Azərbaycan Nazirlər Kabinetinin yanında operativ qərargah brifinq keçirib. Trend-in məlumatına görə, qərargah koronavirusla bağlı jurnalistlərin suallarını cavablandırıb.
Nazirlər Kabinetinin yanında operativ qərargahın üzvü Yaqut Qarayeva bildirib ki, bu gün ölkədə aşkarlanan ilk koronavirus xəstəsi 1997-ci il təvəllüdlü Rusiya vətəndaşıdır. Onun sözlərinə görə, xəstə sərhədi keçərkən məlumat verib: "Xəstə dərhal nəzarətə götürülüb. Hazırda karantində saxlanılır. Vəziyyəti stabildir, ağırlaşma yoxdur. Artıq xəstədən müayinələr götürülüb. Analizlər götürülüb. Həmin xəstə xüsusi boks şəraitində saxlanılır".
Y.Qarayeva Azərbaycan ilk koronavirusa tutulan şəxslə kontaktda olan şəxslərin araşdırıldığını da deyib. Onun sözlərinə görə, bununla bağlı işçi qrupu da yaradılıb: "Düzdür, Rusiya vətəndaşı Azərbaycana keçən zaman çox ciddi şəkildə izolyasiya olunub. Buna baxmayaraq, hazırda bu hadisə ilə bağlı işçi qrupu da yaradılıb və Rusiya vətəndaşı ilə kontaktda ola biləcək şəxslər araşdırılır. Belə bir insanlar aşkar olunarlarsa, onlar da karantinə alınacaqlar".
Y.Qarayeva Azərbaycanda hazırda koronavirus şübhəsi ilə 224 nəfər karantində saxlandığını deyib. Onun sözlərinə görə, həmin şəxslərdən 1-i İtaliya, 12-si İran, qalanı isə digər ölkə vətəndaşlarıdır: "Həmin şəxslər müalicə olunmur. Hazırda onlardan müayinələr götürülüb və cavablar gözlənilir. Cavablar gələnə qədər onlar karantində saxlanılacaq".
TƏBİB-in mətbuat katibi Rəvanə Əliyeva isə bildirib ki, koronavirusla bağlı qaynar xətt yaradılıb. O qeyd edib ki, 15 42 nömrəli "Qaynar Xətt" 24 saat fəaliyyət göstərir: "Vətəndaşlar özlərində hər hansısa bir şübhə hiss edərsə, bu nömrəyə zəng vurub məlumat verə bilər. Eləcə də Bakıda 103, regionlarda isə 113 təcili yardım xidmətinə müraciət edilə bilər".
Operativ qərargahın üzvü Yaqut Qarayeva Azərbaycanın koronavirusla bağlı bəzi ölkələrlə sərhədlərinin bağlana biləcəyini deyib. Onun sözlərinə görə, hazırda bu istiqamətdə tədbirlər görülür: "Azərbaycana koronavirusun keçməsinin qarşısının alınması üçün bütün lazımi addımlar atılır. Azərbaycanın bu xəstəlik aşkarlanan ölkələrlə sərhədi bağlaması istiqamətində çox yüksək səviyyədə danışıqlar aparılır. Danışıqların nəticəsi olaraq bu barədə qərar veriləcək".
Y.Qarayeva İranda koronavirusun yayılmasına baxmayaraq, insanlarımızın hələ də ora getməkdə davam etdiklərini deyib. Onun sözlərinə görə, insanlar orada virusun yayıldığını bilə-bilə həmin ölkəyə səfər edirlər: “Azərbaycan tərəfindən İrana gediş-gəlişlər hələ də davam edir. Vətəndaşlarımız ölkəyə qayıdan zaman isə, bəzi hallarda yoxlamadan boyun qaçırırlar. Onlar başa düşməlidirlər ki, bu yoxlamalar onların təhlükəsizliyi və sağlamlığının təminatı üçündür. Görülən işlər tək bizdən asılı deyil, gərək vətəndaşlarımız da bizə az da olsa, yardım etsinlər".
Y.Qarayeva bildirib ki, Azərbaycana gələn şəxslər iki mərhələdə yoxlanılır: "1-ci mərhələ sərhəddə termometriya ilə yoxlanılır, 2-ci mərhələdə isə həkimlər tərəfindən 2-ci, yəni təkrar termometriya yoxlaması aparılır. İkinci mərhələdə aparılan müayinələr zaman şübhə yaranarsa, analizlər götürürük. Təsdiqləndiyi halda tədbirlər görülür".
Y.Qarayeva bildirib ki, Azərbaycanda koronavirusla bağlı 3 karantin xəstəxanası ayrılıb. Onun sözlərinə görə, hazırda Astara, Cəlilabad və Qobustan xəstəxanaları karantin üçün hazır vəziyyətə gətirilib: "Həmin xəstəxanalar bütün dərman preparatları və digər zəruri avadanlıqla təmin edilib. Bundan əlavə, bu məsələ ilə bağlı köməkçi xəstəxana və mərkəzlər də zəruri avadanlıqlar və preparatlarla təchiz olunub".
Onu da qeyd edək ki, bu gün Nazirlər Kabinetinin yanında operativ qərargah Azərbaycanda ilk koronavirus (COVİD - 19) infeksiyasına yoluxma faktının qeydə alındığını təsdiq edib.
