“Xaricdə tibbi təhsil alan məzunları region xəstəxanalarında işə cəlb etməyə çalışırıq. Məncə, artıq onların bəzilərində buna maraq yaranıb”. Bunu İcbari Tibbi Sığorta üzrə Dövlət Agentliyinin (İTSDA) İdarə Heyətinin sədri Zaur Əliyev deyib.
Onun sözlərinə görə, bəzi regionların dövlət xəstəxanalarında tibbi fakültələrin açılması üçün hökumətə təkliflər verilməsi planlaşdırılır. Hazırda bununla bağlı təhlillər aparılır.
Z.Əliyev deyib ki, Səhiyyə Nazirliyi ilə rezidenturanı bitirib bölgələrə təyinat alan həkimlərin regionlarda ən azı 3 il çalışması məsələsi ilə bağlı danışıqlar aparılır: “Bu proses hazırda Səhiyyə Nazirliyi tərəfindən həyata keçirilir. Amma buna daha ciddi yanaşılmasını istəyirik”.
İdarə Heyətinin sədri onu da əlavə edib ki, kəndlərdə tibb məntəqələrinin vəziyyəti qənaətbəxş deyil: "Yerlərdə həkim çatışmazlığı var, avadanlıqlar istənilən səviyyədə deyil. Həkimlərin bəziləri düzgün müalicə-müayinə aparmaqda çətinlik çəkirlər. Regionlardakı həkim çatışmazlığını qısa müddətdə aradan qaldırmaq istəyirik. Xaricdə, xüsusilə Türkiyədə oxuyan tələbələri regionlara səfərbər etməyi düşünürük. Bununla bağlı onlarla danışıqlar gedir, həvəsləndirmə tədbirləri də görüləcək. Rezidenturanı bitirən tələbələrin də regionlara göndərilərək, ən azı 3 il orada işləməsini təmin etmək niyyətindəyik”.
Məlum olduğu kimi, neçə ildir bölgələrdə həkim çatışmazlığı problemi var. Nəinki xaricdə tibb təhsili alan məzunlar, paytaxtda təhsil alanlar belə, bölgələrə getmək istəmirlər. Əsasən Bakıdakı tibb ocaqlarında işləməyə üstünlük verirlər. O baxımdan indiki şəraitdə xaricdə tibbi təhsil alan məzunları region xəstəxanalarında işə cəlb etmək nə dərəcədə mümkündür?
“Kadrlarımızın regionlar üzrə paylanması üçün onların həyat səviyyəsi, maddi durumunun kifayət qədər yüksək olması vacibdir”
Məsələyə münasibət bildirən professor Adil Qeybullanın sözlərinə görə, xaricdə tibb təhsili alan məzunları region xəstəxanalarına cəlb etmək asan deyil. Bununla bağlı çox iş görülməlidir: “İcbari Tibbi Sığorta üzrə Dövlət Agentliyinin bununla bağlı hansı mexanizmi tətbiq edəcəyini bilmək lazımdır. Ola bilsin ki, bununla bağlı hansısa həvəsləndirici güzəştlər nəzərdə tutulub. Hesab edirəm ki, bütün hallarda, bunun nə cür tətbiq ediləcəyi aydın olmalıdır. Gözləyək görək işlər necə gedir. Çünki icbari tibbi sığorta ölkədə ilk təcrübədir. Bunun necə nəticələnəcəyini indidən demək çətindir. Bu baxımdan bir müddət gözləmək lazımdır. Ümumiyyətlə, regionlarda səhiyyənin inkişafı üçün çox iş görmək lazımdır. Yəni səhiyyə bir sistem şəklini ala bilsin. Yoxsa, yenə də həkimlər Bakıda işləməyə üstünlük verəcəklər. Hazırda xeyli sayda tələbəmiz Türkiyə və Avropa ölkələrində təhsil alıb işləmək üçün Azərbaycana gəlir. Ancaq təəssüf ki, kadrlarımız əsasən Bakıda, yəni mərkəzdə cəmləşiblər. Regionlarda kadr problemi özünü daha kəskin göstərir. Kadrlarımızın regionlar üzrə paylanması üçün onların həyat səviyyəsi, maddi durumunun kifayət qədər yüksək olması vacibdir”.
Vidadi ORDAHALLI
