Çində və digər ölkələrdə onlarla insanın canını alan koronavirus kabusu bütün dünyanı təhdid edir. Bir sıra ölkələrdə artıq Çin virusunun olduğu faktı təsdiqlənib. Azərbaycanda isə rəsmən koronavirusun olduğu təsdiqlənməyib, ölkəmizdə bu virus yoxdur.
Məlum olduğu kimi, yanvarın 28-də Azərbaycan Respublikasının Prezidenti İlham Əliyevin tapşırığına əsasən, Nazirlər Kabinetində Ümumdünya Səhiyyə Təşkilatının və Çin Xalq Respublikası hökumətinin elan etdiyi kimi, Çinin Uhan şəhərində yayılmış və artıq dünyanın başqa regionlarında da qeydə alınmış koronavirus epidemiyasına qarşı qabaqlayıcı tədbirlərin görülməsi üçün müşavirə keçirilmişdi.
Onu da qeyd edək ki, ölkə başçısının tapşırığına əsasən, Azərbaycanda koronavirusla bağlı Elmi-Tədqiqat Ağciyər Xəstəlikləri İnstitutu, 1 saylı Kliniki Tibbi Mərkəz və 7 saylı Uşaq infeksion xəstəxanasında xüsusi palatalar ayrılıb.
Ölkəmizdə Çin virusu təhlükəsinin olmasına baxmayaraq, dövlət bu sahədə artıq qabaqlayıcı tədbirlər həyata keçirib. Bütün xəstəxanalarda, idarə və müəssisələrdə, orta məktəblərdə, bağçalarda, metropolitendə və s. yerlərdə qabaqlayıcı tədbirlər görülüb. Sərhəd-keçid məntəqələrində, gömrükdə də bu istiqamətdə tədbirlərin həyata keçirildiyi faktdır.
Azərbaycanda Çin virusunun olmamasına baxmayaraq, dövlət əvvəlcədən ehtiyat tədbirləri görməklə bu məsələnin nəzarətdə saxlandığını bir daha vətəndaşlara bildirir.
Çin virusunun qonşu İranda peyda olması xəbərinin ardınca bu virusun Azərbaycanın bəzi bölgələrində yayılması ilə bağlı şayiələrin yaranmasına səbəb olub. Hətta həqiqətə uyğun olmayan məlumatlar yayılıb ki, guya bizim ölkəmizdə Çin virusu diaqnozu ilə xəstəxanalara yerləşdirilən insanlar var. Bu məsələ də rəsmən öz təsdiqini tapmayıb. Dövlət öz vəzifəsini yerinə yetirsə də, bütün qurumlar qabaqlayıcı tədbirlər həyata keçirsələr də, bəzi aidiyyəti qurumlar tərəfindən yaradılan informasiya boşluğu bu cür şayiələrin meydana çıxmasına şərait yaradıb.
Məlumdur ki, sosial şəbəkələrdə yayılan naməlum və şübhəli səs yazılarına inansaq, artıq koronavirus “Azərbaycana da gəlib çatıb”. Bir həftəyə yaxındır ki, vətəndaşlarımız ölkəmizdə olmayan koronavirusa “yaxalanmamaq” üçün müxtəlif üsullardan yararlanırlar. Başlıcası isə apteklərdən spirti, qoruyucu maskaları daşımaqla özlərini təhlükəsiz vəziyyətdə hiss etmək istəyirlər. Fakt budur ki, hazırda paytaxt apteklərində spirt də, qoruyucu maskalar da qəhətə çəkilib. Az-çox apteklərdə varsa da, onun da qiyməti 5-6 qat bahalaşıb. İşbazların əlində olan apteklər insanların təşviş və əndişəsindən sui-istifadə edərək qiymətləri bir neçə qat qaldırıblar.
Dövlətin qabaqlayıcı tədbirlər görməsinə baxmayaraq, aidiyyəti qurumların yaratdıqları informasiya boşluğundan istifadə edən qüvvələrin yaydıqları şayiələrdən, yalan məlumatlardan insanlar əndişələnir, ölkəmizdə olmayan koronavirus “təhlükəsi”ndən narahat olurlar, Səhiyyə Nazirliyinin Baş epidemioloqu İbadulla Ağayevin “nəyə deyirsiniz and içim ki, ölkədə sabitlikdir və koronavirus yoxdur” açıqlamasını nəzərə almasaq, demək olar ki, Səhiyyə Nazirliyi əhalini məlumatlandırmır.
