Bu gün dünyanın müxtəlif ölkələrində tüğyan edən “COVİD-19” koronavirusu Çinin Uhan şəhərində aşkarlansa da, onun miqyası kifayət qədər genişlənib. Koronavirusun ABŞ-da, Avropa ölkələrində, Azərbaycanla qonşu olan İranda, Gürcüstanda mövcud olduğu təsdiqlənib.
Koronavirusla bağlı Ümumdünya Səhiyyə Təşkilatının (ÜST) yaydığı son məlumatlara istinad edərək bildiririk ki, dünyanın 33 ölkəsində “COVİD-19” koronavirusuna yoluxma ilə bağlı 80 980 hal qeydə alınıb.
ÜST-nin Avropa üzrə regional ofisinin direktoru Hans Klügenin sözlərinə görə, yeni növ koronavirus Avropanın 13 ölkəsində yayılıb. “Yoluxma hallarının 96,5%-i Çində qeydə alınıb”, – ÜST nümayəndəsi bildirib.
Onu da vurğulayaq ki, virusa Çində təxminən 77 min insan yoluxub, ölənlərin sayı 2700-ü çoxdan ötüb.
Məlum olduğu kimi, Çində koronavirusla bağlı ilkin məlumatlar yayıldıqdan dərhal sonra Azərbaycan dövləti bu virusun ölkəmizdə peyda olmaması üçün qabaqlayıcı tədbirlərə start verdi. Yanvarın 28-də Prezident İlham Əliyevin tapşırığına əsasən, Nazirlər Kabinetinin toplantısı keçirilib və toplantıda Çin virusuna qarşı tədbirlər planı hazırlanıb.
Bu gün, demək olar ki, bütün yerlərdə bu istiqamətdə işlər görülür. Hazırda ölkədə Səhiyyə Nazirliyinin əmrinə əsasən, koronavirusla bağlı bütün profilaktik tədbirlər həyata keçirilir. Eyni zamanda, Gömrük Komitəsi ilə birgə müəyyən işlər aparılır. Səhiyyə Nazirliyinin Gigiyena və Epidemiologiya Mərkəzinin baş direktor müavini Afaq Əliyevanın mətbuata verdiyi məlumata görə, Azərbaycanda bu məsələ diqqətdədir və bununla bağlı tədbirlər gücləndirilir.
Ölkəmizdə koronavirusa qarşı qabaqlayıcı tədbirlərin intensiv hal aldığı, artıq İran, Gürcüstan, digər ölkələrlə sərhədlərdə səyyar xəstəxanaların, tibb məntəqlərinin yaradıldığı, bura peşəkar həkimlərin cəlb edildiyi məlumdur. Dövlətimiz bu xəstəliyin ölkəmizə daxil olmaması üçün ciddi mübarizə tədbirləri görür. Onu da vurğulayaq ki, bununla bağlı sərhəd-keçid məntəqələrində Azərbaycan vətəndaşları, digər ölkələrin vətəndaşları, həmçinin, Çindən gələn vətəndaşlar müayinədən və yoxlanışdan keçirilirlər. Xüsusilə Çindən və ona qonşu ölkələrdən gələn şəxslər hərarəti olarsa, xüsusi nəzarətə və müşahidəyə götürülürlər. Həmçinin, müxtəlif müəssisələrdə, məktəblərdə, məktəbəqədər uşaq müəssisələrində müşahidələr və dezinfeksiya işləri aparılır.
