Məlum olduğu kimi, koronavirus (COVİD - 19) infeksiyasının Azərbaycan ərazisində yarada biləcəyi təhlükənin qarşısının alınması məqsədilə dövlət tərəfindən təxirəsalınmaz tədbirlər görülür. Artıq bir neçə həftədir koronavirus təhlükəsi ilə bağlı müxtəlif qurumlar və müəssisələrdə profilaktik tədbirlər həyata keçirilir. Bununla bağlı paytaxt kinoteatrlarına giriş məhdudlaşdırılıb, bəzi mədəniyyət tədbirləri təxirə salınıb.
Bildiyimi kimi, Nazirlər Kabineti tərəfindən yoluxma hallarının qarşısının alınması, bu sahədə aparılan müvafiq profilaktik tədbirlərin effektivliyinin yüksəldilməsi, ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin intensivləşdirilməsi məqsədilə 2020-ci ilin mart ayının 3-dən 9-dək (ilk tədris günü mart ayının 10-u müəyyən edilir) təhsil müəssisələrində tədris, təlim-tərbiyə prosesinin dayandırılmasına və bununla bağlı tədbirlərin təxirə salınmasına dair qərar qəbul olunub.
Orta və ali məktəblərdə dərslərin təxirə salınması, eləcə də bəzi müəssisələrin fəaliyyətinin məhdudlaşdırılması o demək deyil ki, şagirdlər, tələbələr olaydan sui-istifadə edərək istədiyi yerə getsinlər. Əslində, bu qərarın qəbul olunmasında məqsəd insanların kütləvi yerlərdə gorünməməsi, ev şəraitində olması ilə bağlıdır. İctimaiyyət içində olan insanların xəstəliyə tutulma və onu yayma imkanları daha böyükdür. Odur ki, şagirdlər də, tələbələr də kütləvi yerlərdə, tədbirlərdə, əyləncə yerlərində görünməməlidirlər. Həkimlərin verdiyi tövsiyələrə əməl etməlidirlər ki, virus təhlükəsi ilə qarşılaşmasınlar.
İnsanların, xüsusən də şagird və tələbələrin, elm adamlarının intensiv olaraq müraciət etdiyi məkanlardan biri kitabxanalardır. Kitabxanalarda əsas təmas kitablarladır və bir gündə eyni kitabı, qəzet və jurnalı, materialı bəzən yüzlərlə insan istifadə edə bilir. Həmçinin, kitabxanaların oxu zallarında insanlar bir-birilə təmasda olurlar. Bu virus da əsasən hava-damcı yolu ilə yoluxur. Bu gün digər müəssisələrlə paralel olaraq kitabxanalarda da profilatik tədbirlər həyata keçirilməli, oxucularla bağlı ciddi məhdudlaşdırıcı tədbirlər görülməlidir. Hətta kitabxanaların da orta və ali məktəblər kimi müvəqqəti qapadılması zəruridir.
Koronavirus təhlükəsinin qarşısının alınması məqsədilə hansı kitabxanalar müvəqqəti olaraq bağlanacaq?
Paytaxtımızda fəaliyyət göstərən və ölkəmizin baş kitabxanası olan Milli Kitabxanaya müxtəlif kateqoriyalara aid oxucular sıx-sıx müraciət edirlər. Demək olar ki, bu kitabxanaya müxtəlif yaş qruplarına aid insanlar gəlirlər.
Kərim Tahirov: “Milli Kitabxananı bağlamaq fikrində deyilik, amma məhdudlaşdırıcı tədbirlər görürük”
Milli Kitabxananın direktoru Kərim Tahirov “Bakı-Xəbər”ə bildirdi ki, Milli Kitabxananın müvəqqəti olaraq bağlanması gündəmdə deyil, amma müəssisədə müxtəlif məhdudlaşdırıcı tədbirlər həyata keçirilir. Hər gün Milli Kitabxananın bütün zallarının dezinfeksiya olunduğunu deyən K.Tahirovun sözlərinə görə, bu yaxında bir gün işçilər işə çıxmayacaq və həmin gün kitabxana aidiyyəti qurumun əməkdaşları tərəfindən dizenfeksiya ediləcək. “Bizə artıq göstəriş verilib və səhər saat 7-dən saat 10-a qədər bütün zallar, dəhlizlər, bir sözlə, hər yer dezinfeksiya olunub. Ümumiyyətlə, hər gün səhər-səhər bütün zalları xüsusi məhlulla dezinfeksiya edirik. Eyni zamanda, martın 8-i kitabxana birgünlük bağlı olacaq, işçilər işə gəlməyəcək və Səbayıl Rayon Gigiyena və Epidemiologiya Mərkəzinin əməkdaşları gəlib kitabxananı tamamilə dezinfeksiya edəcəklər. Amma indi kitabxana özü edir. Milli Kitabxananı bağlamaq fikrində deyilik, amma məhdudlaşdırıcı tədbirlər görürük. Burada keçirilməsi nəzərdə tutulan tədbirlər təxirə salınıb. Martın 3-ü üç tədbirimiz vardı, hamısı təxirə salındı, ləğv olundu” - deyə K.Tahirov qeyd etdi.
F.Köçərli adına Respublika Uşaq Kitabxanası: “Bizim kitabxana işləyir”
Firudin bəy Köçərli adına Respublika Uşaq Kitabxanasının əməkdaşları da bizimlə söhbətlərində nazirlikdən koronavirusa qarşı karantin tədbirləri görülməsi ilə bağlı xüsusi göstəriş aldıqlarını bildirdilər. Kitabxananın əməkdaşlarının sözlərinə görə, hazırda kitabxanaya şagirdlər müraciət etməsə də, onlar iş başındadırlar. “Bizim kitabxana bağlanmayıb, yəni bağlanması haqqında söhbət getmir. Amma karantin tədbirləri ilə bağlı nazirlikdən təlimat almışıq. Dezinfeksiya işləri aparılacaq. Demək olar ki, son günlər kitabxanamıza uşaqlar müraciət etmir. Bu da məlum məsələ ilə bağlıdır. Bizim kitabxana işləyir, amma karantin tədbirləri görüləcək” - deyə bildirdilər.
İradə SARIYEVA
