Yenə təxribatçılar “sükan arxasında”dır, yenə də insanları əndişələndirən, təşvişə salan qorxulu “səslər” yuxumuza haram qatıb, rahatlığımızı pozub.
Çin virusunun (koronavirus) İranda yayıldığı və artıq ölü sayının 8-i keçdiyi ilə bağlı xəbərlər yayılan kimi “WhatsApp”, “Facebook” “qəhrəmanları” da iş başına keçdilər. Fevralın 23-dən 24-nə keçən gecə, demək olar ki, bir çox insanın “WhatsApp”ına naməlum insanların səsilə “Azərbaycanda da koronavirus yayılıb”, “Koronavirus Azərbaycanda da can aldı” kimi mesajlar yayılıb. Sosial şəbəkələrdə koronovirusa yoluxmuş şəxslərin Mərkəzi Klinik Xəstəxanaya yerləşdirilməsi barədə səs yazılarının yayılması əhalini təşvişə salıb.
Onu da bildirək ki, koronavirus təhlükəsindən əndişələnən şəxslər dövlət qurumlarının rəsmi qərarını, tapşırığını gözləmədən sosial şəbəkələrdə yayılan təxribatçı səs yazılarının ardınca apteklərə üz tuturlar. Sosial şəbəkələrdə yayılan məlumatlara görə, insanlar kütləvi şəkildə apteklərə gedib qoruyucu maska (respirator) və spirt alırlar.
Qeyd edək ki, Azərbaycanda müxtəlif epidemiyalar, təbii fəlakətlərlə bağlı əvvəllər də sosial şəbəkələrdə təxribatçı səs yazıları yayılıb. Məsələn, “quş qripi”, “donuz qripi”, təbii fəlakətlərlə bağlı yayılan səs yazılarını çoxumuz xatırlayırıq. O vaxt da məlum oldu ki, “WhatsApp” “qəhəmanları”nın xəbərdarlıqlarının heç bir əsası yoxdur, bu, hanısa qrupların maraqlarına xidmət edən təxribatdır. Bu gün koronavirusla bağlı yayılan səs yazılarının da, şübhəsiz ki, heç bir əsası yoxdur. Bu da əvvəlkilər kimi təxribatdan, insanları əndişəyə, təşvişə salmaqdan və müxtəlif işbazların biznesinə gəlir gətirməkdən başqa bir şey deyil. Əgər “koronavirus qapının ağzını kəsib” mesaji gəlirsə, onda insanların ilk üz tutduğu yer apteklər olur, qiyməti bahalaşmamış apteklərdən bütün dava-dərmanı, maskanı, spirti alıb evə daşıyırlar. Bu sirr deyil.
“Səhiyyə Nazirliyi Çin virusu ilə bağlı ictimaiyyəti tez-tez məlumatlandırmadığı üçün, meydana bu cür...”
Siyasi şərhçi Azər Həsrət hesab edir ki, camaat “WhatsApp”dakı səslərə yox, dövlət qurumlarına inanmalıdır. “Birincisi, dövlətin bu sahəyə məsul olan strukturları bu məsələ ilə bağlı tədbir görmədi. Bu baxımdan ki, aidiyyəti dövlət strukturları əhali arasında maarifləndirmə işləri aparmalı və informasiya, məlumat boşluğu yaratmamalı idi. Təəssüflər olsun ki, o boşluq yaradıldı və müəyyən təxribatçı qruplar da bu boşluqdan sui-istifadə etdilər. Artıq bir müddətdir Çindən qaynaqlanan və hətta uzaq ölkələrə belə gedib çıxan bu virusla bağlı informasiyalar yayımlanır. Azərbaycanın Səhiyyə Nazirliyi bu istiqamətdə informasiya boşluğuna imkan yaradır. Əlbəttə, nazirlik deyə bilər ki, biz olmayan şey haqqında nə danışa bilərik və s. Amma bu virus bir epidemiya halını alıbsa və dünyanı səksəkədə saxlayırsa, gündə bir neçə dəfə bununla bağlı Azərbaycandakı vəziyyət haqqında ictimaiyyətə məlumat verilməli idi. Amma təəssüflər olsun ki, bu məlumat yetərincə verilməyib. Səhiyyə Nazirliyi Çin virusu ilə bağlı ictimaiyyəti tez-tez məlumatlandırmadığı üçün, meydana bu cür “WhatsApp” təxribatçıları, dedi-qodu yaradanlar, şayiə yayanlar çıxıblar. Əslində, buna, sadəcə, dedi-qodu yaradanlar kimi baxılmamalıdır. Sosial şəbəkələrdə bu məlumatları yayanlar Azərbaycanın informasiya təhlükəsizliyini sınağa çəkmək istəyən düşmən qüvvələrdir. Birmənalı olaraq əminəm ki, bunun arxasında bizə düşmən olan qüvvələr dayanır. Burada Ermənistan, Rusiya, İran kimi qonşu ölkələrin xüsusi xidmət orqanları, Qərb ölkələrinin də müvafiq strukturları da var”.
A.Həsrət qeyd edir ki, bu qüvvəllər birlikdə də, ayrı-ayrılıqda da bu təxribatı həyata keçirə bilərlər. “Cəmiyyətdə səksəkə yaratmaq, insanları daim qorxu altında saxlamaq, ümumiyyətlə, insanların sabaha olan ümidlərini öldürmək üçün bu cür fürsətlərdən geniş istifadə edilir. Bu da təsadüfi deyil. Baxırsan ki, sosial şəbəkələrdə “bu xəbəri mətbəxdə bozbaş bişirən arvadlar uydurub yayır” kimi fikirlər yayılır. Bu qətiyyən belə deyil, bunun arxasında çox ciddi xüsusi xidmət orqanları dayanırlar. Bu səbəbdən də Azərbaycanın aidiyyəti dövlət qurumları uyğun addımlar atmalıdırlar ki, bundan təxribatçılar yararlanmasınlar. Şəxsən mən özüm də illərdir bu məsələlər haqqında danışıram. İllərdir bizə qarşı informasiya savaşı getdiyini və savaşda daim geridə qaldığımızı deyirik. Nəticə də o olur ki, informasiya müharibəsində önə çıxmalı olan adamların sinəsindən itələyib geri atırlar, bu işləri bacarmayanlar bizdən öndə olur” - deyə A.Həsrət vurğuladı.
İradə SARIYEVA
