2020-ci ilin mart ayının 3-dən 9-dək (ilk tədris günü mart ayının 10-u müəyyən edilir) bütün təhsil müəssisələrində tədris, təlim-tərbiyə prosesinin dayandırılmasına və bununla bağlı bütün tədbirlərin təxirə salınmasına dair qərar qəbul olunub.
Bu müddət ərzində Təhsil Nazirliyinə və tabeliyində təhsil müəssisələri olan müvafiq icra hakimiyyəti orqanlarına bütün təhsil müəssisələrində tibbi-profilaktik və dezinfeksiyaedici tədbirlərin davam etdirilməsi tapşırılıb. Dünyada sürətlə yayılan bu epidemiyadan kimsə sığortalanmayıb. Xəstəliyin əlamətləri hətta dünyanın ən inkişaf etmiş ölkələrində belə özünü göstərir. Dünya dövlətləri maksimum dərəcədə çalışırlar ki, əhalilərini belə epidemiya ilə üz-üzə qoymasınlar. Bunun üçün bir sıra qabaqlayıcı tədbirlər görülür.
Azərbaycanda, demək olar ki, bu virusun daşıyıcısı aşkar edilməyib. Tranzit kimi ölkəmizdən istifadə edən bəzi əcnəbi vətəndaşlarda bunun aşkarlanmasının isə bizə heç bir aidiyyəti yoxdur. Azərbaycan hakimiyyətinin atdığı addımlardan görünür ki, dövlət öz vətəndaşını maksimum dərəcədə bu epidemiyadan kənarda tutmağa çalışır. Bunun ən bariz nümunəsi kimi təhsil ocaqlarında bir neçə günlük dərslərin təxirə salınmasını göstərə bilərik. Bu addım heç də o anlama gəlmir ki, məktəb və ya ali təhsil ocaqlarımızda bu xəstəliyin simptomları müşahidə edilib. Qabaqlayıcı tədbirlər ona görə görülür ki, insanların kütləvi yerlərdəki təmasları minimuma ensin. Yoluxucu xəstəliklərlə mübarizə dövlətlə vətəndaşın sinxron yanaşmasını tələb edir. Yəni hansısa vətəndaş şəxsi gigiyenasına fikir verməyəcəksə, dövlətin müdaxiləsi olsa belə, onu xəstəlikdən xilas etmək mümkün olmayacaq. Sosial şəbəkələrdə məktəblərin bağlanmasına valideynlərin verdikləri reaksiyalar adamı təəccübləndirir. Əksəriyyət bunu böyük sevinc və ələ düşən fürsət kimi dəyərləndirib. Yazırlar ki, məktəb bağlandısa, uşaqları götürüb, hansısa istirahət məkanına və ya restorana getmək olar. Bunlar anlamırlar ki, dövlət bu addımı elə kütləvi yerlərdə təmasları azaltmaq üçün atıb. Dövlət kiminsə övladının qayğısına qalıb bunu edirsə, valideynin də borcudur ki, öz üzərinə düşəni etsin. Özünü və uşaqlarını kütləvi təmas yerlərindən kənarda saxlasın.
Dövlətin gördüyü qabaqlayıcı tədbirlərlə bağlı vətəndaşlarımızın məsuliyyəti necə müəyyənləşməlidir?
Məlahət Mürşüdlü: “Çoxları elə bilir ki, həmin xəstəlik adi qripdir”
Təhsil eksperti Məlahət Mürşüdlü “Bakı-Xəbər”ə açıqlamasında bildirdi ki, belə tendensiyanı onun özü də müşahidə edib: “Bütün bunların obyektiv səbəbi var. Ancaq mən düşünmürəm ki, bizim müşahidə etdiyimiz və addımlarını yanlış saydığımız valideynlər cəmiyyətdə mütləq əksəriyyətdir. Vətəndaşların bir hissəsi təhsilin niyə dayandırıldığının mahiyyətini anlamır. Bilmirlər ki, bu addım qorxulu epidemiyanın yayılması ilə bağlı qabaqlayıcı tədbirlər kimi atılıb. Hökumət tərəfindən atılan bu addımın əhəmiyyəti sözsüz ki, böyükdür. Sosial şəbəkələrdə dediyiniz tendensiyanın üzə çıxması məlumatsızlıqdan irəli gəlir. Çoxları elə bilir ki, həmin xəstəlik adi qripdir. Yayılan virusun əsl mahiyyəti izah olunmalıdır. Bütün vasitələrlə əhaliyə çatdırılmalıdır ki, ona ciddi yanaşılsın. Bu istiqamətdə olan maarifləndirmə siyasətinin əhali arasında düzgün qurulmaması sonda gətirib belə hallara çıxarır. Burada da ən böyük zəhmət geniş auditoriyaya sahıb olan KİV-in üzərinə düşür. Xüsusilə də televiziyalar bu yöndə maarifləndirməni gücləndirməlidirlər. Həmişə olduğu kimi, biz bu məsələdə də gecikirik. Bu virusun nələrə qadir olduğunu, yayılma ehtimalı və ondan qorunmanın yollarını biz peşəkarların dilindən eşitməliydik. Hətta yayıldığı ilk andan bunu etməliydik. Təəssüf ki, biz bu addımları xəstəlik qapımızı döyməyə başlayanda etdik. İnsanlara başa salmaq lazımdır ki, sənin uşağını məktəbdə qoruyurlarsa, evdə qorumaq sənin öhdənə düşür. Məktəbdən yayınıb, gedib başqa kütləvi yerlərdə bu xəstəliyə tutula bilmə risqini artırmaq olmaz. Ümid edirəm ki, bizdə bu xəstəliyə yoluxma halları heç qeydə alınmayacaq”.
Məhəmmədəli QƏRİBLİ