Azərbaycan dövlətinin həyata keçirdiyi qabaqlayıcı tədbirlər mütəxəssislər tərəfindən də yüksək qiymətləndirilir. Ümumiyyətlə, koronavirus təhlükəsinə qədər də dünyanı saran bir sıra virus mənşəli infeksion xəstəliklər olub. Məsələn, 2008-ci ildə bütün dünyanı dəhşətə salan “Quş qripi” infeksiyası tüğyan etdiyi vaxtlarda Azərbaycanda həyata keçirilən qabaqlayıcı tədbirlər nəticəsində bu virus ölkəmizin əhalisinə ziyan vurmadan keçib. Məlum olduğu kimi, həmin dövrdə Səhiyyə Nazirliyi H5N1 “Quş qripi” xəstəliyinə dair təlimat hazırlamışdı. Azərbaycan dövlətinin “Quş qripi”nə qarşı ehtiyat tədbirləri görməsi və bu hala qarşı mübarizə tədbirlərini gücləndirməsi müsbət nəticələr verdi. Halbuki, həmin dövrdə Avropada, ABŞ-da “Quş qripi” onlarla insanın həyatını əlindən almışdı. 2009-cu ildə dünyada yayılan “Donuz qripi”nə (SIV) qarşı mübarizədə də Azərbaycan aktivliyi ilə seçilib və bu xəstəliyin qarşısının alınması üçün gərəyi olan bütün tədbirləri həyata keçirib. Burada söhbət “Donuz qripi”nin Azərbaycanda yayılmaması üçün hazırlanan tədbirlər planı və o planda nəzərdə tutulan məsələlərin yüksək səviyyədə icrasından gedir. Bilirik ki, bu virusların ölkəmizdə yayılmaması üçün əhalinin “Quş qripi”nə və “Donuz qripi”nə yoluxmaması məqsədilə onların peyvəndlənməsi həyata keçirlib. Ayrıca olaraq xəstəxanalar, tibb müəssisələrində xüsusi izolyasiya edilmiş palatalar yaradılmışdı.
Həmin dövrdə xəstəliyin geniş yayıldığı ölkələrdən ərzaq məhsullarının gətirilməsinə də qadağa qoyulmuşdu. Kənd Təsərrüfatı Nazirliyi virusun bizim ölkəyə nüfuz etməsinin qarşısını almaq üçün lazım olan bütün tədbirləri həyata keçirmişdi. Həmçinin, Meksikadan və ABŞ-dan Azərbaycana baytarlıq nəzarəti altında olan, o cümlədən, heyvani mənşəli ərzaqların gətirilməsi qadağan edilmişdi.
Rafis Bağırov: “Bu virusun hələ Çində tüğyan etdiyi və dünyaya elə də geniş yayılmadığı zamanda Azərbaycan dövləti qabaqlayıcı tədbirlərin görülməsi üçün konkret addımlar atdı”
Tibbi ekspert Rafis Bağırov “Bakı-Xəbər”ə bildirdi ki, bütün dövrlərdə dünyada yayılan və böyük insan tələfatına səbəb olan virusların ölkəmizdə yayılmasının qarşısını almaq üçün tədbirlər həyata keçirilib. “Azərbaycanda qrip mənşəli infeksiyaların ciddi fəsadlar verməməsinin, indiyə qədər başqa ölkələrdəki kimi kütləvi can almamasının səbəbi dövlət tərəfindən həyata keçirilən qabaqlayıcı tədbirlərdir. Bilirsiniz ki, bundan əvvəlki dövrlərdə də dünyada yayılan bir çox virus mənşəli xəstəliyin, o cümlədən də “Quş qripi”, “Donuz qripi” kimi təhlükəli epidemiyanın ölkəmizdə yayılmaması üçün dövlət tərəfindən ciddi qabaqlayıcı tədbirlər görülüb. Nəticə də məlumdur. Dövlətimiz əhalinin sağlamlığı üçün keçən dövrlərdə də, indi də gərəyi olan bütün tədbirləri həyata keçirir. Ölkəmizdə dövlət səviyyəsində həyata keçirilən ardıcıl və məqsədyönlü tədbirlər, görülən işlər Azərbaycanın bu viruslardan itkisiz çıxmasına imkan verib. Bu virusun hələ Çində tüğyan etdiyi və dünyaya elə də geniş yayılmadığı zamanda Azərbaycan dövləti qabaqlayıcı tədbirlərin görülməsi üçün konkret addımlar atdı” - deyə ekspert bildirdi.
İradə SARIYEVA
