Nazirlər Kabinetinin yanında operativ qərargahı bütün təhsil müəssisələrində tədris, təlim-tərbiyə prosesinin dayandırılmasına və bununla bağlı bütün tədbirlərin təxirə salınmasına dair qərar qəbul edib.
Qərargahdan baki-xeber.com-a daxil olan məlumata görə, koronavirus (COVİD - 19) infeksiyasının Azərbaycan ərazisində yarada biləcəyi təhlükənin qarşısının alınması məqsədilə təxirəsalınmaz tədbirlər davam etdirilir. Yoluxma hallarının qarşısının alınması, bu sahədə aparılan müvafiq profilaktik tədbirlərin effektivliyinin yüksəldilməsi, ölkə ərazisində yerləşən bütün təhsil müəssisələrində tibbi-profilaktik, dezinfeksiyaedici və digər qabaqlayıcı tədbirlərin intensivləşdirilməsi məqsədilə 2020-ci ilin mart ayının 3-dən 9-dək (ilk tədris günü mart ayının 10-u müəyyən edilir) bütün təhsil müəssisələrində tədris, təlim-tərbiyə prosesinin dayandırılmasına və bununla bağlı bütün tədbirlərin təxirə salınmasına dair qərar qəbul olunub. Bu müddət ərzində Təhsil Nazirliyinə və tabeliyində təhsil müəssisələri olan müvafiq icra hakimiyyəti orqanlarına bütün təhsil müəssisələrində tibbi-profilaktik və dezinfeksiyaedici tədbirlərin davam etdirilməsi tapşırılıb.
Operativ qərargahın mühüm fəaliyyət istiqamətlərindən biri daxil olan informasiyaların araşdırılmasından ibarətdir.
Belə ki, Nazirlər Kabineti yanında operativ qərargah koronavirus təhlükəsi ilə bağlı mətbuatda yayılan və vətəndaşların müraciəti ilə daxil olan bütün məlumatları ciddi araşdırır və operativ reaksiya verir.
Qərargahdan verilən məlumata görə, martın 1-də sosial şəbəkələrdə yayılmış və xüsusi geyimdə olan həkimlərin "İçərişəhər" metrostansiyası yaxınlığında görünməsini əks etdirən videomaterial vətəndaşlar tərəfindən verilmiş məlumat əsasında xəstəlik şübhəsi olan şəxsin nəzarət altına alınması zamanı çəkilib.
Koronavirus şübhəsi ilə müşahidə altına alınan və ya xəstəlik şübhəsi ilə Təcili Tibbi Yardıma müraciət edən istənilən şəxs olduğu yerdən məhz bu xüsusi geyimlərdə olan həkimlər tərəfindən xəstəxanaya aparılır: "Bu görüntülər şəhərdə yeni koronavirus xəstəsinin aşkar olunduğu demək deyil, profilaktik tədbirlərin tərkib hissəsidir. Ölkədə yeni koronavirus xəstəliyinə yoluxma faktı qeydə alınarsa, ictimaiyyət bu barədə məlumatlandırılacaq.
Qərargah bir daha vətəndaşlardan süni ajiotaj yaratmamağı və rəsmi mənbələrdən paylaşılan məlumatları izləməyi xahiş edir.
Qorxulu virus əleyhinə operativ qərargahın indiyə qədər həyata keçirdiyi tədbirlər bir çox ölkələri vahimədə saxlayan virus təhlükəsinin Azərbaycanda tam nəzarətə götürüldüyünü söyləməyə əsas verir. Bir tərəfdən səyyar yoxlama tədbirləri görülür, bir yandan ümumölkə miqyaslı qərarlar verilir (məktəblərin müvəqqəti bağlanması kimi), digər tərəfdən isə sosial şəbəkələrdə bəzi görüntülərin yanlış trendə çevrilməsi cəhdlərinin qarşısı alınır, eyni zamanda gigiyenik maarifləndirici görüntü və izahat materialları hazırlanaraq yayılır.
Şifahi sorğular əsasında vətəndaşlardan aldığımız ümumi qənaət budur ki, qabaqlayıcı dövlət tədbirləri məqbul sayılmaqla, ölkəmizin ümumən bu bəladan ciddi itkilər olmadan çıxacağına böyük ümidlər yaranır.
Namiq QULİYEV
