07/04/2020 14:01
728 x 90

Bakıda parkinq probleminin layihələndirilməsinə beynəlxalq şirkətləri cəlb etmək nə qədər düzgündür?

img

Məlum olduğu kimi, bu günlərdə ölkə başçısı Bakı Nəqliyyat Agentliyinin rəhbəri Vüsal Kərimlini qəbul edib, onun rəhbərlik etdiyi sahə ilə bağlı tapşırıqlar verib. Söhbətdə diqqətçəkən məqamlardan biri də əhalini ciddi narahat edən parkinq mövzusunda oldu.

Ölkə başçısının bu məsələ ilə maraqlanması təsadüfi deyildi. Prezidentin bu yöndə Vüsal Kərimliyə verdiyi sual belə oldu: “Parkinq imkanları olmalıdır ki, sonra biz vətəndaşlardan bu qaydalara riayət etmələrini tələb edək... Ona görə parkinqlə bağlı soruşmaq istəyirəm: vəziyyət necədir və bu il hansı addımlar gözlənir?”

V.Kərimlinin cavabı belə olub: “Bu il biz parkinqlə əlaqədar bu istiqamətdə fəaliyyət göstərən beynəlxalq məsləhət xidmətlərini cəlb etmişik ki, Bakı şəhərində parkinq məsələsi nəinki infrastruktur cəhətdən, eyni zamanda, iqtisadi baxımdan analiz olunsun...”

Deməli, belə çıxır ki, BNA parkinq məsələsini həll etmək məqsədilə xaricdən mütəxəssis çağıracaq, problemin infrastruktur və iqtisadi tərəflərini çözmək üçün onlardan məsləhət alacaq. Təbii ki, bu məsləhətlər pulsuz deyil və bununla bağlı tender keçiriləcək. Bu isə milyonlarla dollar və bəlkə də daha çox dövlət vəsaitinin xərclənməsi deməkdir. Sual yaranır ki, avtomobil saxlamaq üçün yer müəyyənləşdirmək, bunun qiymətini, gəlir-çıxarını hesablamaq nə qədər çətin, mürəkkəb işdir ki, bunun üçün xaricdən mütəxəssis cəlb olunur? Bu işin yerli imkanlar hesabına görülməsi mümkün deyil?

  • Azər Allahevrənov: “Hansısa beynəlxalq qurumun düzgün məsləhəti nəticəsində elə problemlər aradan qaldırılır ki, bunun xeyri daha çox olur”

Nəqliyyat sahəsi üzrə ekspert Azər Allahverənov “Bakı-Xəbər”ə açıqlamasında bildirdi ki, V.Kərimli Prezidentlə görüşündə artıq bu işlərin beynəlxalq qurumların köməyilə layihələndirildiyini söyləyib: “Artıq onlar cəlb edilib. İlk baxışdan belə təəssürat yaranır ki, biz beynəlxalq mütəxəssislərin cəlbindən itiririk. Bunun da izahı maddi məsrəflə edilir. Bəzi hallarda  biz bundan xeyir götürürük. Hansısa beynəlxalq qurumun düzgün məsləhəti nəticəsində elə problemlər aradan qaldırılır ki, bunun xeyri daha çox olur. Mən nə qədər vəsaitin xərcləndiyini deyə bilmərəm. Vüsal müəllim də öz çıxışında bunu demədi. Təcrübə göstərir ki, parkinqlə bağlı məsələ həm də yol hərəkətinin təşkilinə təsir edir. Bunun da nəticəsində insanların tıxaclarda əsəbləri korlanır, yanacaq sərfi çox gedir, ekologiya korlanır, kütləvi şəkildə parklanma qaydaları pozulur. Bütün bunlar da kütləvi cərimələnmə ilə nəticələnir, sonda ziyan vətəndaşlara dəyir. Əslində, bu problemin peşəkar səviyyədə həll edilməməsi daha ciddi problemlərə səbəb olur. Hər halda, bu prosesə təcrübəsinə güvənilən şirkətlər dəvət olunur. Biz idman oyunlarının təşkilində də analoji vəziyyətlə rastlaşmışdıq. Avropa Oyunları zamanı ölkəmizə çoxlu sayda beynəlxalq mütəxəssis cəlb edilmişdi. Bunu hətta tənqid edirdilər ki, bu qədər məsrəf nəyə lazımdır? Sonra ölkəmizdə keçirilən İslam Həmrəyliyi Oyunlarında biz həmin mütəxəssislərin sayının azaldığını gördük. Çünki bizim yerli mütəxəssislər bir çox məsələni artıq mənimsəmişdilər. Beynəlxalq təcrübədən yararlanma, eyni zamanda, bizim yerli mütəxəssislərin də peşəkarlaşmasına yardım edir. Təcrübə mübadiləsi baxımından önəmli addımdır. Burada da bizim beynəlxalq praktikanı öyrənib Azərbaycana tətbiq etməyimizə ehtiyac böyükdür”.

Məhəmmədəli QƏRİBLİ 

Son xəbərlər