Nazirliyin Baş epidemioloqu isə açıqlamanı fevralın 24-də, yəni sosial şəbəkələrdə qorxulu səs yazıları yayıldıqdan, təhlükənin mövcudluğu ilə bağlı fikirlər səsləndirildikdən, vətəndaşlar artıq “tədbir” gördükdən sonra verib. “Bu gün Azərbaycanda koronavirusa yoluxan insan yoxdur. Səhiyyə Nazirliyi bu kimi hallardan qorunmaq üçün hər zaman qabaqlayıcı tədbirləri yüksək səviyyədə görür. Hazırda ölkədə epidemioloji həddi aşan heç bir yoluxucu xəstəlik qeydə alınmayıb. Buna tam əmin ola bilərsiniz”. Halbuki, nazirlik yetkililəri Azərbaycanda koronavirus epidemiyasının olduğu iddiasının hələ meydana çıxmadığı vaxtdan açıqlamalar verməyə başlamalı idilər.
Müşavirənin keçirilməsindən bir aya yaxın vaxt keçməsinə baxmayaraq, Səhiyyə Nazirliyi əhali arasında koronavirs təhlükəsi ilə bağlı heç bir maarifləndirici iş aparmayıb. Bu müddət ərzində nazirliyin aidiyyəti sektorlarının rəhbərləri, əməkdaşları camaatla hər hansı bir şəkildə ünsiyyətdə olmayıb, onları sakitləşdirmək üçün heç bir addım atmayıblar. Kabinetlərdə, kağız üzərində ömrünü başa vuran qərarlar, qaydalar vətəndaşların işinə yaramır. Ölkə əhalisinin sağlamlığına birbaşa cavabdeh olan Səhiyyə Nazirliyinin Baş epidemioloqunun “bəziləri əllərində dəqiq məlumat olmadığı halda, yalan informasiyalarla camaatı qorxudub xofa salırlar. Əmin ola bilərsiniz ki, ölkədə koronavirusa yoluxma faktı aşkarlansa, bunu hamıdan əvvəl nazirliyin rəsmisi kimi özüm xəbər verəcəm. Allah o virusu bizdən kənar eləsin” açıqlaması daldan atılan daşa bənzəyir.
Artıq əhali təşviş içindədir, ölkəmizə ayağı, nəfəsi dəyməyən bir virusla “döyüş vəziyyəti”ndədir, lap Donkixot sayağı. Əslində, vəziyyət bu cür olmalı deyildi. İnsanlar olmayan bir təhlükədən bu qədər əndişələnməməli idilər. Hamı gözünü nazirlik rəsmilərinin ağzına dikmişdi ki, bəlkə onlar tez-tez “ölkəmizdə koronavurus təhlükəsi yoxdur, vəziyyət tam nəzarətdədir” desinlər. Halbuki, Səhiyyə Nazirliyi gün ərzində bir neçə dəfə telekanallarda, sosial şəbəkələrdə əhalini qorxmamağa, əndişələnməməyə çağırmalı, ölkəmizdəki vəziyyətlə, yayılan şayiələrlə bağlı açıqlamalar verməli idi. Nazirliyin qorxulu, əndişəli, insanları təşvişə salan uydurma, yalan informasiyalar yayıldıqdan sonra məsələyə reaksiya verməsi ölkə ictimaiyyətini ciddi narahat edir və insanlar nazirliyi qeyri-operativlikdə suçlayırlar.
Səhiyyə Nazirliyinin susduğunu görən Azərbaycanı istəməyən qüvvələr öz təxribatçı dəstələrindən istifadə edərək cəmiyyətimizdə təşviş yaratmağa cəhd etdilər. Hətta buna müəyyən mənada nail oldular da. Onlar bu istiqamətdəki boşluqdan istifadə etdilər. Yadınıza gəlirsə, bir neçə il əvvəl “quş qripi” və “donuz qripi” ilə də bağlı ölkə əhalisi arasında təşviş yaratmaq istəyən qruplar meydana çıxmışdı. İnsafən, deyək ki, həmin dövrlərdə Səhiyyə Nazirliyinin mətbuat xidməti daha çevik işləyir və maarifçilik işini həyata keçirirdi. Hesab edirik ki, Səhiyyə Nazirliyi bundan sonra bu istiqamətdə mövcud olan informasiya boşluğunu doldurmaq üçün vaxtlı-vaxtında ictimaiyyəti informasiya ilə təmin edəcək.
İradə SARIYEVA
